Bisalu Ya Bantumwa 16 - Le Nouveau Testament en Kikwango 1950

Paulu ye Silas tambula mu Delebe ye Listila

¹ Yandi kwizaka ku Delebe ye Listila. Tala, nlonguki mosi vandaka kuna, nkumbu ya yandi Timoteo, mwana bakala ya nkento ya Yuda, ya kwikilaka, kansi tata ya yandi vandaka muElene:

² bampangi ya vandaka mu Listila ye Ikone songaka kitemo mbote sambu na yandi.

³ Paulu zolaka yandi kwenda na yandi, yandi bakaka yandi ye zengaka yandi, sambu na baYuda ya vandaka ndambu kuna, kadi bau yonso zabaka tata ya yandi ikele muElene.

⁴ Bu bu lutaka mu bambanza, bau pesaka bau bansiku yina ya bantumwa ye bambuta mu Yelusalemi pesaka, sambu na kukeba Bis. 15:20, 29

⁵ Mpilayai mabundu kwizaka ngolo mu lukwikilu, ye ntalu ya bau lutaka kilumbu na kilumbu.

Paulu mona ndozi ya Makedonia

⁶ Bu Mpeve Yanlongo buyaka bau kulonga mambu mu Asia, bau lutaka mu Filingia ye ntoto Ngalatia.

⁷ Bu bau mfinamaka Misia, bau zolaka kukota mu Bitinia, kansi Mpeve ya Yesu buyaka bau kwenda.

⁸ Bu bau imene kuluta Misia, bau kulumukaka ku Toloa.

⁹ Paulu monaka mona-meso mu mpimpa, muntu ya Makedonia telemaka ye bombidilaka, ye kutuba: Sabuka ku Makedonia ye sadisa beto.

¹⁰ Bu yandi monaka mona-meso, nswalu beto sosaka sabuka ku Makedonia, sambu na beto zabaka Nzambi imene kubinga beto kusamuna nsamu mbote kwa bau.

Bau kwenda ku Filipi

¹¹ Bu beto bikaka Toloa, beto sabukaka ya sungama ku Samotolake, ye kilumbu ya landa ku Neapoli.

¹² Tuka kuna beto kwendaka ku Filipi, mbanza ya ntete mu ndambu yina ya Makedonia, ikele mbanza ya baLoma. Beto vandaka mu mbanza yina bilumbu ndambu.

¹³ Mu kilumbu ya luvundu, beto basikaka na mwelo ya mbanza ye kwendaka ku mukidi ya nzadi, beto banzaka kuna ikele sika ya lombilu, beto vandaka ye tubaka kwa bankento ya kutakanaka.

¹⁴ Nkento mosi vandaka kuna ya vuminaka Nzambi, nkumbu ya yandi, Lidia, muteki ya lele ya mpumbu ya mbanza ya Tiatila, yandi kuwaka, ye Mfumu kangulaka ntima ya yandi kubaka mambu ya Paulu tubaka.

¹⁵ Bu yandi imene kubotikwa ye nzo ya yandi, yandi bombidilaka beto, kutuba: Kana beno banza mono imene kukwikila Mfumu ya kieleka, kota mu nzo ya mono ye vanda muna. Yandi kwikidisaka kwenda ku sika ya lombilu beto beto mingi.

Paulu katula mpeve ya mbi, ye yandi tulwa mu boloko

¹⁶ Yo vandaka mpilayai, bu beto kutakanaka na, sielo nkento ya ikele na mpeve ya tuba mambu, yandi bakilaka bamfumu ya yandi ndandu mingi na kindoki ya yandi.

¹⁷ Yandi landaka Paulu ye beto, ye bokaka, kutuba: Bantu yai ikele bampika ya Nzambi Mpungu, bau kwiza kusamuna nzila ya mpulusu.

¹⁸ Yandi salaka mpilayai bilumbu mingi. Kansi Paulu vandaka na ntantu mingi, yandi pindulaka ye tubaka kwa mpeve: Mono tuba kwa nge mu nkumbu ya Yesu Klisto, basika na yandi. Lokula yina yandi basikaka.

