1 Yoane 3 - Le Nouveau Testament en Kikwango 1950

Vanda mbote mu Nzambi

¹ Tala, zola ya nene ya Tata zolaka beto, na beto bingwa bana ya Nzambi, ye beto ikele yina mpe, sambu na yai nsi zaba beto ve, kadi yo zabaka yandi ve. Yoa. 1:12; 16:3

² Beno bazolwa, beto ikele bana ya Nzambi kansi yo imene kumonika ve mpila nki beto tavanda. Beto zaba bu yandi monika beto tavanda mpilamosi yandi, kadi beto tamona yandi bonso yandi ikele. Lom. 8:8; 1 Kol. 15:49; Fili. 3:21; Kolo. 3:4; 2 Pet. 1:4

³ Konso muntu ya ikele na vuvu yai mu yandi, tadivedisa bonso yandi ikele ya vedila.

⁴ Konso muntu ya sala masumu, yandi ikele kufwa nsiku mpe, sambu na masumu ikele kufwa ya nsiku. Yoa. 5:17

⁵ Beno zaba yandi monikaka kukatula masumu, ye mu yandi masumu ikele ve. Yes. 53:4, 9; 2 Kol. 5:21; 1 Pet. 2:22, 24

⁶ Konso muntu ya ikele kuvanda mu yandi ikele kusala masumu ve, konsomuntu ya ikele kusala masumu imene kumona yandi ve keti kuzaba yandi ve. 1 Yoa. 2:3; 3 Yoa. 11

Diswaswana mu bana Nzambi ye bana ya diable

⁷ Beno bana ya mono ya fioti, bika muntu vengumuna beno ve. Yandi ya ikele kusala lunungu ikele lunungu bonso yandi ikele nkwa lunungu. 1 Yoa. 2:29

⁸ Yandi ya sala masumu ikele ya diable, kadi diable salaka masumu tuka luyantiku. Sambu na mambu yai, Mwana ya Nzambi monikaka na yandi lenda kufwa kisalu ya diable. Nk. 68:20; Yoa. 8:44

⁹ Konsonani ya butwa ya Nzambi ikele kusala masumu ve, kadi nkuna ya yandi ikele kuvanda mu yandi; ye yandi lenda ve kusala masumu, sambu na yandi butwa ya Nzambi. 1 Pet. 1:23; 1 Yoa. 5:18

¹⁰ Mu mambu yai bana ya Nzambi ye bana ya diable ikele kumonika; konsonani ya sala lunungu ve ikele ya Nzambi ve ye konsonani ya zola ve mpangi ya yandi.

¹¹ Kadi yai ikele nsamu ya beno kuwaka tuka luyantiku, na beto tazolana. Yoa. 15:12; 1 Tes. 4:9; 1 Yoa. 2:7

¹² bonso Kaini ve ya vandaka ya nkwa mbi, ye kufwaka mpangi ya yandi. Sambu na nki yandi kufwaka yandi ? Sambu na bisalu ya yandi vandaka mbi, ye ya nleke ya yandi vandaka ya lunungu. 1 Mose 4:8; Eb. 11:4

¹³ Bampangi, yitika ve kana nsi ikele na kimbeni na beno. Yoa. 15:18; 17:14

Zola ya kieleka bonso yo ikele

¹⁴ Beto zaba beto imene kukatuka na lufwa ye imene kukota mu moyo, sambu na beto zola bampangi. Yandi ya zola ve ikele kuvanda mu lufwa. Yoa. 5:24; 1 Yoa. 2:9

¹⁵ Konsonani ya ikele na kimbeni na mpangi ya yandi ikele mufwi ya bantu; ye beno zaba mufwi ya bantu ikele na moyo mvu ya mvu ve mu yandi. Ngal. 5:21

¹⁶ Mu yai beto zaba zola, sambu na yandi pesaka moyo ya yandi sambu na beto; beto mpe fwiti kupesa moyo ya beto sambu na bampangi. Yoa. 16:12; Lom. 5:8; Ef. 6:2; 1 Yoa. 4:9

¹⁷ Kansi konsonani ya ikele na bima ya nsi yai ye yandi mona mpangi ya yandi ikele na nsatu, kansi yandi kanga ntima ya yandi, mpila nki zola ya Nzambi ikele kuvanda mu yandi ? 5 Mose 15:7; Luk. 3:11; Yak. 2:15; 1 Yoa. 4:20; 5:1

¹⁸ Bana ya mono ya fioti, bika beto zola ve mu mambu ye ludimi; kansi mu bifu ye mu kieleka.

¹⁹ Mu yai beto tazaba beto ikele ya kieleka, ye beto kwikidisa ntima ya beto nantwala na yandi.

²⁰ Kadi kana ntima ya beto ikele kubedisa beto, Nzambi luta ntima ya beto nene, ye zaba mambu yonso.

²¹ Bazolwa, kana ntima bedisa beto ve, buna beto ikele na kikesa kwa Nzambi.

²² Konsonki ya beto lomba, beto tabaka tuka yandi, sambu beto keba bansikudusu ya yandi ye sala mambu ya yangidisa yandi.

²³ Yai ikele nsikudukusu ya yandi, na beto fwiti kukwikila nkumbu ya Mwana ya yandi Yesu Klisto ye zolana, bonso yandi pesaka beto nsikudukusu.

²⁴ Yandi ya ikele kukeba bansikudukusu ya yandi, ikele kuvanda mu Nzambi ye Nzambi mu yandi. 386 Mu yai beto zaba yandi ikele kuvanda mu beto, sambu na Mpeve ya yandi pesaka beto. Yoa. 14:23; 15:10; Lom. 8:9; 1 Yoa. 4:12