2 Petelo 2 - Le Nouveau Testament en Kikwango 1950

Ndongisilu sambu na kutina balongi ya luvunu

¹ Kansi bambikudi ya luvunu mpe telemaka nakati na bantu, bonso balongi ya luvunu tatelema nakati na beno mpe, mu kinsweki bau takotisa malongi ya mbi ya mbivisu, kubuya mpe Mfumu ya sumbaka bau, bau ditula ndola nswalu 5 Mose 13:1; Mat. 24:11; Bis. 20:29; 1 Kol. 11:19; 1 Tim. 4:1; 2 Tim. 3:5; Yud. 4, 18

² Mingi talanda mu banzila ya bau ya mbi; sambu na bau, nzila ya kieleka tatubwa mbi.

³ Mu zola ya bima, bau tabaka ndandu sambu na beno mu ndinga ya mayele, mfundusu ya bau tuka ntama tavingila ve, ye lufwa ya bau ikele kulala tulu ve.

⁴ Kadi kana Nzambi vulusaka banjo ve, bu bau salaka masumu, kansi losaka bau mu bilungi, ye tulaka bau mu minyololo ya tombe, kulundwa ku mfundusu. Yud. 6; Nzai. 20:2

⁵ Ye vulusaka ve nsi ya vandaka ntama, kansi kebaka Noa, nsamuni ya lunungu, ye bantu nsambwadi yankaka, bu yandi fidisaka nkuka ya masa va nsi ya konda kuvumina Nzambi. 1 Mose 7:1; 1 Pet. 3:20

⁶ Yandi kitulaka bambanza ya Sodoma ye Ngomola, putulu, ye bedisaka bau ku lufwa, ye tulaka bau kifwani kwa bau ya kondo kuvumina Nzambi mu ntangu ya landa. 1 Mose 19:1; Yud. 7

⁷ Kansi yandi vulusaka Loti, nkwa lunungu, bu yandi moniswaka mpasi na bisalu ya nsoni ya bantu ya mbi.

⁸ Kadi bu nkwa lunungu vandaka nakati na bau, yandi moniswaka mpasi lumbu na lumbu mu mwela ya yandi ya lunungu, bu yandi monaka ye kuwaka bisalu ya bau ya mbi.

⁹ Mfumu zaba kuvulusa bantu ya vumina Nzambi tuka mpukumunu, ye lunda bankwa konda lunungu nansi ya ndongi ti lumbu ya mfundusu.

¹⁰ Kansi ya luta kwa bau ya tambula mu nsuni, mu luzolo ya nsuni ya nsoni, ye ikele kusaula luyalu. Bankwa ntu ngolo, lulendo, bau tita ve kufinga bankwa nkembo. Yud. 8

¹¹ Kansi banjo ya luta mu nene ye ngolo, nata ve mfundusu ya mafingu sambu na bau nantwala ya Mfumu.

¹² Kansi bayai ikele bonso bantu ya konda mabanza, bau butukaka bonso mbizi kubakwa ye kufwa, bau ikele kufinga mu mambu ya bau konda kuzaba, mu mbivisu ya bau, bau takufwa.

¹³ Bau tabaka nsendo sambu na kisalu ya mbi ya bau. Bau mona kiese kukolwa kilumbu na kilumbu. Bau ikele matona ye mvindu, bau ikele kukolwa mu luvunu ya bau, bu bau kudia ye kunwa na beno.

¹⁴ Meso ya bau ikele kufuluka na bizumba ye bau lenda ve kubika masumu, ye ikele kukusa miela ya lebakana, mintima ya bau fuluka na zola ya bima. Bau ikele bana ya ndola.

¹⁵ Bau bikaka nzila ya nsungama ye vilaka ye landaka nzila ya Balami, mwana ya Bosoli, ya zola nsendo ya konda lunungu. 4 Mose 22:1; Yud. 11

¹⁶ Kansi yandi sembwaka sambu na mbi ya yandi; mpunda ya baba tubaka mu ndinga ya muntu, ye bikisaka makasi ya mbikudi. 1 Mose 22:23

¹⁷ Bau ikele banto ya konda masa ye matuti ya natwa na kitembo, kwa bau imene kulundwa tombe ya ndombe. Yud. 13

¹⁸ Kadi bu bau tuba mambu nene ya lulendo ye kusa mu luzolo ya nsuni ye mu bizumba bau ya ikele kudikatula tuka bau ya vanda mu luvengumuni. Yud. 16

¹⁹ Bau silaka bau kimpwanza, bu bau kibeni ikele bampika ya mbivisu, kadi konso ya lutwa muntu kwa, yandi ikele mpika ya yo. Yoa. 8:34; Lom. 6:16

²⁰ Kadi kana bu bau imene kukatuka na mambu ya sumuka ya nsi mu nzailu ya Mfumu ye Mvulusi Yesu Klisto, bau ikele kukanga mu yau diaka ye lutwa ngolo, buna nsuka ya bau luta mbi na luyantiku ya bau. Mat. 12:45; Eb. 6:4

²¹ Kadi yo lutaka mbote kana bau zabaka ve nzila ya lunungu, na bau zaba yo ye tula nima ya bau ku nsikudukusu ya nlongo ya peswaka kwa bau. Luk. 12:47

²² Mambu kwizaka kwa bau bonso kingana ya kieleka: Mbwa vutuka ku biluku ya yandi ye ngulu ya yobilaka kulala mu potopoto. Bing. 26:11