Bisalu Ya Bantumwa 21 - Le Nouveau Testament en Kikwango 1950

Paulu kwendaka ku Tilo ye Kaisalia

¹ Bu beto imene kukatuka na bau ye kota mu masua, beto kwendaka ya sungama ku Ko, ye kilumbu ya landa ku Lodo, tuka kuna ku Patala.

² Beto monaka masua ya ikele kusabuka ku Fenike, beto kotaka muna ye kwendaka.

³ Bu beto monaka Kipelo, beto bikaka yo na diboko kinkento, ye beto sabukaka ku Silia ye semaka na Tilo, kadi kuna bau fwiti kubasisa kizitu ya masua nataka.

⁴ Bu beto monaka banlonguki, beto vandaka kuna bilumbu nsambwadi, bau tubaka kwa Paulu, mu Mpeve, yandi fwiti kukuma ku Yelusalemi ve. Bis. 20:23

⁵ Kansi bu beto imene kumanisa bilumbu yina, beto katukaka kuna ye kwendaka nzila ya beto, buna bau yonso ye bankento ye bana sindika beto ti nanganda ya mbanza. Beto fukamaka va dibungu ye lombaka,

⁶ bu beto pesanaka mbote beto kotaka mu masua, ye bau vutukaka ku banzo ya bau.

⁷ Bu beto imene kusabuka tuka Tilo, beto kumaka ku Tolemai, beto pesaka mbote kwa bampangi ye vandaka na bau kilumbu mosi.

⁸ Kilumbu ya landa beto katukaka ye kwizaka ku Kaisalia, beto kotaka mu nzo ya Filipo, yandi ikele nsamuni, mosi ya bau nsambwadi, ye beto vandaka na yandi.

⁹ Yandi vandaka na bana iya ya bankento ya ikele bandumba, bau bikulaka. Bis. 2:17

¹⁰ Bu beto vandaka kuna bilumbu mingi, mbikudi katukaka na Yuda, nkumbu ya yandi Angabu.

¹¹ Bu yandi kwizaka kwa beto, yandi bakaka mukaba ya Paulu, dikangaka maboko ye makulu, yandi tubaka: Mpeve Yanlongo tubaka mpilayai: Muntu ya mukaba yai, baYuda takanga yandi bonso yai mu Yelusalemi ye yekula yandi mu maboko ya bapaien. Bis. 20:23; 25:21

¹² Bu beto kuwaka mambu yai, beto ye bau ya vandaka kuna bombidilaka yandi kwenda ku Yelusalemi ve.

¹³ Buna Paulu vutulaka: Beno sala nki, beno ikele kudila ye kupasula ntima ya mono ? Kadi mono lunga kukangwa kaka ve kansi kufwa mpe mu Yelusalemi sambu na nkumbu ya Mfumu Yesu. Bis. 20:24; Lom. 8:36

¹⁴ Bu beto lenda ve kukwidisa yandi, beto bikaka, ye tubaka: Bika luzolo ya Mfumu salwa. Mat. 6:10; Luk. 22:42

Paulu kwendaka ku Yelusalemi

¹⁵ Nanima na bilumbu yina beto bakaka bima ya beto, ye kwendaka ku Yelusalemi.

¹⁶ Banlonguki yankaka ya Kaisalia kwendaka na beto, bau twalaka beto kwa nlonguki ya ntama, nkumbu ya yandi Nasoni ya Kipelo ye beto zolaka kulala kwa yandi.

Paulu tuba kwa dibundu mu Efeso

¹⁷ Bu beto kumaka ku Yelusalemi, bampangi bakaka beto na kiese.

¹⁸ Kilumbu ya landa, Paulu kotaka sikamosi na beto kwa Yakobi, ye bambuta yonso kwizaka kuna.

¹⁹ Bu yandi imene kupesa bau mbote, yandi tubaka kwa bau mambu yonso mosi mosi ya Nzambi salaka nakati na bapaien mu kisielo ya yandi.

²⁰ Bu bau kuwaka yo, bau kembilaka Nzambi ye tubaka kwa Paulu: Mpangi, nge tala mafunda mingi ya baYuda imene kukwikila ye bau yonso ikele kulanda nsiku ngolo.

