2 Tesalonika 2 - Le Nouveau Testament en Kikwango 1950

Mvutukulu ya Klisto ye mbombodolo na kuvanda na ngangu

¹ Bampangi, sambu na kwiza ya Mfumu ya beto Yesu Klisto ye kutakana ya beto kwa yandi, beto bombidila beno,

² na beno tanikunwa nswalu ve mu mabanza ya beno, keti kutita, sambu na mpeve, keti mu mambu, keti mu nkanda, bonso yo katuka na beto, bonso lumbu ya Mfumu imene kwiza. Mat. 24:6; 1 Tes. 5:2

³ Bika muntu kusa beno na kima mosi ve, kadi yo takwiza ve ti bantu mingi imene kukatuka na mambu ya Nzambi, ye muntu yina ya masumu, mwana ya lufwa imene kumonikiswa, Mat. 24:23; 1 Tim. 4:1; 1 Yoa. 2:18

⁴ yandi ya nwana ye ditombola va zulu na bima yonso ya bingwa Nzambi, ye ya bantu ikele kusambila, ye vanda mu tempelo ya Nzambi ye disonga bonso Nzambi.

⁵ Beno bambuka ve na mono tubaka kwa beno mambu yai bu mono vandaka na beno ?

⁶ Ntangu yai beno zaba yina ya kanga yandi nzila, na yandi lenda kumonikiswa mu ntangu ya yandi kaka.

⁷ Kadi mambu ya kinsweki ya kufwa nsiku ikele kusala, ti na yandi ya kanga nzila imene kukatulwa.

⁸ Buna nkwa kufwa nsiku tamonikiswa, ikele yandi ya Mfumu Yesu takufwa na mupepe ya munoko ya yandi, ye kufwa yandi mu monika ya kwiza ya yandi;

⁹ yandi takwiza mu ngolo ya Satana, mu ngolo yonso ye bidimbu ye banyitukulu ya luvunu Mat. 24:24

¹⁰ ye mu luvunu yonso ya konda lunungu kwa bau ya vila, sambu na bau bakaka ve zola ya kieleka na bau lenda kuvuluswa. 2 Kol. 2:15; 4:3

¹¹ Sambu na yai Nzambi tafidisa bau luvengumuni ya nene, na bau takwikila luvunu, Lom. 1:21, 24; 1 Tim. 4:1

¹² na bau yonso ya kwikilaka kieleka ve, kansi bau zolaka konda lunungu, bau tafundiswa. Lom. 1:18, 32

Bau ya kwikila bediswa na bau vanda ngolo mu mambu ya bau bakaka

¹³ Bampangi, yazolwa kwa Mfumu, beto fwiti kupesa matondo kwa Nzambi ntangu yonso sambu na beno, kadi Nzambi solaka beno tuka luyantiku mu mpulusu mu sala nlongo ya Mpeve ye mu lukwikilu ya kieleka, 5 Mose 33:12; 1 Tes. 1:4; 2 Tes. 1:3; 1 Pet. 1:2

¹⁴ yandi bingaka beno mu nsamu mbote ya beto, kubaka nkembo ya Mfumu ya beto Yesu Klisto.

¹⁵ Sambu na yai, bampangi, telema ngolo ye simba nsiku nkulu ya bambuta, ya beno longwaka, keti na ndinga ya beto keti na nkanda ya beto. 1 Tes. 3:8

¹⁶ Yandi kibeni, Mfumu ya beto Yesu Klisto, ye Nzambi Tata ya beto, ya zolaka beto mu nlemvo, ye pesaka beto mbombolo ya mvu ya mvu ye vuvu ya mbote,

¹⁷ bika yandi bomba mintima ya beno; sikidika yau mu kisalu mbote yonso ye mambu. 1 Tes. 3:13