2 Timoteo 1 - Le Nouveau Testament en Kikwango 1950

Luyantiku

¹ Paulu, ntumwa ya Yesu Klisto, mu luzolo ya Nzambi, bonso nsilulu ya moyo ya ikele mu Klisto Yesu, 2 Kol. 1:1

² kwa Timoteo, mwana ya mono ya zolwa: Nlemvo, nkenda ye yenge tuka Nzambi, Tata, ye Klisto Yesu, Mfumu ya beto. 1 Tim. 1:2

Matondo

³ Mono pesa Nzambi matondo, ya mono ikele kusadila tuka batata ya mono mu kansansa ya vedila; mono bika ve kubambuka nge, mu lombilu ya mono, npimpa ye ntangu Bis. 23:1; 24:14; Lom. 1:9; Ef. 1:16; Fili. 1:3; 1 Tes. 1:2

⁴ Mono tonda mingi kutala nge; ye mono ikele kubambuka mansanga ya nge, na mono lenda kufuluka na kiese,

⁵ bu mono bambuka lukwikilu ya kieleka ya ikele mu nge, ya vandaka ntete mu nkaka ya nge, Loisi, ye mu ngudi ya nge Eunike; ye mono ikele na vuvu, na yo ikele mu nge mpe. Bis. 16:1

Yandi longa Timoteo vanda kikesa

⁶ Sambu na yai, mono bambukisa nge kulemisa matabisi yai ya Nzambi, ya ikele mu nge, sambu na ntululu ya maboko ya mono.

⁷ Kadi, Nzambi pesaka beto ve mpeve ya kutita, kansi ya ngolo ye ya zola ye ya mabanza mbote.

⁸ Sambu na yai, vanda na nsoni ve sambu na kitemo ya Mfumu ya beto, keti sambu na mono, muntu ya yandi ya boloko, kansi nata mpasi ya nsamu mbote, bonso ikele ngolo ya Nzambi.

⁹ Yandi ya vulusaka beto, ye bingaka beto mu mbokolo ya nlongo, ikele ve sambu na bisalu ya beto, kansi sambu na makani ya yandi, ye nlemvo ya peswaka kwa beto, mu Klisto Yesu, ntete nsi yantikaka. Lom. 9:11; Ef. 1:4; Tit. 3:4

¹⁰ Kansi ntangu yai, yandi imene kumoniswa mu kumonika ya Mvulusi ya beto Klisto Yesu, yandi manisaka lufwa, ye twalaka moyo, ye konda ya lufwa, kwa mwini mu nsamu mbote. Lom. 16:25; Kolo. 1:26; Eb. 2:14

¹¹ Sambu na yo, mono tulwaka nsamuni ye ntumwa ye nlongi. Ngal. 2:7; Ef. 3:8; 1 Tim. 2:7

¹² Sambu na mambu yai, mono moniswa mpasi; kansi mono ikele na nsoni ve, kadi mono zaba yandi ya mono kwikilaka, ye mono zaba kieleka, na yandi lenda kukeba yina ya mono pesaka kwa yandi, ti kilumbu yina. Ef. 3:1, 13

¹³ Keba kifwani ya ndinga ya mbote, ya nge kuwaka tuka mono, mu lukwikilu ye zola ya ikele mu Klisto Yesu. 2 Tim. 3:14; 4:3

¹⁴ Kima yina ya mbote, ya peswaka kwa nge, keba yo mbote mu Mpeve Yanlongo, ya ikele kuvanda mu beto. Lom. 8:11; 1 Tim. 6:20

Onesifolo zitiswa

¹⁵ Nge zaba yai, na bantu yonso ya vanda mu Asia imene kubika mono, Fingelo ye Elemongene ikele nakati na bau.

¹⁶ Bika Mfumu pesa nkenda kwa nzo ya Onesifolo; kadi yandi sadilaka mono mbala mingi, yandi vandaka na nsoni ve sambu na minyololo ya mono. 2 Tim. 4:19

¹⁷ Kansi bu yandi vandaka mu Loma, yandi sosaka mono ngolo ye monaka mono.

¹⁸ Bika Mfumu pesa yandi kumona nkenda mu kilumbu yina, ye mu mambu mingi yandi sadilaka mono mu Efeso, nge zaba yo mbote yonso. Mat. 5:7