2 Kolinto 5 - Le Nouveau Testament en Kikwango 1950

Vuvu ya Paulu ye luzolo ya yandi

¹ Kadi beto zaba, kana nzo ya beto ya lele ya kintoto vila, buna beto ikele na nzo ya katuka na Nzambi, nzo ya tungwa ve na maboko, ya ikele mvu ya mvu mu zulu.

² Kadi beto ikele kuvumuna mpe mu yai, beto ikele kutonda mingi kuvwata nzo ya beto ya kizulu. Lom. 8:23; Fili. 3:21

³ Kana beto vwata yo, beto tomonika kinkonga ve.

⁴ Kadi beto ya ikele mu nzo yai ya lele, ikele kuvumuna na nsi ya kizitu, kadi beto zola kukatula yo ve, kansi beto zola kuvwata yo, na moyo tamina lufwa. 1 Kol. 15:53

⁵ Yandi ya salaka beto sambu na yai ikele Nzambi, ya pesaka beto kidimbu ya Mpeve. 2 Kol. 1:22; Ef. 1:13

⁶ Sambu na yai, beto ikele na kikesa ntangu yonso, ye beto zaba kana beto vanda mu nitu, beto ikele sikamosi na Mfumu ve,

⁷ kadi beto ikele kutambula mu lukwikilu ye mu kumona ya meso ve.

⁸ Kansi beto ikele na kikesa, ye beto luta zola kukatuka na nitu ye kwenda kuvanda na Mfumu. Fili. 1:23

⁹ Sambu na yai, beto tula ngolo kuyangidisa yandi, kana beto ikele mu nitu, keti kana beto imene kukatuka.

¹⁰ Kadi beto yonso fwiti kumoniswa nantwala ya kiti ya mfundusu ya Klisto, na muntu na muntu lenda kubaka ya yandi salaka mu nitu, bonso yina ya yandi salaka, kana ya mbote keti ya mbi. Lom. 14:10; Ef. 6:8; Yoa. 5:29

Ngolo ya zola kwa Klisto ikele mu yandi

¹¹ Mpilayai sambu na beto zaba vumi ya Mfumu, beto ikele kukwikidisa bantu, kansi kwa Nzambi beto ikele kumonika; mono tula vuvu mpe na beto ikele kumonika mu kansansa ya beno.

¹² Beto disonga kitemo diaka kwa beno, kansi beto ikele kupesa beno mambu ya kuyana sambu na beto, na beno lenda kubaka mvutulu na bau ya ikele kuyana mu yina ya ikele kumonika, kansi mu yina ya ikele mu ntima ve. 2 Kol. 3:1

¹³ Kansi kana beto ikele buzoba, beto ikele na yo kwa Nzambi, kana beto ikele na mabanza ya mbote, beto ikele na yo kwa beno.

Zola ya Klisto ikele kukwikidisa beto

¹⁴ Kadi zola ya Klisto ikele kukwikidisa beto, kadi beto ikele kuzenga mpilayai, kana mosi kufwaka sambu na yonso, mpilayai bau yonso kufwaka,

¹⁵ yandi kufwilaka bantu yonso, na bau ya ikele na moyo tavenda na moyo kwa bau kibeni ve, kansi kwa yandi ya kufwilaka bau ye fulukiswaka diaka sambu na bau. Lom. 6:11; Ngal. 2:20; 1 Pet. 4:2

Luwawanu

¹⁶ Sambu na yai, tuka ntangu yai beto zaba muntu ve bonso mu nsuni; kansi kana beto imene kuzaba Klisto mu nsuni, kansi ntangu yai beto zaba yandi mpilayina diaka ve.

¹⁷ Sambu na yai, kana muntu ikele mu Klisto, yandi ikele nsemono yampa, mambu ya nkulu imene kuluta, tala, mambu yonso imene kwiza yampa. Ngal. 6:15; Yes. 43:18; 65:17

¹⁸ Kansi mambu yonso imene kubasika na Nzambi, yandi vutulaka beto kwa yandi kibeni mu Klisto, ye yandi pesaka beto kisielo ya kuvutula kwa Nzambi.

¹⁹ Kadi Nzambi vandaka mu Klisto kuvutula nsi kwa yandi kibeni, yandi tangaka ve masumu ya bau kwa bau, ye yandi pesaka beto mambu ya kuvutula kwa Nzambi. Lom. 3:24; Kolo. 1:20

²⁰ Mpilayai beto ikele bantumwa na sika ya Klisto, mpilamosi Nzambi ikele kubombidila beno mu beto. Beto bombidila beno na sika ya Klisto: Beno vutuka kwa Nzambi. Eb. 6:20

²¹ Yandi ya zabaka masumu ve, Nzambi kitulaka yandi masumu na sika ya beto, na beto lenda kuvanda lunungu ya Nzambi sambu na yandi. Yes. 53:1; 1 Pet. 2:22; Lom. 5:19; 8:3; Ngal. 3:13; 1 Yoa. 3:5