Bisalu Ya Bantumwa 18 - Le Nouveau Testament en Kikwango 1950

Paulu kwendaka ku Kolinto

¹ Nanima na mambu yai Paulu katuka na Atene ye kwizaka ku Kolinto.

² Yandi monaka muYuda, nkumbu ya yandi Akila, muntu ya Ponto, ntama ve yandi katukaka na Italia sikamosi na nkento ya yandi, Pliskila, sambu na Klaudio sikidikisaka na baYuda yonso takatuka na Loma. Buna Paulu kwendaka kwa bau.

³ Sambu na yandi vandaka na kisalu mosi na bau, yandi vandaka na bau ye salaka na bau, sambu na kisalu ya bau ikele kusala nzo ya tente. Bis. 20:34; 1 Kol. 4:12; 1 Tes. 2:9; 2 Tes. 3:8

⁴ Yandi tubanaka na bantu mu nzo ya sambilu kilumbu ya luvundu na kilumbu ya luvundu, yandi sosaka kukwidisa baYuda ye baElene. Bis. 17:17

BaYuda buya nsamu mbote

⁵ Bu Sila ye Timoteo katukaka na Makedonia, mambu ya Nzambi kwikidisaka Paulu, ye yandi songaka kitemo kwa baYuda na Yesu ikele Klisto. Bis. 17:14; 18:28

⁶ Bu bau buyaka ye tubaka mbi, yandi bulaka mvwatu ya yandi, ye tubaka kwa bau: Menga ya beno ikele va ntu ya beno mosi, mono ikele na mambu ve, tuka ntangu yai, mono takwenda kwa bapaien. Bis. 20:26

⁷ Yandi katukaka kuna ye kotaka mu nzo ya muntu, nkumbu ya yandi Tito Yustu ya vumina Nzambi, nzo ya yandi vandaka mfinama ku nzo ya sambilu. Kolo. 4:11

⁸ Kansi Klispo nkuluntu ya nzo ya sambilu kwikilaka Mfumu ye nzo ya yandi yamvimba. Bantu mingi ya Kolinto kuwaka ye kwikilaka ye botikwaka. 1 Kol. 1:14

⁹ Mfumu tubaka kwa Paulu mu mpimpa mu mona-meso: Vanda na boma ve, kansi tuba, vanda napi ve. Bis. 16:9; 23:11

¹⁰ Sambu na mono ikele sikamosi na nge, ye muntu tabwila nge ve, kumonisa nge mpasi, kadi mono ikele na bantu mingi mu mbanza yai. Yes. 41:10; Yoa. 10:16

¹¹ Yandi vandaka kuna mvu mosi ye ngonda sambanu, ye longaka mambu ya Nzambi nakati na bau.

Bau zola kufundisa Paulu

¹² Bu Ngalio vandaka nyadi mu Akaya, baYuda teleminaka Paulu ye twalaka yandi ku kiti ya mfundisi.

¹³ Bau tubaka: Muntu yai ikele kukwikidisa bantu kusambila Nzambi mpilamosi nsiku ikele kubuya.

¹⁴ Kansi bu Paulu zolaka kukangula munoko ya yandi, Ngalio tubaka kwa baYuda: Beno baYuda, kana yo ikele mambu ya mbi keti mambu ya masumu, mono fwiti kuwa beno. Bis. 25:11

¹⁵ Kansi kana yo ikele biuvu sambu na mambu ye bankumbu ye nsiku ya beno, beno kibeni tala yau, mono zola ve kuvanda mfundisi ya mambu yai. Mat. 27:24; Yoa. 18:31

¹⁶ Yandi kulaka bau tuka kiti ya mfundisi.

¹⁷ Bau yonso bwilaka Sostene nkuluntu ya nzo ya sambilu, ye bulaka yandi nantwala na kiti ya mfundisi, kansi Ngalio banzaka sambu na mambu yai ve.

Paulu vutuka ku Yelusalemi ye Antiokia

¹⁸ Bu Paulu imene kuvanda kuna bilumbu mingi diaka, yandi pesaka bampangi mbote, ye sabukaka ku Silia sikamosi na Pliskila ye Akila. Paulu imene kuzenga nsuki ya ntu ya yandi mu Kenkelea, sambu na nsilulu vandaka na yandi. Bis. 21:23

¹⁹ Bau kwizaka ku Efeso, ye yandi bikaka bau kuna. Yandi kibeni kotaka mu nzo ya sambilu ye tubanaka na baYuda.

²⁰ Bu bau lombaka yandi kuvanda bilumbu mingi, yandi ndimaka ve.

²¹ Kansi bu yandi imene kupesa bau mbote, yandi tubaka: Mono tavutuka kwa beno kana Nzambi zola, buna yandi kwendaka ye sabukaka tuka Efeso.

²² Bu yandi kumaka ku Kaisalia, yandi tombokaka ku Yelusalemi ye pesaka mbote kwa dibundu, buna yandikulumukaka ku Antiokia.

Bau kwenda mu nzila ya tatu

²³ Bu yandi imene kuvanda kuna ntangu ndambu, yandi katukaka ye lutaka mu ntoto ya Ngalatia ye Filingia, bonso yo landana, yandi siamisaka banlonguki yonso.

Apolo kwiza ku Efeso

²⁴ Mu Efeso muYuda mosi kwizaka, nkumbu ya yandi Apolo, mwisi Alesandia, yandi ikele muntu ya ngangu, ye longaka masonukwa ngolo.

²⁵ Muntu yai longwaka mu nzila ya Mfumu, yandi vandaka ngolo mu mpeve, ye yandi tubaka ye longaka kieleka mambu yonso sambu na Yesu, kansi yandi zabaka mbotika ya Yoane kaka. Bis. 19:3

²⁶ Yandi yantikaka kulonga na kikesa mu nzo ya sambilu. Kansi bu Pliskila ye Akila kuwaka yandi, bau bakaka yandi, ye tendudilaka yandi nzila ya Nzambi kieleka.

²⁷ Bu yandi zolaka kuluta ku Akaya, bampangi pesaka kikesa ye sonikaka kwa banlonguki kubaka yandi. Bu yandi kumaka kuna, mu nlemvo yandi sadisaka mingi bau ya kwikilaka;

²⁸ mu ngolo yonso yandi tulaka ntembe na baYuda nantwala na bantu, yandi songaka mu masonukwa na Yesu ikele Klisto.