2 Kolinto 3 - Le Nouveau Testament en Kikwango 1950

Nkanda ya kitemo ya Paulu

¹ Beto yantika kudisonga kitemo diaka ? Keti beto ikele bonso bankaka ya ikele na nsatu ya nkanda ya kitemo kwa beno keti ya katuka na beno ? 2 Kol. 5:12

² Beno ikele nkanda ya beto ya sonikwa mu ntima ya beto, ikele kuzabakana ye kutangwa na bantu yonso, 1 Kol. 9:2

³ bu yo zabakana, na beno ikele nkanda ya Klisto ya salwaka mu kisalu ya beto, ya sonikwa na ntinta ve, kansi na Mpeve ya Nzambi ya moyo, va matadi ve, kansi va matadi nsuni ya ikele mu ntima ya beno. 2 Mose 31:18

Nkembo ya luwawanu yampa

⁴ Beto ikele na vuvu ya mpilayai mu Klisto kwa Nzambi;

⁵ ikele ve na beto lunga mu beto kibeni, kubanza mambu mpilamosi yo katuka na beto kibeni, kansi kulunga ya beto katuka na Nzambi, 2 Kol. 2:16

⁶ yandi lungisaka beto, kuvanda basielo ya luwawanu yampa, mu bisono ve, kansi mu mpeve, kadi bisono ikele kufwa, kansi mpeve ikele kupesa moyo. 1 Kol. 15:10; 11:25; Lom. 8:2; Yoa. 6:63

⁷ Kansi kana kisielo ya lufwa ya sonikwa mu bisono va matadi vandaka na nkembo, na bana ya Isaeli lendaka ve kutala luse ya Mose, sambu na nkembo ya luse ya yandi, ye nkembo yina katukaka, 2 Mose 34:29

⁸ buna kisielo ya mpeve taluta ve kuvanda na nkembo ? Ngal. 3:14

⁹ Kadi kana kisielo ya mbedoso ikele na nkembo, buna kisielo ya lunungu taluta mu nkembo.

¹⁰ Kadi yina ya vandaka na nkembo ikele na nkembo ta fioti ve, sambu na nkembo yai ya luta.

¹¹ Buna kana yina ya katukaka kuvandaka na nkembo, buna yina ya bika taluta mu nkembo.

BaIsaeli imene kufuka luse ya bau ti ntangu yai kansi nanima bau tavuluswa

¹² Mpilayai sambu na beto ikele na vuvu mpilayai, beto ikele kutuba mu kikesa mingi,

¹³ ye beto ikele kusala bonso Mose ve, ya tulaka lele ya kufuka va luse ya yandi, na bana ya Isaeli lenda ve kutala nsuka ya yina ya katukaka.

¹⁴ Kansi mabanza ya bau kwizaka ngolo. Kadi ti kilumbu yai lele ya kufuka ikele, bu bau ikele kutanga luwawanu ya nkulu, kansi yo monikaka kwa bau ve, na yo imene kukatulwa mu Klisto. Lom. 11:7, 25

¹⁵ Kadi ti kilumbu yai, konso ntangu ya bau tanga Mose, lele ya kufuka ikele va ntima ya bau.

¹⁶ Kansi konso ntangu ya muntu tapinduka kwa Mfumu, lele ya kufuka takatulwa.

¹⁷ Mfumu ikele Mpeve, konsosika ya Mpeve ya Mfumu ikele, kuna ikele kimpwanza. Ngal. 5:1, 13

¹⁸ Beto yonso na luse ya fukwa ve, ikele kutala nkembo ya Mfumu, beto ikele kukitulwa mu kifwani ya yandi tuka nkembo ku nkembo, bonso Mpeve ya Mfumu ikele kusala. 2 Mose 16:7, 10