²¹ Bau imene kuwa sambu na nge, na nge ikele kulonga baYuda yonso ya ikele nakati na bapaien kubika Mose, ye nge ikele kusonga bau kuzenga bana ya bau ve, ye kutambula ve bonso ikele mu bifu. Bis. 18:13

²² Buna mambu nki ikele ? Kieleka kibuka takutakana kadi bau takuwa nge imene kwiza.

²³ Buna sala yai bonso beto tuba kwa nge. Beto ikele na bantu iya ya imene kutulaka nsilulu. Bis. 18:18

²⁴ Baka bau ye divedisa sikamosi na bau ye futa sambu na bau, na bau lenda kuzenga nsuki ya bau. Bantu yonso tazaba yo ikele kieleka ve ya bau imene kuwa sambu na nge, kansi na nge kibeni ikele kutambula ya lunga ye kukeba nsiku.

²⁵ Kansi sambu na bapaien ya imene kukwikila, beto sonikaka ye zengaka mambu na bau fwiti kutina bima ya yokwa kwa biteki, ye menga, ye mbizi ya kufwa na menga basika ve, ye bizumba.

²⁶ Buna Paulu bakaka babakala yina ye kilumbu ya landa yandi divedisa sikamosi na bau ye kotaka mu tempelo, kusonga manisa ya bilumbu ya vedisa, ti nkailu peswa sambu na muntu na muntu. Bis. 24:18

Paulu kangwa ye tulwa mu boloko

²⁷ Bu bilumbu nsambwadi zola lunga, baYuda ya katuka na Asia monaka yandi mu tempelo, bau kubwisaka kibuka yonso makelele ye simbaka yandi na maboko;

²⁸ bau bokaka: Beno babakala ya Isaeli, sadisa! Yai ikele muntu ya ikele kulonga bantu yonso na sika yonso kubuya bantu yai, ye nsiku, ye sika yai, ye yandi imene kukotisa baElene mpe mu tempelo, ye imene kusumuna sika yai ya nlongo. Bis. 24:5; 19:26

²⁹ Kadi bau imene kumona Tolofimo mwisi Efeso sikamosi na Paulu mu mbanza, ye bau banzaka Paulu imene kukotisa yandi mu tempelo.

³⁰ Mbanza yamvimba vandaka makelele ye bantu kwisa sikamosi, bau simbaka Paulu ye bendaka yandi nanganda ya tempelo, ye nswalu kangaka mielo.

³¹ Bu bau ikele kusosa kufwa yandi, nsangu kwendaka kwa kommandant ya basoldat, Yelusalemi yamvimba ikele na makelele. Bis. 26:21

³² Nswalu yandi bakaka basoldat ye bakuluntu ye kwisa kwa bau, kansi bu bau monaka kommandant ye basoldat, bau bikaka ku bula Paulu.

³³ Buna kommandant kwizaka mfinama ye simbaka yandi, ye sidikisaka kukanga yandi na minyololo zole, ye yuvula kana yandi ikele nani keti yandi imene kusala nki ?

³⁴ Nakati kibuka bankaka bokaka mambu mosi ye bankaka mambu yankaka, bu yandi lenda kuzaba ve mambu ya makelele yina, yandi sidikisaka kutwala yandi mu nzo ya basoldat.

³⁵ Bu yandi kwizaka ku kimantinu, yandi fwiti kunatwa na basoldat sambu na makasi ya bantu.

³⁶ Kadi kibuka ya bantu landaka bau ye bokaka: Katula yandi. Bis. 22:22; Luk. 23:18

³⁷ Bu bau zolaka kukotisa Paulu mu nzo ya basoldat, yandi tubaka kwa kommandant: Bika mono tubaka mambu kwa nge, Yandi tubaka: Nge zaba kiElena ?

³⁸ Nge ikele mwisi Ngipiti yina ve ya tombokisaka babakala mafunda iya ya ikele bafwi ye twalaka bau mu nsi ya mpamba ?

³⁹ Paulu tubaka: Mono ikele muYuda ya katuka na Talaso, muntu ya mbanza ya nene mu Kilikia. Kansi mono lomba nge, bika mono tuba kwa bantu. Bis. 22:3

⁴⁰ Bu yandi ndimaka, Paulu telemaka va mbalanda ye labisaka diboko kwa bantu, bu bau vandaka napi mingi, yandi tubaka kwa bau mu ndinga ya Ebeleo, kutuba: Bis. 12:17