1 Yoane 5 - Le Nouveau Testament en Kikwango 1950

Zola Nzambi ye bampangi

¹ Konsonani ya kwikila na Yesu ikele Klisto, butukaka kwa Nzambi; konsonani ya zola yandi ya butaka yandi, zola mpe yandi ya butwaka kwa yandi. Yoa. 1:12; 1 Yoa. 4:2

² Mu yai beto zaba beto zola bana ya Nzambi, bu beto zola Nzambi ye sala bansikudukusu ya yandi.

³ Kadi yai ikele zola ya Nzambi, na beto keba bansikudukusu ya yandi, ye bansikudukusu ya yandi ikele kizitu ve. Mat. 11:29; Yoa. 14:15; 15:10; 2 Yoa. 6

⁴ Kadi konso nki ya butwaka kwa Nzambi ikele kuluta nsi ngolo; nunga ya ikele kuluta nsi ngolo ikele yai, lukwikilu ya beto. Yoa. 16:33

⁵ Nani ikele yandi ya luta nsi ngolo, kansi kaka yandi ya kwikila Yesu ikele Mwana ya Nzambi ? 1 Kol. 15:57; 1 Yoa. 4:4

Kitemo ya masa ye menga ye mpeve

⁶ Yai ikele yandi ya kwizaka mu masa ya mu menga, ikele Yesu Klisto, mu masa kaka ve, kansi mu masa ye menga. Ye Mpeve ikele kutuba kitemo, kadi Mpeve ikele kieleka.

⁷ Kadi ikele tatu ya tuba kitemo:

⁸ Mpeve ye masa ye menga, bau tatu ikele kutuba kitemo mosi.

⁹ Kana beto baka kitemo ya bantu, kitemo ya Nzambi luta nene, kadi kitemo ya Nzambi ikele yai, na yandi tubaka kitemo sambu na Mwana ya yandi.

¹⁰ Yandi ya kwikila Mwana ya Nzambi ikele na kitemo mu yandi kibeni. Yandi ya kwikila Nzambi ve, imene kukitula yandi nkwa luvunu, sambu na yandi kwikila ve mu kitemo ya Nzambi tubaka sambu na Mwana ya yandi.

¹¹ Kitemo ikele yai; na Nzambi pesaka beto moyo ya mvu ya mvu, moyo yai ikele mu Mwana ya yandi. Yoa. 1:4; 1 Yoa. 2:25

¹² Yandi ya ikele na Mwana, ikele na moyo; yandi ya ikele na Mwana ya Nzambi ve ikele na moyo ve. Yoa. 3:36; 14:6

Lombilu ikele kuwilwaka

¹³ Mambu yai mono sonikaka kwa beno ya kwikila mu nkumbu ya Mwana ya Nzambi, na beno lenda kuzaba beno ikele na moyo ya mvu ya mvu. Yoa. 20:31

¹⁴ Yai ikele vuvu ya ikele na beto mu yandi: Kana beto lomba konsokima bonso ikele luzolo ya yandi, yandi kuwa beto. Yoa. 15:7; 1 Yoa. 3:22

¹⁵ Kana beto zaba yandi ikele kuwa beto mu yonso ya beto ikele kulomba, buna beto zaba, beto imene kubaka yina ya beto lombaka kwa yandi.

¹⁶ Kana muntu mona mpangi ya yandi kusala masumu ya ikele lunga lufwa ve, yandi talomba, ye Nzambi tapesa yandi moyo kwa bau ya salaka masumu ya lunga na lufwa ve. Masumu ya lunga lufwa ikele; mono ikele kutuba ve na bau lomba Nzambi sambu na yau. 4 Mose 15:30; Mat. 12:31; Eb. 6:4; 10:26

¹⁷ Mambu yonso ya konda lunungu ikele masumu, masumu yankaka kwa ikele ya lunga ve na lufwa. 1 Yoa. 3:4

¹⁸ Beto zaba, konsonani ya butwa kwa Nzambi ikele kusala masumu ve, kansi yandi ya butwa ya Nzambi ikele kudikeba ye nkwa mbi lenda kusimba yandi ve.

¹⁹ Beto zaba beto ikele ya Nzambi, ye nsi yamvimba ikele kulala mu nkwa mbi.

²⁰ Kansi beto zaba, Mwana ya Nzambi imene kwiza, ye pesaka beto ngangu, na beto zaba yandi ya ikele kieleka, ye beto ikele mu yandi ya ikele kieleka, mu Mwana ya yandi Yesu Klisto. Yandi ikele Nzambi ya kieleka ye moyo ya mvu ya mvu.

²¹ Bana ya mono ya fioti, dikeba sambu na biteki.