2 Kolinto 6 - Le Nouveau Testament en Kikwango 1950

Paulu, sielo ya Nzambi, ya kieleka

¹ Bonso basadi sikamosi na yandi, beto ikele kubombidila beno mpe, na beno tabaka nlemvo ya Nzambi mpamba ve, 1 Kol. 3:9; Eb. 12:15

² kadi yandi tubaka: Mono kuwaka nge mu ntangu ya lunga, mono sadisaka nge mu kilumbu ya mpulusu. Tala, ntangu yai ikele ntangu ya lunga, tala, ntangu yai ikele kilumbu ya mpulusu. Luk. 4:18

³ Beto ikele kutesisa muntu sakuba ve mu mambu mosi, na kisielo ya beto tasembwa ve, 1 Kol. 10:32

⁴ kansi beto ikele kudisonga kitemo mu mambu yonso, bonso basielo ya Nzambi mu mvibudulu mingi, mu mpasi, mu nsatu, mu ntantu, 1 Kol. 4:1; 2 Kol. 4:2

⁵ mu kubula ya fimbo, mu boloko, mu makalele, mu bisalu ya mpasi, mu tomatala, mu kubuya ya madia, Bis. 13:50; 14:19; 16:19, 23

⁶ mu mvedolo, mu nzailu, mu mvibudulu, mu nlembami, mu Mpeve Yanlongo, mu zola ya konda luvunu, Lom. 12:9; 2 Kol. 4:2

⁷ mu kieleka, mu ngolo ya Nzambi, mu bima ya nwanina ya lunungu na diboko ya kibakala ye kinkento, 1 Kol. 2:4; 2 Kol. 10:4; Ef. 6:11

⁸ mu nkembolo ye mu konda nzitusu, mu nsangu mbi, ye mu nsangu mbote, bonso bakusi, kansi beto ikele bankwa kieleka,

⁹ bonso konda kuzabwa, ye beto zabwa mbote, bonso beto ikele kufwa ye tala beto ikele na moyo, bonso longwa ndongi ye beto ikele kufwa ve, Nk. 118:7; 1 Kol. 15:31; 2 Kol. 4:7

¹⁰ bonso bankwa ntantu, kansi beto ikele kuyangalala ntangu yonso, bonso bansukami, kansi beto ikele kutula bantu mingi mu kimvwama, bonso na kima ve, kansi beto ikele na bima yonso. Lom. 5:3; Fili. 2:17; 4:11

Zola ya yandi kwa bantu ya Kolinto

¹¹ Beno bantu ya Kolinto, munoko ya beto kanguka kwa beno, ntima ya beto kutulwa nene. Nk. 119:32

¹² Sika ya beno mu ntima ya beto ikele fioti ve, kansi sika ya ikele mu ntima ya beno ikele fioti mingi. 2 Kol. 7:2

¹³ Beno mpe sala mutindu mosi—mono tuba bonso kwa bana—beno yidikila beto sika mu ntima ya beno.

Bantu ya Nzambi kukotana ve bantu ya konda lukwikilu

¹⁴ Beno tulwa vangu ve sikamosi na bankwa ya konda lukwikilu, kadi lunungu ikele na kintuadi nki na masumu ? Keti kinduku nki ikele na mwini ye tombe ? 1 Kol. 5:9; Ef. 5:8, 11

¹⁵ Kansi luwawanu nki ikele na Klisto ye Beliali ? Keti kintuadi nki ikele na yandi ya kwikila ye yandi ya konda lukwikilu ? 1 Kol. 10:20

¹⁶ Ye tempelo ya Nzambi ikele na kintuadi nki na biteki ? Kadi beno ikele tempelo ya Nzambi ya moyo, bonso Nzambi tubaka: Mono tavanda mu bau ye tambula mu bau. Mono tavanda Nzambi ya bau, ye bau tavanda bantu ya mono 3 Mose 26:11; 1 Kol. 3:16; 6:19; 10:14; Eb. 3:6; 8:10; 1 Pet. 2:5; Yeh. 37:27

¹⁷ Sambu na yai beno basika nakati na bau ye vanda beno mosi, Mfumu ikele kutuba, ye valakana ve kima ya sumuka, ye mono tabaka beno. Yes. 52:11; Sef. 3:19; Nzai. 18:4

¹⁸ Mono tavanda Tata kwa beno, ye beno tavanda bana babakala ye bana bankento ya mono, Mfumu Nkwa Ngolo ikele kutuba. Yel. 31:1, 9; Nzai. 21:7