2 Kolinto 12 - Le Nouveau Testament en Kikwango 1950

Mona-meso ya Paulu

¹ Mono fwiti kuyana, kansi yina ikele kusadisa mono ve, mono tatuba sambu na mona-meso ye nzaikusu ya Mfumu.

² Mono zaba muntu mu Klisto, mvu kumi ye iya imene kuluta— kana yandi vandaka mu nitu, mono zaba ve, keti nanganda ya nitu, mono zaba ve, kansi Nzambi zaba —muntu ya mpilayai tombolwaka ti zulu ya tatu.

³ Mono zabaka muntu mpilayai— kana mu nitu, keti nanganda ya nitu, mono zaba ve, Nzambi zaba—

⁴ yandi tombolwaka ti Paladiso, ye kuwaka mambu ya lenda kutubwa ve, nsiku buya muntu kutuba yo.

⁵ Mu muntu mpilayai, mono ikele kuyana, kansi mono kibeni tayana ve, kaka mu lebakana ya mono.

⁶ Kadi kana mono tonda kuyana, mono tavanda buzoba ve, kadi mono tatuba kieleka kansi mono bika, keti muntu tabanza na mono luta yina ya yandi mona mu mono keti kuwa na mono.

⁷ Sambu na mono konda kuditombola mu nzaikusu yina yanene, mono peswaka nsende mu nsuni, wanjo ya Satana kubula mono makofi, na mono luta kuditombola ve.

⁸ Sambu na mambu yai mono lombaka Mfumu mbala tatu, na yo lenda kukatulwa na mono.

⁹ Yandi tubaka kwa mono: Nlemvo ya mono lunga kwa nge, kadi ngolo ya mono lunga mu lebakana. Sambu na yai mu kiese mingi mono tayana mu lebakana ya mono, na ngolo ya Klisto lenda kufuka mono.

¹⁰ Sambu na yai mono ikele na kiese mu lebakana, mu mambu ya kulwala, mu nsatu, mu nzomono, mu mpasi sambu na Klisto, kadi bu mono ikele lebakana, mono ikele ngolo.

Zola ya yandi kwa baKolinto

¹¹ Mono imene kwiza nzoba mu kusonika yai, kansi beno kitulaka mono mpilayai, kadi yo lunga kana beno imene kuzitisa mono, kadi mu mambu ta fioti ve, mono bikaka nanima ya bantumwa ya luta nene, kansi mono ikele kima ve.

¹² Kieleka, kidimbu ya bantumwa salwaka nakati na beno, mu mvibudulu yonso, mu bidimbu ye mambu ya kuyituka ye bisalu ya ngolo. 1 Kol. 9:2; 2 Kol. 6:4

¹³ Kadi mu mambu nki beno konda kulunga na mabundu yankaka, kana yo ikele yai ve, na mono lombaka kima na beno ve ? Beno vidisa mono mbi yai. 2 Kol. 11:8

¹⁴ Tala, yai ikele mbala ya tatu ya mono yidikaka kwiza kwa beno; mono talomba kima ve, kadi mono ikele kusosa ya beno ve, kansi beno kibeni. Kadi bana fwiti kulunda bima kwa tata ye ngudi ve, kansi tata ye ngudi kwa bana. 2 Kol. 1:15; Fili. 4:17

¹⁵ Mu kiese mingi mono takwiza ye dipesa sambu na miela ya beno. Kana mono luta kuzola beno, buna mono ikele kuzolwa na beno luta fioti ? Kolo. 1:24; 2 Tim. 2:10

Kubedisa

¹⁶ Ikele mambu ve, mono lombaka beno kima ve kansi bu mono ikele na mayele, mono bakaka beno mu mayele. 2 Tes. 3:8

¹⁷ Kadi na bau ya mono fidisaka kwa beno, mono dibakila ndandu ya beno ?

¹⁸ Mono lombaka Tito, ye mono fidisaka mpangi sikamosi na yandi. Tito dibakilaka ndandu ya beno ? Beto tambulaka mu Mpeve mosi ve ? Beto tambulaka mu bitambi mosi ve ?

¹⁹ Tuka ntama beno banza beto ikele kusweka mambu ya beto kwa beno. Kansi na luse ya Nzambi mu Klisto beto ikele kutuba mambu yonso, bazolwa sambu na kutunga beno.

²⁰ Kadi mono ikele na boma, keti bu mono kwiza mono tamona beno ve bonso mono zola, ye kana beno takuta mono ve bonso beno zola, kana beno ikele na mambu, kunwana, kimpala, makasi, kukabana, nsoki, bituba-tuba, kuditombula, makalele, 1 Kol. 3:3; Ngal. 5:20

²¹ keti bu mono kwiza diaka, Nzambi ya mono takulumusa mono nantwala na beno, ye mono tavanda na ntantu sambu na bantu mingi ya salaka masumu ntete ye pindulaka mabanza ve tuka nsumukunu, ye zola ya masumu, ye bizumba ya bau salaka. 2 Kol. 13:2; 1 Kol. 5:1; Ef. 4:19