2 Kolinto 8 - Le Nouveau Testament en Kikwango 1950

Ngionzoko ya bima sambu na bansukami mu Yelusalemi

¹ Bampangi, beto ikele kuzabisa beno, nlemvo ya Nzambi ya peswaka kwa Mabundu ya Makedonia, Lom. 15:26

² mu kumeka mingi ya mpasi, fuluka ya kiese ya bau, ye kinsukami mingi ya bau, kulaka kimvwama ya kupesa.

³ Kadi bonso bau lendaka, mono ikele kutuba kitemo, mu luzolo ya bau kibeni, bau pesaka ya luta ngolo ya bau.

⁴ Bau lombaka beto mingi kubika bau kuvanda na kintuadi mu kusadila banlongo,

⁵ bau pesaka ve bonso beto banzaka, kansi bau dipesaka ntete kwa Mfumu, nanima kwa beto, mu luzolo ya Nzambi.

⁶ Buna beto tubaka kwa Tito kulungisa nlemvo yina nakati na beno mpe, bonso yandi yantikaka ntete.

⁷ Bonso beno nunga mu mambu yonso, mu lukwikilu, mu kutuba, mu nzailu, mu mvibudulu yonso, mu zola ya beno sambu na beto, tala, na beno nunga mu nlemvo yina mpe. 1 Kol. 1

⁸ Mono tubaka yo ve bonso nsiku, kansi sambu na mvibudulu ya bankaka, mono ikele kumeka kieleka ya zola ya beno. 1 Kol. 13:8

⁹ Kadi beno zaba nlemvo ya Mfumu ya beto Yesu Klisto, bu yandi vandaka mvwama, yandi kitukaka nsukami sambu na beno, na beno lenda kuvanda mvwama sambu na kinsukami ya yandi. Mat. 8:20; Fili. 2:6

¹⁰ Mono tuba kwa beno mabanza ya mono, kadi yai tasadisa beno, kadi mu mvu ya lutaka, beno yantikaka kusala kaka ve kansi mu luzolo mpe.

¹¹ Kansi ntangu yai manisa mpilayai mpe, kadi mpilamosi beno lungaka mu luzolo beno tamanisa yo mpe kupesa bonso ikele na beno.

¹² Kadi kana luzolo ya kupesa ikele, buna yau zolakana kwa Nzambi, bonso ya ikele na muntu, ikele ve ya yandi konda, 1 Pet. 4:10

¹³ kadi mono tuba ve na bankaka tabaka mingi ye beno konda, kansi kuvanda kitezo mosi. Mu ntangu yai kimvwama ya beno tasadisa nsatu ya bau,

¹⁴ buna kimvwama ya bau mpe tavanda lusadusu mu nsatu ya beno, sambu na kuvanda kitezo mosi,

¹⁵ bonso ya imene kusonama: Yandi ya yonzikaka mingi lutaka ve, ye yandi ya yonzikaka fioti kondaka kima ve.

Tito ye bampangi fidiswa ku Kolinto sambu na mambu yina

¹⁶ Matondo kwa Nzambi ya pesaka ntima ya Tito zola ya ngolo mpilayai sambu na beno.

¹⁷ Kadi yandi bakaka mbote mbombodolo ya beto, kansi sambu na yandi tulaka ngolo, yandi kwendaka kwa beno mu luzolo ya yandi kibeni.

¹⁸ Sikamosi na yandi beto fidisaka mpangi yankaka. Mabundu yonso pesaka yandi nsikulu mu nsamu mbote;

¹⁹ sambu na yai kaka ve, kansi yandi solwaka na mabundu, mu kwenda na beto, mu kisalu yai ya zola, ya beto ikele kusala mu nkembo ya Mfumu, ye kusonga luzolo ya mbote ya beto.

²⁰ Kadi mu yai beto dikeba na muntu tasemba beto ve mu lusadusu ya matabisi yai ya nene. 2 Kol. 6:3

²¹ Kadi beto ikele kutula ngolo konda kubediswa na luse ya Mfumu kaka ve, kansi na luse ya bantu mpe. Bing. 3:4; Lom. 12:17; Fili. 4:8; Bis. 24:16

²² Beto fidisaka yau na mpangi ya beto, ya beto monaka ikele nkwa ya ngolo, ya beto imene kuteza ntangu mingi mu mambu mingi, kansi ntangu yai yandi luta kutula ngolo mu vuvu ya nene ya ikele na yandi sambu na beno.

²³ Yandi Tito nkwa ntuadi ya mono ye musadi sikamosi na mono, kwa beno, ye bampangi ya beto, bankaka ikele bantumwa ya mabundu ye nkembo ya Klisto.

²⁴ Sambu na yai beno songa kitezo ya zola ya beno, ye luyanu ya beto sambu na beno, na luse ya mabundu. 2 Kol. 7:14