2 Kolinto 1 - Le Nouveau Testament en Kikwango 1950

Nzambi mbombzi ya bantu ya yandi

¹ Paulu, ntumwa ya Yesu Klisto mu luzolo ya Nzambi, ye Timoteo, mpangi ya beto, fidisa mbote kwa dibundu ya Nzambi ya ikele mu Kolinto ye kwa banlongo yonso ya ikele mu Akaya yamvimba. 1 Kol. 1:1

² Nlemvo kwa beno ye yenge ya katuka na Nzambi, Tata ya beto, ye Mfumu Yesu Klisto.

³ Nsakumunu kwa Nzambi ye Tata ya Mfumu ya beto Yesu Klisto, Tata ya nkenda ye Nzambi ya mbombolo yonso. Ef. 1:3; Lom. 15:5; 1 Pet. 1:3

⁴ Yandi ya bomba beto mu mpasi yonso ya beto, na beto lenda kubomba bau ya ikele na mpasi mutindu yonso mu mbombolo ya beto kibeni ikele kubombwa mu Nzambi. 2 Kol. 7:6

⁵ Kadi bonso mpasi ya Klisto ikele mingi mu beto, buna mbombolo ya beto ikele mingi mu Klisto. Kolo. 1:24; 2 Kol. 4:10; Nk. 34:19; 94:19

⁶ Kana beto moniswa mpasi, yo ikele kwa mbombolo ya beno ye mpulusu ya beno, kana beto bombwa yo ikele kwa mbombolo ya beno, yo ikele kubasisa mvibudulu mu mpasi, ya beto ikele kumoniswa mpe. Ye vuvu ya beto mu beno ikele kuvanda, 2 Kol. 4:15

⁷ sambu na beto, zaba, bonso beno ikele na kintuadi mu mpasi, buna beno ikele mu mbombolo mpe. Fili. 3:10

⁸ Bampangi, beto zola ve, beno konda kuzaba mpasi ya beto monaka mu Asia, bu beto tulwaka kizitu ya luta ngolo ya beto, ye beto banzaka beto takufwa.

⁹ E, beto kibeni vandaka na mabanza, na beto takufwa kaka, na beto tatula vuvu mu beto kibeni ve, kansi mu Nzambi ya fulukisa bafwa. Yel. 17:5, 7

¹⁰ Yandi ya vulusaka beto tuka lufwa yina ya nene, yandi tavulusa beto; mu yandi beto imene kutula vuvu ya beto, na yandi tavulusa beto diaka. 2 Tim. 4:18

¹¹ Beno mpe sadisa beto mu lombilu ya beno, sambu na nlemvo ya peswaka kwa beto mu lusadusu ya bantu mingi, mingi tavutula matondo sambu na beto. Lom. 15:30; Fili. 1:19; File. 22

Ntambulu ya Paulu vandaka na vedila ye kwikama

¹² Kadi luyanu ya beto ikele yai, kitemo ya kansansa ya beto, beto tambula mu nsi ye nakati na beno mu nlongo ya kieleka ya Nzambi, mu ngangu ya kinsuni ve, kansi mu nlemvo ya Nzambi. 1 Kol. 2:4, 13; 2 Kol. 6:6

¹³ Kadi beto ikele kusonika kwa beno mambu yankaka ve, kansi ya beno tangaka ye ya beno bakaka. Mono ikele kutula vuvu, na beno tabaka yau ti nsuka,

¹⁴ bonso beno yantikaka kubaka beto ndambu, na beto ikele nkembolo ya beno, bonso beno mpe ikele nkembolo ya beto mu lumbu ya Mfumu ya beto Yesu. 2 Kol. 5:12; Fili. 2:16; 4:1; 1 Tes. 2:19; 1 Kol. 1:8

Mambu ya bikisaka yandi kwenda kwa bantu ya Kolinto

¹⁵ Mu vuvu yina mono zolaka ntete kwiza kwa beno, na beno lenda kubaka nlemvo yankaka,

¹⁶ ye luta beno, bu mono kwenda ku Makedonia, ye katuka na Makedonia ye kwiza kwa beno, na beno lenda kusindika mono na nzila ku Yuda. 1 Kol. 16:5

¹⁷ Sambu na yai, bu mono zolaka mpilayai, mono songaka mambu ya kusakana ? Mambu ya mono zola kusala, mono ikele kusala yau mu kinsuni ? na yo tavanda e, e, ye ve, ve mu ntangu mosi ? Mat. 5:37; Yak. 5:12

¹⁸ Kansi bonso Nzambi ikele kwikama, buna mambu ya beto kwa beno vandaka ve, e ye ve. 1 Kol. 1:9

¹⁹ Kadi Mwana ya Nzambi, Yesu Klisto, ya beto samunaka kwa beno, mono ye Silvano ye Timoteo, vandaka ve e ye ve, kansi mu yandi ikele e.

²⁰ Kadi bansilulu yonso ya Nzambi ikele e mu yandi, ye mu yandi amen, na Nzambi lenda kukembiswa mu beto.

²¹ Yandi ya siamisa beto sikamosi na beno mu Klisto ye sitaka beto, ikele Nzambi. 1 Kol. 1:8

²² Yandi tulaka beto kidimbu mpe, ye pesaka beto Mpeve ya yandi, bonso kidimbu mu ntima ya beto. 2 Kol. 5:5; Ef. 1:13; 4:30

²³ Mono ikele kubinga Nzambi kuvanda ntemo kwa mwela ya mono, sambu na kukeba beno, mono kwiza ve ku Kolinto.

²⁴ Beto ikele bamfumu ya lukwikilu ya beno ve, kansi beto ikele bansadisi ya beno mu kiese ya beno; kadi mu lukwikilu beno ikele kutelema. 1 Pet. 5:3; 1 Kol. 3:5