2 Petelo 3 - Le Nouveau Testament en Kikwango 1950

Mbungulu ya nsi yai

¹ Bazolwa, yai ikele nkanda ya zole ya mono sonika kwa beno, mu yo zole mono sikimisa mabanza ya beno ya vedila, kubambukisa beno. 2 Pet. 1:13

² na beno tabambuka mambu ya tubwaka ntete mu bambikudi ya nlongo ye nsikudukusu ya Mfumu ye Mvulusi mu bantumwa ya beno.

³ Beno zaba yai ntete, mu bilumbu ya nsuka baseki takwiza mu kuseka ye tambula mu luzolo ya bau ya nsuni, kutuba: 1 Tim. 4:1; 2 Tim. 3:1; Yud. 18

⁴ Nsilulu ya kwiza ya yandi ikele wapi ? kadi tuka kilumbu ya batata lalaka tulu, bima yonso ikele kuvanda bonso yau vandaka tuka luyantiku ya nsemono. Yel. 17:15; Yeh. 12:22

⁵ Kadi bau zola kuvila yai, na ntangu ya nkulu mazulu vandaka ye ntoto basikaka na masa ye ikele nakati mu masa, mu mambu ya Nzambi.

⁶ Mu yau nsi ya vandaka ntangu yina fukwaka na masa ye kufwaka. 1 Mose 7:1

⁷ Kansi mazulu ye ntoto ya ikele ntangu yai, na ndinga yina mosi ikele kukebwa sambu na tiya, ye ikele kulundwa ti kilumbu ya mfundusu ye mbungulu ya bantu ya konda vumi ya Nzambi. Yes. 51:6; 2 Tes. 1:7

⁸ Kansi vila ve kima yai mosi, bazolwa, na kilumbu mosi ikele kwa Mfumu bonso mvu funda, ye mvu funda ikele bonso kilumbu mosi.

⁹ Mfumu ikele kuvila ve nsilulu ya yandi, bonso bantu ikele kutanga kuvila; kansi ikele na mvibidilu sambu na beno, yandi zola ve muntu mosi vila, kansi na yonso pindula mabanza ya bau. Yes. 30:8; Hab. 2:3; Eb. 10:37; 1 Pet. 3:20

Mvutukulu ya Klisto

¹⁰ Kansi kilumbu ya Mfumu takwiza bonso mwivi, bu kilumbu yina mazulu tavila na makelele ya nene, ye bima ya mazulu tamana mu tiya ya ngolo ye ntoto ye bisalu ya ikele muna tayokwa. Nk. 102:27; Mat. 24:35, 43; 1 Tes. 5:12

¹¹ Sambu na beto mona, na bima yai yonso tamana, buna beto fwiti kuvanda bantu mutindu nki, mu bisalu yanlongo ye vumi ya Nzambi ?

¹² Beno vingila ye zola mingi kwiza ya kilumbu ya Nzambi, sambu na yo mazulu tayokwa ye tamana, ye bambwetete ya zulu tamana mu tiya ya ngolo. Luk. 12:36; 2 Tes. 1:8; Tit. 2:13

¹³ Kansi bonso nsilulu ya yandi, beto ikele kuvingila mazulu yampa ye ntoto yampa, mu yau ikele kuvanda lunungu. Yes. 65:17; 66:22; Nzai. 21:1

Vanda ya banlongo ye kula mu nlemvo

¹⁴ Sambu na yai, bazolwa, sambu na beno ikele kuvingila mambu yai, tula ngolo na beno lenda kumonwa mu yenge, ye konda tona ye konda mvindu, na luse ya yandi. 1 Kol. 1:8; Fili. 1:10; 1 Tes. 3:13; 5:23

¹⁵ Ye tanga na mvibudulu ya Mfumu ya beto ikele mpulusu, bonso Paulu mpe mpangi ya beto zolwa sonikaka kwa beno, mu ngangu ya peswaka kwa yandi.

¹⁶ Mpilayai mpe mu minkanda yonso ya yandi, yandi tubaka sambu na mambu yai, mu yau mambu yankaka ikele mpasi na kuzaba, ya bantu ya konda ngangu ye ya ntembe ikele kubuya, bonso bau kusala na masonukwa yankaka mpe, ku mbungulu ya bau kibeni.

¹⁷ Sambu na yai, beno bazolwa, sambu na beno zaba mambu yai ntete, beno dikeba, na beno natwa ve na luvunu ya bankwa mbi, ye kubwa tuka nsiamunu ya beno.

¹⁸ Kansi kula mu nlemvo ye nzailu ya Mfumu ya beto ye Mvulusi Yesu Klisto. Kwa yandi nkembo ntangu yai ye mvu ya mvu. Amen.