Bisalu Ya Bantumwa 12 - Le Nouveau Testament en Kikwango 1950

Elode zenga ntu ya Yakobi

¹ Ntangu yina, Elode ntinu basisaka maboko ya yandi kumonisa mpasi kwa bankaka ya dibundu.

² Yandi kufwaka Yakobi mpangi ya Yoane na mbele.

Petelo tulwa mu boloko

³ Bu yandi monaka na yo yangidisaka baYuda, yandi simbaka Petelo mpe; kansi yo vandaka bilumbu ya mampa ya konda lufunusu.

⁴ Bu yandi imene kubaka yandi, yandi tulaka yandi mu boloko, ye pesaka yandi kwa ndonga iya ya basoldat, ndonga mosi mosi ikele na basoldat iya iya, sambu na kukenga yandi; yandi banzaka kutulwa yandi kwa bantu nanima na Pake.

⁵ Sambu na yai, Petelo kebwaka mu boloko, kansi dibundu bikaka ve kulomba Nzambi ngolo sambu na yandi.

⁶ Bu ntangu zola kulunga Elode kubasisa yandi, mu mpimpa yina Petelo lalaka nakati basoldat zole, ye kengwa na minyololo zole, ye bankengi vandaka nantwala ya mwelo kukenga boloko.

⁷ Tala, wanjo ya Mfumu telemaka ndambu na yandi ye mwini kienzulaka mu boloko, yandi bulaka Petelo va lubanzi ye sikamisaka yandi, kutuba: Telema nswalu. Minyololo katukaka na maboko ya yandi. Bis. 5:19; 27:23

⁸ Wanjo tubaka kwa yandi: Kanga mukaba ya nge ye vwata nsampatu ya nge. Yandi salaka mpilayina. Wanjo tubaka kwa yandi: Vwata kazaku ya nge ye landa mono.

⁹ Yandi basikaka ye landaka yandi, kansi yandi zabaka ve kana yo ikele kieleka ya wanjo salaka, kansi yandi banzaka yandi monaka mona-meso.

¹⁰ Bu bau imene kuluta nkengi ya ntete ye ya zole, bau kwizaka ku mwelo ya bisengu ya kwenda ku mbanza, yo kibeni kanguka kwa bau; bau basikaka ye luta mu balabala mosi, nswalu wanjo katukaka tuka yandi. Bis. 16:26

¹¹ Bu Petelo toma kuyindula yandi tubaka: Ntangu yai, mono zaba kieleka na Mfumu imene kufidisa wanjo ya yandi kangula mono na maboko ya Elode, ye na mambu yonso ya baYuda vingilaka.

¹² Bu yandi zabaka yo, yandi kwizaka ku nzo ya Malia ngudi ya Yoane ya bingwa Malako mpe, muna bantu mingi kutakanaka kulomba.

¹³ Bu yandi kunkuta na kielo ya lupangu, sielo nkento kwizaka kuwidikila, nkumbu ya yandi Lode.

¹⁴ Bu yandi zabaka ndinga ya Petelo, yandi kangulaka kielo ve sambu na kiese, kansi yandi kotaka nswalu, ye tubaka kwa Petelo ikele kutelema na kielo.

¹⁵ Bau tubaka kwa yandi: Nge ikele kulauka. Kansi yandi bikaka ve kutuba yo ikele kaka mpilayina. Bau tubaka: Yo ikele wanjo ya yandi.

¹⁶ Petelo bikaka ve kunkuta; bu bau kangulaka, bau monaka yandi ye bau yitukwaka mingi.

¹⁷ Kansi yandi labisaka kwa bau na diboko kuvanda napi, yandi songaka bau mpila nki Mfumu basisaka yandi tuka boloko. Yandi tubaka: Songa mambu yai kwa Yakobi ye kwa bampangi. Yandi katukaka ye kwendaka ku sika yankaka.

¹⁸ Bu kuma kia, makelele mingi kwizaka nakati basoldat, bu bau monaka Petelo ve.

¹⁹ Bu Elode sosaka yandi ye monaka yandi ve, yandi yuvulaka bankengi, ye sikidikisaka kufwa bau. Yandi kulumukaka ku Kaisalia tuka Yuda, ye vandaka kuna.

Lufwa ya Elode

²⁰ Elode vandaka na kimbeni kwa bantu ya Tilo ye Sidoni. Bau kwizaka sikamosi kwa yandi, bau kitulaka Blastu kapita ya bima ya ntinu, kwiza nduku ya bau, bau lombaka yenge, kadi ntoto ya bau bakaka madia na ntoto ya ntinu.

²¹ Mu kilumbu ya Elode tulaka, yandi vwataka mvwatu ya ntinu, ye vandaka va kiti ya ntinu, ye tubaka mambu kwa bau.

²² Bantu bokaka: Yai ikele ndinga ya nzambi, ya muntu ve.

²³ Nswalu wanjo ya Nzambi bulaka yandi sambu na yandi pesaka ve nkembo kwa Nzambi, ye banyama kudiaka yandi, ye yandi kufwaka.

Ndinga ya Nzambi kulaka

²⁴ Kansi mambu ya Nzambi kulaka ye mwanganaka. Yes. 55:10; Bis. 6:7; 19:20; Kolo. 1:6

²⁵ Banaba ye Sauli katukaka na Yelusalemi ye vutukaka, bu bau manisaka bisalu ya bau kuna, bau twalaka Yoane ya bingwa Malako. Bis. 11:29; 12:12; 13:5; 15:37