2 Kolinto 7 - Le Nouveau Testament en Kikwango 1950

Paulu tuba kitemo sambu na zola ya yandi kwa bantu ya Kolinto

¹ Sambu na yai beno bazolwa, sambu na beto ikele na bansilulu yai, bika beto divedisa tuka nsumukunu yonso ya nsuni ye ya mpeve, ye lungisa mvedolo mu vumi ya Nzambi. 1 Yoa. 3:3

² Beno kangudila beto ntima ya beno; beto salaka mbi ve kwa muntu, beto bivisaka muntu ve, beto bakaka kima ya muntu mu luvunu ve. Bis. 20:33; 2 Kol. 12:15

³ Mono tubaka yo ve kubedisa beno; kadi mono tubaka ntete, beno ikele mu mintima ya beto, beto lunga kufwa na beno ye kuvanda na moyo na beno.

⁴ Mono ikele na vuvu mingi sambu na beno, mono ikele kuyana mingi sambu na beno: mono fuluka na mbombolo, mono fuluka na kiese mu mpasi yonso ya beto. Paulu bombwaka kwa Tito

⁵ Kadi bu beto kumaka na Makedonia, nsuni ya beto vundaka ve, kansi beto moniswaka mpasi mu ndambu yonso; nanganda vandaka mvita, nakati vandaka boma.

⁶ Kansi Nzambi ya bomba bankwa ntantu bombaka beto mu kwiza ya Tito,

⁷ ikele sambu na kwiza ya yandi kaka ve, kansi sambu na mbombolo ya yandi bombwaka sambu na beno. Bu yandi zabisaka beto tonda mingi ya beno ye nionga ya beno ye mabanza ya ngolo ya beno sambu na mono, buna mono lutaka kuyangalala.

⁸ Kadi kana mono salaka beno ntantu sambu na nkanda ya mono, mono ikele na ntantu ve sambu na yo, kansi ntete mono vandaka na ntantu, bu mono zabaka nkanda ya mono salaka mintima ya beno ntantu, kansi yo vandaka ntangu fioti kaka,

⁹ ntangu yai mono ikele kuyangalala, ikele ve na beno salwaka ntantu, kansi na beno salwaka ntantu ya kupindula ya mabanza; kadi beno salwaka ntantu ya Nzambi zola; buna beno konda kima ve sambu na mambu yai.

¹⁰ Kadi ntantu ya Nzambi zola ikele kubasisa kupindula ya mabanza ku mpulusu, ya konda kupesa ntantu, kansi ntantu ya nsi ikele kubasisa lufwa. Nk. 51:1; Luk. 18:13

¹¹ Kadi tala, ntantu yai vandaka bonso ya Nzambi zola, yo basisaka kutula ngolo mingi mu beno, e kudifundisa, e makasi, e boma, e lutondo mingi, e kimpala, e mvutula ya ndinda. Mu mambu yonso beno disonga na beno ikele kuvedila mu mambu yai.

¹² Mpilayai bu mono sonikaka kwa beno, mono sonikaka ve sambu na muntu ya salaka mbi, ye ve sambu na muntu ya salwaka mbi, kansi na mvibudulu ya beno sambu na beto tamonika kwa beno na luse ya Nzambi.

¹³ Sambu na yai beto bombwaka. Kansi mu mbombolo ya beto, beto luta kuyangalala sambu na kiese ya Tito, sambu na mpeve ya yandi siamiswaka sambu na beno yonso.

¹⁴ Kadi kana mono yanaka sambu na beno kwa yandi, mono moniswaka nsoni ve, kansi bonso beto tuba mambu yonso kwa beno mu kieleka, buna luyanu ya beto mpe ikele ya kieleka na luse ya Tito.

¹⁵ Zola ya yandi ikele kuluta kwa beno, bu yandi ikele kubambuka kulemvuka ya beno yonso, bonso beno bakaka yandi mu boma ye kuzakama.

¹⁶ Mono ikele kuyangalala, bu mono ikele na vuvu sambu na beno mu mambu yonso.