2 Kolinto 10 - Le Nouveau Testament en Kikwango 1950

Ngolo ya Paulu mu kintumwa ya yandi

¹ Mono kibeni Paulu bombidila beno mu nlemvo ya Klisto ye nlembami ya yandi, mono ikele kudikulumusa na luse ya beno, kansi bu mono ikele na beno ve, mono ikele na kikesa kwa beno. Yes. 42:2; Mat. 11:29; 12:19; Lom. 12:1; 1 Kol. 1:10

² Mono lomba beno, na mono lenda kutula kikesa ve bu mono ikele na beno, bonso mono fwiti kusala kwa bankaka ya banza beto tambulaka mpilamosi mu nsuni.

³ Kadi kana beto ikele kutambula mu nsuni, kansi beto ikele kunwana ve bonso mu nsuni.

⁴ Kadi bima ya beto ya mvita ikele ya kinsuni ve, kansi ya ngolo mu Nzambi, kupasula sika ya ngolo. Ef. 6:13

⁵ Mu yo beto ikele kupasula makani ye bima yonso ya kuditombolo kuluta nzailu ya Nzambi, beto ikele kutwala mabanza yonso mu kimpika ku lemvukilu ya Klisto.

⁶ Beto diyidika kuvutula ndinda kwa bakolami yonso, bu lemvukilu ya beno talunga.

⁷ Beno tala bima ya monika. Kana muntu tula vuvu mu yandi kibeni, na yandi ikele Klisto, bika yandi banza diaka mu yandi kibeni, bonso yandi ikele ya Klisto, buna beto mpe. 1 Kol. 14:37

⁸ Kadi kana mono lenda kuluta kuyana sambu na ngolo ya beto, ya Nzambi pesaka kutunga beno, ikele ve kupasula beno, mono ikele kuwa nsoni ve, 2 Kol. 12:6; 13:10

⁹ beno banza ve, mono zola kutitisa beno mu minkanda ya mono.

¹⁰ Kadi bau tuba: Minkanda ya yandi ikele kizitu ye ngolo, kansi kana yandi monika, nitu ya yandi ikele lebakana ye ndinga ya yandi ikele mpamba.

¹¹ Muntu ya mpilayai, bika yandi zaba bonso beto ikele kutuba mu mambu ya minkanda bu beto ikele ve, buna beto ikele mu bifu, bu beto ikele. 2 Kol. 12:20; 13:2, 10

¹² Kadi beto lenda ve kuditanga keti kuditeza na bankaka ya bau ya dizitisa, kansi bu bau kibeni diteza na kitezo ya bau kibeni ye ditanga na bau kibeni, bau konda ngangu. 2 Kol. 3:1; 5:12

¹³ Beto luta kuyana ve, kansi bonso kitezo ya Nzambi tezilaka kwa beto ikele kitezo ya kuma ti beno. 2 Kol. 11:18; 12:5; 1 Kol. 12:11

¹⁴ Kadi beto luta kitezo ve, bonso bu beto kumaka kwa beno ve; kadi beto kumaka ti beno mu nsamu mbote ya Klisto,

¹⁵ beto yana ve ya luta kitezo ya beto mu kisalu ya bankaka, kansi beto ikele na vuvu bu lukwikilu ya beno kwiza nene, beto tazitiswa mu beno bonso kitezo ya beto ti ya luta,

¹⁶ kusamuna nsamu mbote mu nsi nantwala na beno, ye kuyana ve mu kisalu ya bankaka ya bankaka imene kusala.

¹⁷ Kansi yandi ya yana, bika yandi kuyana mu Mfumu. Yes. 65:16; Yel. 9:23; 1 Kol. 1:31

¹⁸ Kadi ikele ve yandi ya dizitisa ya ikele kubakwa, kansi yandi ya Mfumu zitisa. Bing. 27:2; Lom. 2:29; 1 Kol. 4:5