2 Kolinto 2 - Le Nouveau Testament en Kikwango 1950

Mambu ya bikisa yandi vutukaku Kolinto

¹ Mono kanaka mambu yai mu mono kibeni, na mono tavutuka ve kwa beno mu ntantu.

² Kadi kana mono pesa beno ntantu, buna nani tayangidisa mono, ikele yandi ya mono pesa ntantu ?

³ Mono sonikaka mambu yina, keti bu mono kwizaka, mono imene kumona ntantu ve na bau ya fwiti kuyangidisa mono, mono ikele na vuvu mu beno yonso, na kiese ya mono ikele kiese ya beno yonso. 2 Kol. 12:20; Fili. 2:27

⁴ Kadi mu ntantu mingi ye kizitu ya ntima mono sonikaka kwa beno mu mansanga mingi, ikele ve kupesa beno ntantu, kansi na beno tazaba zola ya ikele na mono ya luta kwa beno. 2 Kol. 7:8

Mutindu bau fwiti kubaka yandi ya sumuka

⁵ Kana muntu monisaka beto ntantu, yandi salaka yo ve kwa mono kaka, kadi yo ikele kwa beno yonso, kansi ndambu kaka, kadi mono zola ve kulutisa beno mambu.

⁶ Sambu na yai, kwa muntu yai kusemba yina lunga, ya yandi bakaka na bantu mingi. 1 Kol. 5:3

⁷ Kana mpilayai ve, beno fwiti kuvidisa yandi ye bomba yandi, keti yandi talutwa ngolo mu ntantu yina ya luta.

⁸ Sambu na yai mono bombidila beno, songa zola ya beno kwa yandi.

⁹ Sambu na mambu yina mpe mono sonikaka, na mono lenda kumeka beno, kana beno ikele kulemvuka mu mambu yonso.

¹⁰ Kansi konsonani ya beno vidisa mambu, mono mpe tavidisa yandi, kadi yina ya mono imene kuvidisa, kana mono imene kuvidisa mambu, mono vidisa yau sambu na beno na luse ya Klisto,

¹¹ na Satana taluta beto ve, kadi beto zaba mayele ya yandi. 2 Kol. 11:3; 1 Pet. 5:8

Boma ya Paulu sambu na dibundu

¹² Bu mono kwizaka ku Toloa, kusamuna nsamu mbote ya Klisto, ye mwelo kangulwaka kwa mono mu Mfumu, Bis. 16:8; 1 Kol. 16:9; Kolo. 4:3

¹³ buna mpeve ya mono imene kuvunda ve, kadi mono monaka ve Tito, kansi bu mono bikila bau mbote, mono kwendaka ku Makedonia. 2 Kol. 7:8; Tit. 1:4

Paulu yangalala sambu na Nzambi sakumuna kisalu ya yandi

¹⁴ Matondo kwa Nzambi ya ikele kutwala beto mu nkembo ntangu yonso mu Klisto, ye ikele kumonisa nsunga ya ngangu ya yandi nakati na beto mu ndambu yonso.

¹⁵ Kadi beto ikele nsunga ya Klisto kwa Nzambi mu bau ya ikele kuvuluswa ye mu bau ya ikele kuvila. 1 Kol. 1:18

¹⁶ Kwa bankaka beto ikele nsunga ya lufwa ku lufwa, kansi kwa bankaka beto ikele nsunga ya moyo ku moyo. Nani lunga na mambu yai yonso ? Luk. 2:34

¹⁷ Kadi beto ikele kubivisa mambu ya Nzambi ve, sambu na kubaka ndandu, bonso bankaka mingi ikele kusala, kansi mu kieleka nantwala ya Nzambi, beto ikele kutuba mu Klisto mambu ya katuka na Nzambi. 2 Kol. 4:2