Bisalu Ya Bantumwa 10 - Le Nouveau Testament en Kikwango 1950

Mona mesa ya Konelio

¹ Muntu vandaka mu Kaisalia, nkumbu ya yandi Konelio, nkuluntu ya ndonga ya basoldat ya bingwa ya Italia,

² Nkwa lunungu ya vumina Nzambi ye nzo ya yandi yamvimba, yandi pesaka matabisi mingi ya nkenda kwa bantu, ye lombaka Nzambi ntangu yonso.

³ Yandi monaka mona-meso, mu lokula tatu ya kilumbu, wanjo ya Nzambi kotaka kwa yandi ye tubaka kwa yandi: Konelio.

⁴ Yandi talaka yandi ngolo ye vandaka na boma, ye tubaka: Mambu nki, Mfumu ? Yandi tubaka kwa yandi: Lombilu ya nge ye matabisi ya nge ya nkenda imene kwenda nantwala na Nzambi, sambu kubambuka nge.

⁵ Ntangu yai, fidisa bantu ku Yope, ye twala Simoni ya bingwa Petelo. Yoa. 1:42

⁶ Yandi ikele kuvanda na Simoni ya yidika mikanda ya bambizi, nzo ya yandi ikele mfinama ku mbu.

⁷ Bu wanjo ya tubaka kwa yandi imene kwenda, Konelio bingaka basielo zole ya yandi ye soldat mosi ya vumina Nzambi, mosi ya bau ya sadilaka yandi ntangu yonso.

⁸ Bu yandi imene kutuba kwa bau mambu yonso, yandi fidisaka bau ku Yope.

Mona-mesa ya Petelo

⁹ Kilumbu ya landa, bu bau vandaka mu nzila ye mfinamaka ku mbanza, Petelo tombokaka ku zulu ya nzo kulomba, mfinama lokula ya kumi ye zole.

¹⁰ Yandi vandaka na nzala ye zolaka kudia, kansi bu bau yidikaka madia, yandi monaka monameso; Bis. 11:5

¹¹ yandi monaka zulu kanguka ye kima mpilamosi lele ya nene ya kangwa na nsongi iya, kulumuka va ntoto;

¹² mu yo vandaka bambizi mutindu yonso ya ntoto, ya makulu iya iya, ye bambizi ya dibenda, ye bandeke ya zulu.

¹³ Ndinga tubaka kwa yandi: Petelo, telema kufwa ye kudia.

¹⁴ Petelo tubaka: Mpilayai ve, Mfumu; kansi mono imene kudia kima ya sumuka keti ya mvindu ta mbala mosi ve.

¹⁵ Ndinga vutulaka kutuba kwa yandi mbala ya zole: Yina ya Nzambi imene kuvedisa, tuba ve na yo ikele kusumuka. Mat. 15:11; Mal. 7:2, 15; Lom. 14:14; 1 Tim. 4:4; Tit. 1:15

¹⁶ Mambu yai salwaka mbala tatu, buna kima yina vutukaka ku zulu.

¹⁷ Bu Petelo kubanzaka mingi mu ntima ya yandi, kana monameso ya yandi monaka ikele mpila nki, tala, bantu ya Konelio fidisaka, telemaka na mwelo, kadi bau imene kuyuvula nzila ya nzo ya Simoni. Bis. 11:11

¹⁸ Bau bokaka ye yuvulaka kana Simoni ya bingwa Petelo ikele muna.

¹⁹ Bu Petelo yindulaka monameso, Mpeve tubaka kwa yandi: Tala, bantu ikele kusosa nge. Bis. 8:29

²⁰ Telema, kulumuka ye kwenda kwa bau, ye vanda na ntembe ve, kadi mono imene kufidisa bau.

Petelo kwenda ku Kaisalia

²¹ Petelo kulumukaka kwa bantu yina, ye tubaka: Tala, mono ikele yandi ya beno sosa, beno kwiza sambu na mambu nki ?

²² Bau tubaka: Konelio, nkuluntu ya basoldat, muntu ya lunungu ya vumina Nzambi, ye kikanda yonso ya baYuda ikele kupesa yandi kitemo ya mbote, wanjo ya nlongo tubaka na yandi fidisa kubinga nge ku nzo ya yandi, ye kuwa mambu ya nge.

²³ Mpilayai yandi tubaka na bau kota ye yandi pesaka bau sika ya kulala. Na kilumbu ya landa, yandi telemaka ye kwendaka na bau, bampangi yankaka ya Yope kwendaka na yandi mpe.

²⁴ Kilumbu ya landa, bau kumaka ku Kaisalia, Konelio vingilaka bau, yandi imene kutikisa bampangi ya yandi ye banduku ya yandi.

²⁵ Bu Petelo kotaka, Konelio kutanaka na yandi ye fukamaka na makulu ya yandi ye sambilaka yandi.

