1 Yoane 4 - Le Nouveau Testament en Kikwango 1950

Kutina bambikudi ya luvunu

¹ Bazolwa, kwikila bampeve yonso yonso ve, kansi meka bampeve, kana bau ikele ya Nzambi, sambu na bambikudi mingi ya luvunu kotaka mu nsi. Mat. 7:15; 24:4; Bis. 20:29; 1 Tes. 3:1; 2 Pet. 2:1; 2 Yoa. 7

² Mu yai beto zaba Mpeve ya Nzambi; konso mpeve ya ndima, Yesu Klisto kwizaka mu nsuni, yandi ikele ya Nzambi. 1 Yoa. 5:1

³ Konso mpeve ya ndima Yesu ve, ikele ya Nzambi ve, yai ikele mpeve ya antiklisto ya beno kuwaka yandi ikele kwiza, yandi ikele mu nsi ntangu yai mpe. 2 Tes. 2:6; 1 Yoa. 2:18, 22

⁴ Beno ikele ya Nzambi bana ya mono ya fioti, beno imene kuluta bau ngolo, sambu na yandi ya ikele mu beno ikele kuluta yandi ya ikele mu nsi.

⁵ Bau ikele ya nsi, mpilayai bau tubaka yina ya nsi, ye nsi ikele kuwa bau. Yoa. 3:31; 15:19

⁶ Beto ikele ya Nzambi, yandi ya zaba Nzambi ikele kuwa beto, yandi ya ikele ya Nzambi ve ikele kuwa beto ve. Mu yai beto zaba mpeve ya kieleka ye mpeve ya luvunu. Yoa. 8:47; 10:27

Beto fwiti kuzola, kadi Nzambi zolaka beto

⁷ Bazolwa, bika beto zolana, kadi zola ikele ya Nzambi; konsonani ya zola yankaka, yandi butwa ya Nzambi, ye zaba Nzambi.

⁸ Yandi ya zola yankaka ve zaba Nzambi ve, kadi Nzambi ikele zola.

⁹ Mu yai zola ya Nzambi moniswaka kwa beto, sambu na Nzambi fidisaka Mwana ya yandi mosi kaka mu nsi, na beto lenda kuvanda na moyo mu yandi. Yoa. 3:16; Lom. 5:8; 8:32; 1 Yoa. 3:16

¹⁰ Mu yai ikele zola, na beto zolaka Nzambi ve, kansi yandi zolaka beto ye fidisaka Mwana ya yandi kuvanda nkailu ya vidisa masumu ya beto. Yoa. 15:16; Lom. 3:24; 2 Kol. 5:19; 1 Yoa. 4:19

¹¹ Bazolwa, kana Nzambi zolaka beto mpilayai, buna beto fwiti kuzolalia. Yoa. 15:12; 1 Yoa. 3:16

¹² Muntu monaka Nzambi ve ta mbala mosi, kana beto zolana, Nzambi ikele kuvanda mu beto, ye zola ya yandi lunga mu beto. 2 Mose 33:20; 5 Mose 4:12; Yoa. 1:18; 1 Tim. 1:17; 6:16; 1 Yoa. 2:5

¹³ Mu yai beto zaba beto ikele kuvanda mu yandi ye yandi mu beto, sambu na yandi pesaka beto Mpeve ya yandi. 1 Yoa. 3:24

¹⁴ Beto monaka ye beto ikele kutuba kitemo na Tata fidisaka Mwana ya yandi kuvanda Mvulusi ya nsi. Yoa. 1:14; 3:16; 12:47; 1 Yoa. 1:1

¹⁵ Konsonani ya ndima, Yesu ikele Mwana ya Nzambi, Nzambi ikele kuvanda mu yandi ye yandi mu Nzambi. 1 Yoa. 2:23

¹⁶ Beto zaba ye kwikila zola ya Nzambi kwa beto. Nzambi ikele zola, yandi ya ikele kuvanda mu zola, ikele kuvanda mu Nzambi, ye Nzambi ikele kuvanda mu yandi.

Zola ya lunga

¹⁷ Mu yai zola imene kulungiswa mu beto, na beto lenda kuvanda na kikesa mu kilumbu ya mfundusu, kadi bonso yandi ikele, buna beto ikele mpe mu nsi yai. Yoa. 15:10; Yak. 2:13

¹⁸ Boma ikele ve mu zola, kansi zola ya lunga ikele kukatula boma, sambu na boma ikele kumonisa mpasi, yandi ya ikele na boma lunga ve mu zola.

¹⁹ Beto zola, sambu na Nzambi zolaka beto ntete.

²⁰ Kana muntu tuba: Mono zola Nzambi, kansi yandi ikele na makasi na mpangi ya yandi, yandi ikele nkwa luvunu. Kadi yandi ya zola mpangi ya yandi ve ya yandi ikele kumona, mpila nki yandi lenda kuzola Nzambi ya yandi konda kumona.

²¹ Beto ikele na nsikudukusu yai tuka yandi: Yandi ya zola Nzambi, bika yandi zola mpangi ya yandi mpe.