2 Kolinto 4 - Le Nouveau Testament en Kikwango 1950

Paulu salaka na kikesa

¹ Mpilayai, sambu na beto ikele na kisielo yai, mu nkenda ya beto bakaka, beto lenda kulembwa ve. 2 Kol. 3:6

² Kadi beto buyaka mambu ya kinsweki ya nsoni, beto ikele kutambula ve mu luvunu, beto ikele kulonga mambu ya Nzambi mu kukusa ve, kansi mu nzaikusu ya kieleka, beto ikele kudisonga kitemo mpe kwa kansansa ya bantu yonso nantwala na Nzambi. 1 Kol. 4:5

³ Kansi kana nsamu ya beto ya mbote ikele kufukwa, buna yo ikele kufukwa kwa bau ya ikele kuvila.

⁴ Kadi nzambi ya nzi yai imene kufwa meso ya mabanza ya bantu ya konda lukwikilu, na mwini ya nsamu mbote ya nkembo ya Klisto ya ikele kifwani ya Nzambi takienzudila bau ve. Kolo. 1:15

⁵ Kadi beto disamuna ve, kansi beto samuna Klisto Yesu bonso Mfumu, ye beto kibeni bonso bampika ya beno sambu na Yesu. 1 Kol. 12:3; Fili. 2:11

⁶ Sambu na yo ikele Nzambi ya tubaka: Mwini kienzula mu mpimpa; yo kienzulaka ntima ya beto, kupesa mwini ya nzailu ya nkembo ya Nzambi na luse ya Klisto.

Yandi vandaka na kiese mu ndungunu ya yandi

⁷ Beto ikele na kima yai ya ntalu mu wumbwa ya ntoto, na ngolo yina ya luta nene tavanda ya Nzambi, kansi ya beto ve. 1 Kol. 2:5

⁸ Mu mambu yonso beto fietikiswa, kansi beto kangama ve, beto moniswa mpasi, kansi beto lembwa ve,

⁹ bau zomaka beto kansi Nzambi bikaka beto ve, bau bulaka beto na ntoto, kansi beto kufwaka ve, Nk. 37:24

¹⁰ ntangu yonso beto nata lufwa ya Yesu mu banitu ya beto, na moyo ya Yesu lenda kumonika mpe mu banitu ya beto.

¹¹ Kadi beto ya ikele na moyo ikele kuyekulwa bilumbu yonso ku lufwa, sambu na Yesu, na moyo ya Yesu lenda kumonika mpe mu nsuni ya beto ya lufwa. Nk. 44:22; Mat. 5:11

¹² Buna lufwa ikele kusala mu beto, kansi moyo mu beno.

¹³ Sambu na beto ikele na mpeve mosi ya lukwikilu, bonso yo sonama: Mono kwikilaka, sambu na yai mono imene kutuba. Beto mpe ikele kukwikila, sambu na yai mpe beto ikele kutuba,

¹⁴ kadi beto zaba, yandi ya fulukisaka Mfumu Yesu, tafulukisa beto mpe sikamosi na Yesu, ye tamonisa beto sikamosi na beno. Lom. 8:11; 1 Kol. 6:14

¹⁵ Kadi mambu yonso ikele sambu na beno, sambu na nlemvo ikele mingi nakati bantu mingi, yo lenda kulutisa matondo kukembisa ya Nzambi. 2 Kol. 1:6, 11

Yandi vandaka na vuvu ya kwikama

¹⁶ Sambu na yai beto lembwa ve, kansi kana muntu ya beto ya nganda ikele kufwa, kansi muntu ya beto ya kati ikele kukituka yampa kilumbu na kilumbu.

¹⁷ Kadi bampasi ya beto ya kizitu ve, ye ya ntangu fioti ikele kubasisa kwa beto nkembo ya luta mingi ya nene ya mvu ya mvu, Nk. 30:5; Mat. 5:12; Lom. 8:18

¹⁸ bu beto tala ve bima ya ikele kumonika, kansi yina ya lenda ve kumonika, kadi yina ya ikele kumonika ikele kuvanda ntangu fioti, kansi yina ya lenda ve kumonika ikele mvu ya mvu. Lom. 8:24