2 Kolinto 13 - Le Nouveau Testament en Kikwango 1950

Kubedisa ya bantu ya masumu ye mfidisilu ya mbote

¹ Yai mbala ya tatu ya mono ikele kwiza kwa beno. Mambu yonso ikele kusidikiswa mu munoko ya bantemo zole keti tatu.

² Mono tubaka ntete bonso bu mono vandaka na beno mbala ya zole, ye ntangu yai bu mono ikele ve, mono tuba mutindu mosi kwa bau ya salaka masumu ntete ye kwa bankaka yonso, kana mono vutuka, mono takuwila nkenda ve.

³ Beno ikele kusosa kidimbu ya Klisto ya ikele kutuba mu mono; yandi ikele lebakana ve kwa beno, kansi yandi ikele ngolo mu beno.

⁴ Kadi yandi komwa va kulunsi mu lebakana, kansi yandi ikele na moyo mu ngolo ya Nzambi. Kadi beto mpe ikele lebakana mu yandi, kansi beto tavanda na moyo na yandi mu ngolo ya Nzambi kwa beno.

⁵ Beno dimeka, kana beno ikele mu lukwikilu, beno diteza. Keti beno kibeni zaba ve na Klisto Yesu ikele mu beno ? Keti ve beno ikele bankwa ya lenda kupindula ve.

⁶ Kansi mono tula vuvu, na beno tazaba, na beto ikele ve bankwa ya lenda kupindula ve.

⁷ Beto lomba kwa Nzambi, na beno tasala mbi ve, ikele ve na beto lenda kumonika ya lunga, kansi na beno lenda kusala mambu ya konda kusembwa, kana beto vanda bonso bankwa ya lenda kupindula ve.

⁸ Kadi beto lenda ve kubikisa mambu ya kieleka, kansi sadisa mambu ya kieleka.

⁹ Kadi beto yangalala, bu beto ikele lebakana ye beno ikele ngolo. Mu yai beto lomba mpe, na beno vanda ya lunga.

¹⁰ Sambu na yai, bu mono ikele ve, mono sonikaka mambu yai, na mono lenda kutula ngolo ve bu mono ikele na beno, bonso ngolo ya Mfumu pesaka mono, na kutunga ye na kukatula ve. 1 Kol. 4:12; 2 Kol. 10:8

¹¹ Buna, beno bampangi, yangalala, vanda ya lunga, bombwa, vanda na mabanza mosi, vanda mu yenge, ye Nzambi ya zola ye yenge tavanda na beno. Lom. 15:33; 16:20; Fili. 4:9; 1 Tes. 5:23; Eb. 13:20

¹² Beno pesana mbote na mfibulu ya nlongo.

¹³ Banlongo yonso fidisa beno mbote.

¹⁴ Nlemvo ya Mfumu Yesu Klisto, ye zola ya Nzambi, ye kintuadi ya Mpeve Yanlongo vanda na beno yonso.