2 Kolinto 9 - Le Nouveau Testament en Kikwango 1950

Paulu longa bau mambu ya kupesa ya bima

¹ Kadi sambu na lusadusu kwa banlongo, beno ikele na nsatu ve na mono sonika kwa beno. 2 Kol. 8:4

² Kadi mono zaba beno lunga mu zola; mu yai mono yana sambu na beno kwa bantu ya Makedonia, na Akaya lungaka tuka mvu ya vandaka, ye kutula ngolo ya beno imene kusikimisa bau mingi. 2 Kol. 8:10

³ Kansi mono fidisaka bampangi, na luyanu ya beto sambu na beno lenda kuvanda mpamba ve mu mambu yai, na beno lenda kulunga bonso mono tubaka.

⁴ Keti kana bantu ya Makedonia takwiza na mono, ye kuta beno na konda kulunga, buna beto— tuba beno ve—tamona nsoni mu vuvu yai.

⁵ Sambu na yai mono banzaka, yo lunga kufidisa bampangi nantwala kwa beno, kuyidika matabisi ya beno, ya beno silaka ntete, kuyidika yo bonso matabisi ya lusakumunu ye ya kubotulwa ve.

Yo fwiti kuvanda ya nene ye salwa mu kiese

⁶ Kansi mu mambu yai: Muntu ya kuna nkeni fioti tayonzika fioti, muntu ya kuna mu lusakumunu tayonzika mu lusakumunu. Bing. 11:24; 22:8; Nk. 112:9; Ngal. 6:7

⁷ Muntu na muntu bonso yandi zengaka mu ntima, bika yandi kupesa, kansi mu ntantu keti mu ngolo ve, kadi Nzambi zola mupesi ya kiese. 2 Mose 25:2; 35:5; Lom. 12:8

⁸ Nzambi lenda kulutisa nlemvo yonso kwa beno, na beno lenda kuluta mu bisalu yonso ya mbote, bu beno ikele ya lunga mu mambu yonso ntangu yonso, 1 Tim. 6:6; Fili. 4:11

⁹ bonso yo sonama: Yandi mwangisaka, yandi pesaka kwa bansukami, lunungu ya yandi tavanda mvu ya mvu. Nk. 112:9

¹⁰ Yandi ya pesa nkeni kwa mukuni, ye mampa kudia tapesa ye lutisa bankeni ya beno kukuna, ye lutisa nkeni ya lunungu ya beno, Yes. 55:10; Hos. 10:12

¹¹ na beno vanda mvwama mu mambu yonso ku luzolo ya kukabila, ikele kubasisa matondo kwa Nzambi mu beto.

¹² Kadi kisielo yai ya lusadusu ikele kusadisa nsatu ya banlongo kaka ve, kansi yo ikele kukula mpe mu matondo mingi kwa Nzambi.

¹³ Bu bau bakaka lusadusu ya beno, bau zitisaka Nzambi sambu na kulemvuka ya kitemo ya beno mu nsamu mbote ya Klisto ye sambu na zola ya kukabila kwa bau ye kwa bau yonso. 1 Kol. 16:1; 1 Tim. 6:12

¹⁴ Bau ikele kulombila beno mu zola mingi sambu na nlemvo ya nene ya Nzambi mu beno.

¹⁵ Bika Nzambi kupeswa matondo sambu na matabisi ya yandi ya konda kutuba.