3 Yoane 1 - Le Nouveau Testament en Kikwango 1950

Yoane fidisa Ngayo mbote

¹ Mbuta ya muntu kwa Ngayo, ya zolwa ya mono zola mu kieleka. 2 Yoa. 1

² Zolwa, mono lomba na ngetavanda mbote mu mambu yonso ye siama mu nitu, bonso mwela ya nge ikele kuvanda mbote.

³ Kadi mono yangalala mingi bu bampangi kwizaka ye tubaka kitemo ya kieleka ikele mu nge, bonso nge ikele kutambula mu kieleka. 2 Yoa. 4

⁴ Kiese luta yai ikele na mono ve, bu mono kuwaka bana ya mono ikele kutambula mu kieleka.

Yoane zitisa yandi sambu na kisalu ya yandi ya mbote

⁵ Zolwa, nge ikele kusala ya kwikama mu mambu yonso ya nge salaka kwa bampangi, ye kwa banzenza mpe.

⁶ Bau tubaka kitemo sambu na zola ya nge nantwala na dibundu. Nge tasala mbote kana nge sindikaka bau ya lunga mu Nzambi.

⁷ Kadi sambu na nkumbu ya yandi bau kwendaka, bau bakaka kima ve ya bapaien.

⁸ Mpilayai beto fwiti kubaka bau ya mpilayai, na beto lenda kuvanda basadi sikamosi sambu na kieleka.

Yoane tuba kwa yandi sambu na Diotelefe

⁹ Mono sonikaka mambu kwa dibundu, kansi Diotelefe ya zola kuvanda ya ntete nakati na bau, yandi bakaka beto ve.

¹⁰ Mpilayai kana mono kwiza, mono tabambukisa bisalu ya yandi ya yandi salaka, bu yandi ikele kutuba mbi sambu na beto mu ndinga ya mbi, kansi yina lunga ve, yandi kibeni ikele kubaka bampangi ve, ye ikele kanikina bau ya zola kubaka bau, ye ikele kukatula bau mu dibundu.

¹¹ Zolwa, landa mambu ya mbi ve, kansi mambu ya mbote, yandi ya sala mbote ikele ya Nzambi; kansi yandi ya sala mbi imene kumona Nzambi ve. Nk. 37:27; Yes. 1:16; 1 Pet. 3:11; 1 Yoa. 3:6, 9

¹² Demetelio ikele na kitemo ya mbote ya bantu yonso ye ya kieleka ye beto mpe ikele kutuba kitemo, ye nge zaba kitemo ya beto ikele ya kieleka.

¹³ Mambu mingi ikele na mono, kusonika kwa nge, kansi mono zola ve kusonika kwa nge na ntinta ye kilapi.

¹⁴ Kansi mono tula vuvu kumona nge ntama ve, buna beto tatubana mu munoko. Yenge kwa nge. Banduku fidisa nge mbote. Pesa mbote kwa banduku muntu na muntu. 1 Pet. 5:14