2 Timoteo 4 - Le Nouveau Testament en Kikwango 1950

Paulu sikidikisa Timoteo kumanisa kisalu ya yandi

¹ Mono sikidikisa nge nantwala na Nzambi ye Klisto Yesu, ya tafundisa bamoyo ye bafwa, mu kumonika ya yandi ye mu kimfumu ya yandi: 1 Tim. 2:1; Tit. 2:13

² Samuna mambu, vibidila mu ntangu ya lunga, ye mu ntangu ya lunga ve, semba, songa mbi, bombidila mu nlembami yonso ye malongi. 2 Tim. 2:25

³ Kadi ntangu takwiza bu bau tavibidila ve malongi ya kieleka, kansi sambu na bau ikele na mfisima mu makutu ya bau, bau tadisodila banlongi ya mbi mu luzolo ya bau ya mbi.

⁴ Bau takatula makutu ya bau tuka kieleka, ye tula yau kwa mambu ya mpamba. 1 Tim. 1:4; 4:7

⁵ Kansi nge, vanda ya lunga mu mambu yonso, vibidila mu mpasi, sala kisalu ya nsamuni ya nsamu mbote, manisa kisielo ya nge. 2 Tim. 1:8; 2:3

⁶ Kadi mono imene kutulwa va zikwa bonso nkailu, ntangu ya nkatukulu ya mono imene kwiza.

⁷ Mono imene kunwana ndwanunu ya mbote, mono imene kumanisa kitezo ya mono ya ntinu, mono imene kukeba lukwikilu. 1 Kol. 9:24; Fili. 3:14; 1 Tim. 6:12; Eb. 12:1

⁸ Ntangu yai koloa ya lunungu ikele kulundwa sambu na mono, Mfumu, mfundisi ya lunungu tapesa yo kwa mono mu kilumbu yina, kwa mono kaka ve, kansi kwa bau yonso ya zola kuvutuka ya yandi. 1 Kol. 9:25; Yak. 1:12; 1 Pet. 5:4

Paulu binga yandi kwisa ku Loma

⁹ Tula ngolo kwiza kwa mono nswalu.

¹⁰ Kadi Dema bikaka mono, sambu na yandi zolaka mambu ya nsi yai, ye yandi kwendaka ku Tesalonika; Kleske kwendaka ku Ngalatia; Tito kwendaka ku Dalamatia. Kolo. 4:14

¹¹ Luka kaka ikele na mono. Baka Malako, ye twala yandi sikamosi na nge, kadi yandi lunga mbote kwa mono mu kisielo.

¹² Mono fidisaka Tikiko ku Efeso.

¹³ Kazaku ya mono bikaka na Kalapo mu Toloa, bu nge kwiza, twala yo ye minkanda mpe, kansi luta, yindula masonukwa mu mikanda ya mbizi.

¹⁴ Alesandelo, musadi ya bisengu, sadilaka mono mbi mingi. Mfumu tafuta yandi bonso bisalu ya yandi.

¹⁵ Nge dikeba sambu na yandi, kadi yandi buyaka mambu ya beto ngolo.

¹⁶ Mu kutuba ya mono ya ntete, muntu mosi sadisaka mono ve, kansi yonso bikaka mono, bika yo tangwa kwa bau ve.

¹⁷ Kansi Mfumu telemaka sikamosi na mono, ye siamisaka mono, na nsamunu lenda kuzabiswa ndambu yonso, sambu na mono, ye na bapaien yonso lenda kuwa, na mono vuluswaka na munoko ya nkosi.

¹⁸ Mfumu tavulusa mono tuka bisalu yonso ya mbi, ye tavulusa mono ku kimfumu ya yandi ya zulu; kwa yandi nkembo ya mvu ya mvu. Amen. 2 Tim. 3:11

Mfidisilu ya mbote

¹⁹ Pesa mbote kwa Pliska ye Akila ye nzo ya Onesifolo.

²⁰ Elasto bikaka mu Kolinto, kansi mono bikaka Tolofimo mu Mileto namaladi.

²¹ Tula ngolo nakwiza ntete na nsungi ya madidi. Eubolo fidisa nge mbote, ye Pude, ye Lino, ye Klaudia, ye bampangi yonso.

²² Mfumu vanda na mpeve ya nge. Nlemvo vanda na nge. Fili. 4:23; File. 25