²⁶ Kansi Petelo telemisaka yandi, ye tubaka: Telema, mono kibeni ikele muntu mpe. Bis. 14:15

²⁷ Bu yandi solulaka na yandi, yandi kotaka ye monaka bantu mingi imene kukutakana.

²⁸ Yandi tubaka kwa bau: Beno kibeni zaba nsiku buya muntu ya Yuda kuvanda ve sikamosi keti kota mu nzo ya muntu ya kikanda yankaka, kansi Nzambi imene kusonga mono, na mono tabinga muntu mosi sumuka keti mvindu ve. Yoa. 4:9

²⁹ Sambu na yai mono kwizaka na ntembe ve, bu mono bingwaka, Buna mono yuvula; Sambu na nki nge bingaka mono ?

³⁰ Konelio tubaka: Bilumbu iya imene kuluta, lokula yai mono vandaka kulomba mu nzo ya mono mu lokula uvwa, tala, muntu telemaka nantwala na mono mu mvwatu ya kenzima,

³¹ yandi tubaka: Konelio, Nzambi imene kuwa lombilu ya nge, ye matabisi ya nkenda ya nge ikele kubambukwa na luse ya Nzambi.

³² Sambu na yai, fidisa ku Yope ye binga Simoni ya bingwa Petelo; yandi ikele kuvanda mu nzo ya Simoni muyidiki ya mukanda ya bambizi, ikele mfinama kuna mbu.

³³ Nswalu mono fidisaka kwa nge, ye nge imene kusala mbote sambu na nge imene kwiza. Sambu na yai beto yonso ikele awa na luse ya Nzambi na mambu yonso ya Mfumu sikidikisaka nge.

Petelo samuna Klisto

³⁴ Petelo kangulaka munoko ya yandi, ye tubaka: Kieleka, mono zaba Nzambi ikele kutala luse ya muntu ve. 5 Mose 10:17; Lom. 2:11; 1 Pet. 1:17

³⁵ Kansi mu makanda yonso ya bantu, konso ya vumina yandi, ye sala lunungu, Nzambi tabaka yandi.

³⁶ Mambu ya yandi fidisaka kwa bana ya Isaeli, mu samuna ya nsamu mbote ya yenge mu Yesu Klisto, yandi ikele Mfumu ya bantu yonso. Yes. 52:7

³⁷ Beno zaba mambu yai, ya mwanganaka mu Yuda yamvimba, yo yantikaka mu Ngalili nanima na mbotika ya Yoane samunaka. Mat. 4:17; Luk. 23:5

³⁸ Ikele Yesu ya Nazaleti, ya Nzambi sitaka na Mpeve Yanlongo ye na ngolo, yandi zietaka ye salaka mbote ye belulaka bau yonso ya moniswa mpasi ya diable, kadi Nzambi vandaka na yandi.

³⁹ Beto ikele bantemo na mambu yonso ya yandi salaka mu nsi ya baYuda ye Yelusalemi; bau kufwaka yandi bu bau tulaka yandi va nti. Bis. 2:22, 32; 3:15; 5:30; 5 Mose 21:22

⁴⁰ Nzambi fulukisaka yandi mu kilumbu ya tatu ye kumonikisaka yandi. Bis. 2:24, 32

⁴¹ Kwa bantu yonso ve, kansi kwa bantemo ya Nzambi solaka ntete; ikele beto ya kudiaka ye kunwaka sikamosi na yandi bu yandi imene kufulukiswa tuka bafwa. Bis. 13:31

⁴² Yandi sikidikisaka beto kusamuna kwa bantu, ye kutuba kitemo, ya yandi kibeni ikele solwa ya Nzambi kuvanda mfundisi ya bankwa moyo ye bafwa. Bis. 17:31; Lom. 14:10; 2 Kol. 5:10

⁴³ Bambikudi yonso ikele kutuba kitemo na konsonani ya kwikila yandi, masumu ya yandi tavidiswa mu nkumbu ya yandi. Yel. 31:34; Mika 7:18; Bis. 15:9

Konelio kwikilaka ye botamaka

⁴⁴ Bu Petelo ikele kutuba mambu yai, Mpeve Yanlongo kubwaka va bau yonso ya kuwaka mambu yai.

⁴⁵ Bakwikidi ya nzengolo ya kwizaka na Petelo, yitukaka sambu na matabisi ya Mpeve Yanlongo imene kupeswa kwa bapaien mpe,

⁴⁶ kadi bau kuwaka bau tuba mu tudimi yankaka, ye kembisa Nzambi. Buna Petelo vutulaka. Bis. 2:4

⁴⁷ Muntu lenda kubuya masa, na bau yai tabotikwa ve, bau ya imene kubaka Mpeve Yanlongo bonso beto ? Bis. 8:36; 15:8

⁴⁸ Yandi sikidikisaka na bau kubotikwa mu nkumbu ya Yesu Klisto. Buna bau yuvulaka yandi kuvanda na bau bilumbu yankaka.