¹⁹ Bu bamfumu ya yandi monaka na vuvu ya bau ya ndandu imene kusuka, bau simbaka Paulu ye Sila ye bendaka bau ku zandu kwa bakuluntu. Bis. 19:24, 27

²⁰ Bu bau twalaka bau kwa banyadi, bau tubaka: Bantu yai ya ikele baYuda ikele kusala makelele mingi mu mbanza ya beto, Bis. 17:6; 24:5

²¹ bau songa bifu ya lunga ve ya beto kubaka ye kukeba, beto ya ikele baLoma. Bis. 6:14; 21:21

²² Kibuka bakaka makasi na bau, banyadi katulaka mvwatu ya bau ye sikidikisaka kubula bau na banti.

²³ Bu bau imene kubula bau mingi, bau losaka bau mu boloko, ye songaka nkengi ya boloko kukeba bau mbote.

²⁴ Bu yandi peswa nsikudukusu yina, yandi losaka bau mu katikati ya boloko, ye yandi tulaka makulu ya bau mu minyololo.

²⁵ Kati-kati ya mpimpa Paul ye Sila lombaka ye yimbaka bankunga kwa Nzambi, ye bantu ya boloko kuwaka bau. Bis. 4:31; 5:12

²⁶ Nswalu ndikunu nene ya ntoto vandaka, lufulu ya boloko nikukaka, nswalu mielo yonso kangukaka, minyololo ya bau yonso kangukaka. Bis. 5:19; 12:7

²⁷ Nkengi ya boloko sikamaka na tulu, bu yandi monaka mielo ya boloko ikele kukanguka, yandi bakaka mbele ya yandi ye zolaka kudifwa, kadi yandi banzaka bantu ya boloko imene kutina.

²⁸ Paulu bokaka mu ndinga nene, kutuba: Disadila mpasi ve, kadi beto yonso ikele awa.

²⁹ Yandi lombaka mwinda, ye kotaka nswalu ye zakama sambu na boma, ye kubwaka na makulu ya Paulu ye Sila;

³⁰ ye basisaka bau, ye tubaka: Bamfumu, mono fwiti kusala nki kuvuluswa ? Luk. 3:10; Bis. 2:37

³¹ Bau tubaka: Kwikila Mfumu Yesu Klisto, ye nge tavuluswa, ye nzo ya nge. Yoa. 3:16, 36; 20:31; Bis. 2:38; 15:11

³² Bau tubaka mambu ya Mfumu kwa yandi, ye kwa bau yonso ya vandaka mu nzo ya yandi.

³³ Yandi bakaka bau mu lokula yina ya mpimpa, ye sukulaka bamputa ya bau, nswalu yandi botikwaka, yandi kibeni ye bau yonso ya yandi.

³⁴ Yandi twalaka bau ku nzo ya yandi, ye tulaka madia nantwala na bau, yandi yangalalaka sikamosi na nzo ya yandi yamvimba, sambu na bau imene kukwikila Nzambi.

³⁵ Bu kuma kia, banyadi fidisaka bapolisi, kutuba: Bika bantu yai kwenda.

³⁶ Nkengi ya boloko tubaka mambu yina kwa Paulu: Banyadi imene kufidisa kubika beno kwenda, sambu na yai, basika ye kwenda mu yenge.

³⁷ Paulu tubaka kwa bau: Bau imene kubula beto nantwala na bantu yonso, beto baLoma, bu bau imene kufundisa beto ve, ye bau losaka beto mu boloko, ntangu yai bau zola kubasisa beto mu kinsweki ? Mpilayai ve, kansi bika bau kibeni kwiza kubasisa beto.

³⁸ Bapolisi tubaka mambu yai kwa banyadi. Bau vandaka na boma, bu bau kuwaka bau ikele baLoma.

³⁹ Bau kwizaka ye bombidilaka bau; bu bau imene kubasisa bau, bau lombaka bau kukatuka na mbanza. Mat. 8:34

⁴⁰ Bau basikaka na boloko ye kotaka mu nzo ya Lidia, bu bau monaka bampangi, bau pesaka bau kikesa ye katukaka.