2 Petelo 1 - Le Nouveau Testament en Kikwango 1950

Luyantiku

¹ Simoni Petelo, sielo ye ntumwa ya Yesu Klisto, Fidisa mbote kwa bau ya imene kubaka lukwikilu ya ntalu mutindu mosi na beto mu lunungu ya Nzambi ya beto ye Mvulusi Yesu Klisto.

² Bika nlemvo ye yenge kwiza mingi kwa beno mu nzailu ya Nzambi ye Yesu Mfumu ya beto. 1 Pet. 1:2

Bombidila ye tambula ya longa

³ Kadi ngolo ya yandi ya kinzambi imene kupesa beto mambu yonso ya lunga na moyo ye vumi ya Nzambi, mu nzailu ya yandi ya bingaka beto mu nkembo ya yandi ye mbote ya yandi.

⁴ Mu yau yandi imene kupesa beto bansilulu ya yandi ya nene mingi ye ya ntalu, buna mu yau beno lenda kuvanda na kintuadi ya moyo ya kinzambi, sambu na beno imene kutina mbivisu ya ikele mu nsi, mu luzolo ya nsuni. 2 Kol. 3:18; 1 Yoa. 3:2

⁵ Sambu na yai, tula ngolo yonso, mu lukwikilu ya beno tula mambu ya mbote, mu mambu ya mbote tula nzailu,

⁶ mu nzailu tula kudiyala, mu kudiyala tula mvibudulu, mu mvibudulu tula vumi ya Nzambi,

⁷ mu vumi ya Nzambi tula zola kwa kimpangi, mu zola kwa kimpangi tula zola.

⁸ Kadi kana mambu yai yonso ikele na beno ye ikele mingi, beno tavanda bumolo ve ye konda mabundu ve mu nzailu ya Mfumu ya beto Yesu Klisto.

⁹ Kadi yandi ya konda mambu yai ikele mpofo, yandi tala kaka yina ya ikele mfinama, ye imene kuvila na yandi vediswaka tuka masumu ya yandi ya ntama. 1 Yoa. 2:9, 11

¹⁰ Mpilayai bampangi, tula ngolo ya luta, kusala mbokolo ya beno ye nsodolo ya beno kwiza ya kieleka, kadi kana beno sala mambu yai, beno lenda kuta sakuba ve.

¹¹ Kadi mpilayai, beno tapeswa nkotolo ya mbote mingi mu kimfumu ya mvu ya mvu ya Mfumu ya beto ye Mvulusi Yesu Klisto.

¹² Sambu na yai, mono tabambukisa beno ntangu yonso sambu na mambu yai, mpe kana beno zaba yau, ye ikele kuvanda mu kieleka, ya ikele na beno.

Mambu ya Nzambi ikele kieleka

¹³ Kansi mono banza yo lunga, bu mono ikele mu nzo yai ya lele, kusikimisa beno, bu mono bambukisa beno. 2 Pet. 3:1

¹⁴ Kadi mono zaba, ntama ve mono tabika nzo ya mono ya lele, bonso Mfumu ya beto Yesu Klisto songaka mono. Yoa. 21:15

¹⁵ Kansi mono zola kutula ngolo mpe, buna bu mono imene kukatuka, beno lenda kubambuka mambu yai ntangu yonso.

¹⁶ Kadi beto landaka ve nsangu ya mpamba ya mayele ya bantu, bu beto zabisaka beno ngolo ye kwiza ya Mfumu ya beto Yesu Klisto, kansi beto vandaka bantemo ya monaka nzitusu ya yandi. Mat. 17:1; Mal. 9:2; Luk. 9:28

¹⁷ Kadi yandi bakaka nzitusu ye nkembo tuka Nzambi, Tata, bu ndinga ya Nkwa Nzitusu ye Nkembo kuwakanaka kwa yandi: Yai ikele Mwana ya mono ya zolwa, ya ikele kuyangidisa mono.

¹⁸ Ndinga yai beto kibeni kuwaka tuka zulu, bu beto vandaka na yandi va mongo ya nlongo.

¹⁹ Ye beto ikele na mambu ya mbikudulu ya luta kieleka; ye beno ikele kulanda yo mbote, bonso mwini ya ikele kukienzula mu sika ya tombe, ti lumbu kuma kukia ye mbwetete ya suka telema mu mintima ya beno. Nk. 119:105

²⁰ Beno zaba yai ntete, na mbikudulu ya masonukwa ikele mu kutendula ya muntu ve.

²¹ Kadi mbikudulu ta mosi imene kwiza ve mu luzolo ya muntu, kansi bantu tubaka ya katuka kwa Nzambi, bu Mpeve Yanlongo zabisaka bau.