2 Kolinto 11 - Le Nouveau Testament en Kikwango 1950

Paulu tuba luzolo ya yandi ye bampasi ya yandi sambu na dibundu ya Kolinto

¹ Kana beno zola kuvibidila na mono, mu ndambu ya buzoba. E, beno vibidila na mono.

² Kadi mono ikele na beno kimpala na kimpala ya Nzambi. Kadi mono silaka beno kwa bakala mosi kaka, na mono lenda kupesa beno kwa Klisto ndumbu ya vedila. Ef. 5:25

³ Kansi mono ikele na boma, keti bonso nioka kusaka Eva mu mayele ya yandi, buna mabanza ya beno tabiviswa ye katuka na kwikama mu Klisto. 1 Mose 3:4; Yoa. 8:44; 10:12—11:12

⁴ Kadi kana muntu kwiza kusamuna Yesu yankaka, ya beto samunaka ve, keti kana beno baka mpeve ya mpila yankaka ya beno bakaka ve, keti nsamu mbote ya mpila nkaka ya beno bakaka ve, buna beno sala mbote kuvibidila yandi. Ngal. 1:6

⁵ Kadi mono banza mu mambu tafioti ve, mono bika nanima na bantumwa yanene. 1 Kol. 12:11

⁶ Kana ndinga ya mono ikele kitoko ve, kansi nzailu ikele na mono, ye mu mambu yonso beto zabisaka beno yai.

⁷ Keti mono salaka masumu bu mono dikulumusaka, na beno lenda kutombulwa, bu mono samunaka kwa beno nsamu mbote ya Nzambi na lufutu ve ? Mat. 10:8; 1 Kol. 9:12; 13:2; 2 Kol. 12:13; Fili. 4:12

⁸ Mono yibaka mabundu yankaka, bu mono bakaka lufutu ya bau na mono lenda kusadila beno. Bu mono vandaka na beno ye mono monaka nsatu, mono lombaka kima ya muntu ve. 1 Kol. 9:7; 2 Kol. 12:13

⁹ Kadi bu mono vandaka na beno ye kondaka bima, mono vandaka kizitu kwa muntu ve bampangi lungisaka yo, bu bau katukaka na Makedonia; mu mambu yonso mono dikebaka, na mono lenda kulomba beno kima ve. 2 Kol. 12:13; Fili. 4:15

¹⁰ Bonso kieleka ya Klisto ikele mu mono, muntu tabikisa mono ve mu luyanu yai mu nsi ya Akaya. 1 Kol. 9:15

¹¹ Sambu na nki ? Sambu na mono zola beno ve ? Nzambi zaba yo.

¹² Yina ya mono sala, mono tasala na mono lenda kukatula mambu ya bau ya tonda mambu, mu yina ya bau yana, bau lenda kumonika bonso beto.

¹³ Kadi bantu mpilayai ikele bantumwa ya luvunu, ye basadi ya lukusu, bau ikele kukitula bonso bantumwa ya Klisto. Fili. 3:2

¹⁴ Ikele mambu ya nyitukulu ve, kadi Satana kibeni kitukaka bonso wanjo ya mwini.

¹⁵ Mpilayai ikele mambu ya nene ve kana basielo ya yandi ikele dikitula bonso basielo ya lunungu; nsuka ya bau tavanda bonso bisalu ya bau.

Yandi songa diswaswana ikele nankati ya yandi ye bantumwa ya luvunu

¹⁶ Diaka mono tuba: Bika muntu banza ve mono ikele nzoba, kana beno banza yo, baka mono bonso nkwa nzoba, na mono lenda kuyana ndambu. 2 Kol. 12:6

¹⁷ Mambu ya mono tuba mu luyanu ya mono, mono tuba ve bonso mu Mfumu kansi bonso mu buzoba.

¹⁸ Bantu mingi ikele kuyana mu nsuni, buna mono mpe ikele kudiyana. 2 Kol. 10:13; 12:9; Fili. 3:4

¹⁹ Kadi bu beno ikele na ngangu, beno vibidila mu kiese bau ya ikele buzoba.

²⁰ Kadi beno vibidila, kana muntu tula beno bampika, kana muntu kudia beno, kana muntu kanga beno, kana muntu ditombola, kana muntu bula beno va luse.

²¹ Mono tuba mu nsoni, bonso beto vandaka lebakana. Kansi kana muntu ikele na kikesa mu mambu, mono mpe ikele na kikesa, mono tuba mu kizoba.

²² Bau ikele baEbeleo ? Mono mpe. Bau ikele baIsaeli ? Mono mpe. Bau ikele nkuna ya Abalahami ? Mono mpe. Bis. 22:3; Fili. 3:5

²³ Bau ikele basielo ya Klisto ? Mono tuba bonso mono lauka: Mono luta. Mono luta mu bisalu, mono luta mu boloko, mono luta mu fimbu ya kitezo ve, mono luta mu mpasi ya lufwa mbala mingi.

²⁴ Mbala tanu baYuda bulaka mono fimbu makumi tatu ye uvwa;

²⁵ mono bulwaka na sikoti mbala tatu, mono loswaka na matadi mbala mosi, mbala tatu mono vandaka na masua ya kufwa, mpimpa mosi ye mwini mosi mono vandaka mu mbu.

²⁶ Mono zietaka mbala mingi, mono monaka mpasi mu banzadi, mpasi sambu na mintani, mpasi sambu na kikanda ya mono, mpasi sambu na bapaien, mpasi mu mbanza, mpasi mu ntoto ya mpamba, mpasi mu mbu mpasi nakati bampangi ya luvunu, 2 Kol. 6:4; Ngal. 2:4; 2 Tim. 3:11

²⁷ mu kisalu ye mpasi, mu tomatala mbala mingi, mu nzala ye kiwini, mu konda ya madia mbala mingi, mu madidi ye kinkonga. Bis. 20:31; 1 Tes. 2:9; 2 Tes. 3:8

²⁸ Na zulu na mambu yankaka mingi ya mono tuba ve, kilumbu na kilumbu mono ikele kubanza sambu na mabundu yonso. Bis. 20:12

²⁹ Nani ikele lebakana, ye mono ikele lebakana na yandi ve ? Nani kuta sakuba, ye mono mona mpasi ve ?

³⁰ Kana mono fwiti kuyana, mono tayana mu lebakana ya mono. 2 Kol. 12:5

³¹ Nzambi ye Tata ya Mfumu ya beto Yesu Klisto, yandi ya sakumunwa mvu ya mvu, yandi zaba mono ikele kutuba luvunu ve. Lom. 1:26; 9:5; Ngal. 1:20

³² Mu Damasko, nyadi nanima na ntinu Aleta kengaka mbanza ya bisi Damasko, kusimba mono.

³³ Tuka madidisi ya vandaka na kibaka, bau kulumukaka mono mu kitunga, ye mono tinaka tuka maboko ya yandi.