2 Yoane 1 - Le Nouveau Testament en Kikwango 1950

Landa bansikudukusu ya Klisto

¹ Mbuta ya muntu kwa mfumu nkento ya zolwa ye kwa bana ya yandi, ya mono zola mu kieleka, mono kaka ve, kansi bau yonso ya zaba mambu ya kieleka.

² Sambu na mambu ya kieleka ya ikele kuvanda mu beto, ye yau tavanda na beto mvu ya mvu.

³ Nlemvo ye nkenda ye yenge tuka Nzambi, Tata, ye tuka Yesu Klisto, Mwana ya Tata, tavanda na beto mu kieleka ye zola. 1 Tim. 1:2

⁴ Mono yangalala mingi, bu mono kutaka bana ya nge tambula mu kieleka, bonso beto bakaka nsikudukusu ya Tata. 1 Kol. 13:6

⁵ Ntangu yai mono bombidila nge mfumu nkento, ikele ve bonso mono sonikaka nge nsikudukusu yampa, kansi yina ya vandaka na beto tuka luyantiku, na beto zolana. 1 Yoa. 2:7; 3:11; 4:21

⁶ Yai ikele zola, na beto fwiti kutambula mu bansikudukusu ya yandi; nsikudukusu ikele yai, bonso beto kuwaka tuka luyantiku, beno fwiti kutambula mu yo. 1 Yoa. 2:7

⁷ Kadi bakusi mingi imene kukota mu nsi, bau ya ndima ve, Yesu Klisto kwizaka mu nsuni. Yai ikele mukusi ye antiklisto. 1 Yoa. 2:18; 4:1

⁸ Beno tomatala na beno vidisa ve yina ya beno salaka, kansi na beno baka nsendo ya lunga.

⁹ Konsonani ya ikele kwenda nantwala ye ikele kuvanda ve mu malongi ya Klisto, yandi ikele na Nzambi ve; kansi yandi ya ikele kuvanda mu malongi ya Klisto ikele na Tata ye Mwana. Yoa. 14:23

¹⁰ Kansi kana muntu kwiza kwa beno ye twala malongi yina ve, beno baka yandi ve mu nzo ya beno, ye pesa yandi mbote ve. Lom. 16:17; Tit. 3:10

¹¹ Kadi yandi ya pesa yandi mbote ikele kintuadi mu bisalu ya yandi ya mbi.

¹² Mono ikele na mambu mingi kusonika kwa beno, mono zola ve sonika na nkanda ye ntinta, kansi mono tula vuvu na kwiza kwa beno ye tubana mu munoko, na kiese ya beno lenda kulunga. 1 Yoa. 1:4; 3 Yoa. 13

¹³ Bana ya bampangi ya nge ya solwa fidisa nge mbote.