2 Tesalonika 3 - Le Nouveau Testament en Kikwango 1950

Lomba ye sala

¹ Buna, bampangi, lomba sambu na beto, na mambu ya Mfumu lenda kwenda ntinu ye kembiswa, bonso yo ikele mu beno mpe, Ef. 6:18; Kolo. 4:3; 1 Tes. 5:25

² na beto lenda kuvuluswa na bantu ya konda ngangu ye ya mbi, kadi bantu yonso ve ikele na lukwikilu. Lom. 15:30

³ Mfumu ikele kukwikama, yandi sikidika beno ye keba beno tuka na nkwa mbi. Yoa. 17:15; 1 Kol. 1:9; 10:13; 1 Tes. 5:24

⁴ Kansi beto ikele na vuvu mu Mfumu sambu na beno, na beno ikele kusala ye tasala mambu ya beto sikidikisa beno. 2 Kol. 7:16; Ngal. 5:10

⁵ Bika Mfumu sungika mintima ya beno ku zola ya Nzambi ye ku mvibidilu ya Klisto.

⁶ Bampangi, beto sikidikisa beno mu nkumbu ya Mfumu ya beto Yesu Klisto, na beno dikatula na konso mpangi ya ikele kutambula mbote ve, ye tambula ve mu nsiku nkulu ya bambuta, ya bau bakaka na beto. Lom. 16:17; 1 Kol. 5:11; Tit. 3:10; 2 Yoa. 10

⁷ Kadi beno kibeni zaba, bonso beno fwiti kulanda beto, kadi beto tambulaka mbote nakati na beno, 1 Kol. 11:1; 1 Tes. 1:6; 2:10

⁸ beto mpe kudiaka mampa ya muntu mpamba ve, kansi mu kisalu ye mpasi beto salaka mu mpimpa ye ntangu, na beto tatula kizitu va mosi ya beno ve. Bis. 18:3; 20:34; 1 Kol. 4:12; 2 Kol. 11:9; 12:13; 1 Tes. 2:9

⁹ Yo ikele ve sambu na beto konda nzila, kansi kudisala bonso kifwani kwa beno, na beno talanda beto. 1 Kol. 4:16; 11:1; Fili. 3:17

¹⁰ Kadi bu beto vandaka na beno mpe, beto sikidikisaka beno yai: Kana muntu zola kusala ve, yandi kudia mpe ve.

¹¹ Kadi beto kuwa na bankaka ikele kutambula mbote ve nakati beno, bau ikele kusala tafioti ve, bau dikotisa mu mambu ya bantu yankaka.

¹² Bau ya ikele mpilayai, beto sikidikisa ye bombidila mu Mfumu Yesu Klisto, na bau sala kisalu ye vanda napi, ye kudia madia ya bau kibeni. Ef. 4:28; 1 Tes. 4:11

¹³ Beno, bampangi, lembwa ve mu kisalu ya mbote. Ngal. 6:9

¹⁴ Kana muntu lemvuka ve ndinga ya beto mu nkanda yai, tala muntu yina; ye vanda na yandi ve, na yandi lenda kumona nsoni. Mat. 18:17; 1 Kol. 5:11

¹⁵ Kansi tanga yandi ve bonso mbeni, kansi longa yandi bonso mpangi.

Mfidisilu ya mbote

¹⁶ Bika Mfumu ya yenge, yandi kibeni pesa beno yenge ntangu yonso mu mambu yonso. Mfumu vanda na beno yonso. 1 Tes. 5:23

¹⁷ Peswa ya mbote ya mono Paulu ikele kusonika na diboko ya mono mosi, yo ikele kidimbu mu minkanda yonso, bonso mono sonika. 1 Kol. 16:21; Kolo. 4:18

¹⁸ Bika nlemvo ya Mfumu ya beto Yesu Klisto vanda na beno yonso.