2 Timoteo 2 - Le Nouveau Testament en Kikwango 1950

Paulu zola Timoteo kuvibidila mu kisalu ya Mfumu

¹ Nge mwana ya mono, siamiswa mu nlemvo, ya ikele mu Klisto Yesu.

² Ye mambu yonso ya nge kuwaka tuka mono nakati na bantemo mingi, pesa yau kwa bantu ya kwikama, bau ya lenda kulonga bankaka mpe.

³ Nge fwiti kumona mpasi sikamosi na mono, bonso soldat ya mbote ya Klisto Yesu. 2 Tim. 1:8; 4:5

⁴ Soldat ya ikele kunwana ikele kukutana ve mu mambu ya moyo yai, na yandi lenda kuyangidisa yandi ya sonikaka yandi mu kisalu ya soldat.

⁵ Mpiliyai mpe, kana muntu teza ntinu, yandi lenda kubaka koloa ve, kana yandi teza ntinu ve bonso ikele mu nsiku. 1 Kol. 9:24

⁶ Musadi ya dilanga ya ikele kusala, tabaka ntete ndambu ya mabundu.

⁷ Yindula mbote mambu ya mono ikele kutuba, ye Mfumu tapesa nge ngangu mu mambu yonso.

⁸ Bambuka Yesu Klisto, nkuna ya Davidi, ya fulukiswaka na bafwa, mpilamosi ikele mu nsamu mbote ya mono. Bis. 2:30; 13:22; Lom. 1:3; 1 Kol. 15:12

⁹ Sambu na mambu yai, mono ikele kumona mpasi ti minyololo, bonso musadi ya mambu ya mbi, kansi ndinga ya Nzambi ikele ya kanga ve.

¹⁰ Mpilayai, mono ikele kuvibidila mambu yonso sambu na basolwa, na bau mpe lenda kubaka mpulusu mu Klisto Yesu, ye nkembo ya mvu ya mvu.

¹¹ Yai ikele mambu ya kwikama: Kana beto kufwaka sikamosi 2:1-20 na yandi, beto tavanda na moyo mpe sikamosi na yandi. Lom. 8:17; 2 Kol. 4:10; 1 Tim. 4:9; 1 Pet. 4:13

¹² Kana beto vibidila, beto tayala sikamosi na yandi mpe; kana beto buya yandi, yandi tabuya beto mpe. Mat. 10:33; Luk. 9:26; 12:9; Lom. 8:17

¹³ Kana beto konda kwikama, yandi ikele ya kwikama, yandi lenda kudibuya ve. 4 Mose 23:19; Lom. 3:3; 9:6

Kutina malongi ya ikele kuvidisa bantu

¹⁴ Bambukisa bau sambu na mambu yai, sikidikisa bau nantwala na Mfumu, na bau nwanana ve sambu na ndinga ya ikele kusadisa ve, ye ya ikele kuvengumuna bawi ya yau. 1 Tim. 6:4

¹⁵ Sala ngolo kudisonga ya lunga kwa Nzambi, musadi ya tamona nsoni ve, ye tendula mbote mambu ya kieleka.

¹⁶ Kansi buya bituba-tuba ya nsoni, kadi bau taluta kwenda ku kondwa ya vumi ya Nzambi, 1 Tim. 1:4; 4:7; 6:20; 2 Tim. 3:13; Tit. 1:14; 3:9

¹⁷ ye ndinga ya bau takudia bonso mputa yasanda, bankaka ya bau ikele Imenai ye Fileto. 1 Tim. 1:20

¹⁸ Bau ikele bantu ya vengumukaka sambu na mambu ya kieleka, bau ikele kutuba mfulukulu imene kuluta, ye ikele kufwa lukwikilu ya bankaka. 1 Tim. 6:21

¹⁹ Kansi lufulu ya ngolo ya Nzambi ikele kutelema, yo ikele na kidimbu yai; Mfumu zaba bantu ya yandi, ye konso muntu ya binga nkumbu ya Mfumu fwiti kudikatula na mambu ya konda lunungu.

²⁰ Mu nzo ya nene, ikele kaka wumbwa ya wola ye ya palata ve, kansi ya nti ye ya ntoto mpe, yankaka ikele ya nzitusu, ye yankaka ikele ya nzitusu ve.

²¹ Mpilayai, kana muntu disukula na mambu yai, yandi tavanda wumbwa ya nzitusu, ya nlongo ye ya lunga mu kisalu ya Mfumu, mpe ya yidikwa kwa bisalu yonso ya mbote. 2 Kol. 6:17; 2 Tim. 3:17

²² Tina luzolo ya mbi ya kinleke, ye landa lunungu, lukwikilu, zola ye yenge sikamosi na bau ya bombidila Mfumu mu ntima ya vedila. 1 Tim. 6:11

²³ Kansi, tina biuvu ya buzoba ye ya konda ngangu, sambu na nge zaba yau ikele kubasisa kunwana. 1 Tim. 4:7

²⁴ Sielo ya Mfumu fwiti kunwana ve, kansi kuvanda nlembami kwa bantu yonso, ye zaba kulonga, ye vibidila, Tit. 1:7, 9

²⁵ mu nlembami, longa bantu ya dilembwisa, kana Nzambi tapendudisa mintima ya bau kwa ngangu ya kieleka,

²⁶ na bau lenda kudibasisa na siongi ya diable, ya bakaka bau kusala luzolo ya yandi.