1 Yoane 2 - Le Nouveau Testament en Kikwango 1950

Nzailu ya kieleka mu Nzambi

¹ Bana ya mono ya fioti, mono ikele kusonika kwa beno, mambu yai na beno tasala masumu ve. Kana muntu sala masumu, beto ikele na nsadisi kwa Tata, ikele Yesu Klisto, nkwa lunungu. Lom. 8:34; 1 Tim. 2:5; Eb. 7:25; 9:24

² Yandi ikele nkailu ya vidisa masumu ya beto, ye ya beto kaka ve, kansi masumu ya nsi yamvimba. 2 Kol. 5:18; Kolo. 1:20

³ Mu mambu yai beto zaba na beto zaba yandi, kana beto keba bansikudukusu ya yandi.

⁴ Yandi ya tuba: Mono zaba yandi, kansi yandi ikele kukeba ve bansikudukusu ya yandi, yandi ikele nkwa luvunu, ye kieleka ikele mu yandi ve. 1 Yoa. 1:6

⁵ Kansi konsonani ya keba mambu ya yandi, mu yandi kieleka zola ya Nzambi imene kulunga. Sambu na yai, beto zaba beto ikele mu yandi. Yoa. 14:21, 23

⁶ Yandi ya tuba yandi ikele kuvanda mu yandi, yandi kibeni fwiti kutambula bonso yandi tambulaka. Mat. 11:29; Yoa. 13:15; 15:4; Fili. 2:6; 1 Pet. 2:21

Nsikudukusu yampa

⁷ Bazolwa, mono ikele kusonika kwa beno ve nsikudukusu yampa, kansi nsikudukusu ya nkulu ya vandaka na beno tuka luyantiku; nsikudukusu ya nkulu ikele mambu ya beno imene kuwaka. 1 Yoa. 3:11; 2 Yoa. 5

⁸ Diaka mono sonika kwa beno nsikudukusu yampa, yo ikele kieleka mu yandi ye mu beno; sambu na tombe ikele kuluta, ye mwini ya kieleka ikele kukienzula. Yoa. 8:12; 13:14; Lom. 13:12

⁹ Yandi ya tuba yandi ikele mu mwini, kansi yandi ikele na kimbeni kwa mpangi ya yandi, yandi ikele mu tombe ti ntangu yai. 1 Kol. 13:2; 1 Yoa. 3:14; 4:20

¹⁰ Yandi ya zola mpangi ya yandi ikele kuvanda mu mwini, ye tesa sakuba ikele mu yandi ve.

¹¹ Kansi yandi ya ikele na kimbeni kwa mpangi ya yandi ikele mu tombe ye ikele kutambula mu tombe, yandi zaba ve sika yandi ikele kwenda, kadi tombe imene kufwa meso ya yandi.

Zola nsi yai ve

¹² Beno bana ya mono ya fioti, mono sonika kwa beno: Sambu na masumu ya beno imene kuvidiswa sambu na nkumbu ya yandi.

¹³ Beno batata, mono sonika kwa beno, sambu na beno zaba yandi ya vandaka tuka luyantiku. Beno batoko, mono sonika kwa beno, sambu na beno luta nkwa mbi. Beno bana fioti, mono imene kusonika kwa beno, sambu na beno zaba Tata.

¹⁴ Beno batata, mono imene kusonika kwa beno, sambu na beno zaba yandi ya vandaka tuka luyantiku. Batoko mono imene kusonika kwa beno sambu na beno ikele na ngolo, ye mambu ya Nzambi ikele kuvanda mu beno, ya beno imene kuluta nkwa mbi.

¹⁵ Zola nsi ve ye bima ya ikele mu nsi ve. Kana muntu zola nsi, zola ya Tata ikele mu yandi ve. Lom. 12:2; Yak. 4:4

¹⁶ Kadi yonso ya ikele mu nsi, zola ya nsuni, zola ya meso ye lulendo ya luzingu yai, katuka na Tata ve, kansi yo ikele ya nsi.

¹⁷ Nsi tavila ye zola ya yau, kansi yandi ya sala luzolo ya Nzambi tavanda mvu ya mvu. Yes. 40:6; 1 Kol. 7:31

Tina bantu ya ikele kubuya Klisto

¹⁸ Bana fioti, yai ikele ntangu ya nsuka, ye beno imene kuwa antiklisto ikele kwiza, ntangu yai mpe baantiklisto mingi ikele, mpilayai beto zaba, yai ikele ntangu ya nsuka. Mat. 24:24; 2 Tes. 2:3

¹⁹ Bau katukaka nakati na beto, kansi bau vandaka ve ya beto; kana bau vandaka ya beto, bau zola kuvanda na beto, kansi bau imene kukatuka, na bau lenda kumonika, na bau yonso vandaka ve ya beto. Nk. 41:9; Bis. 20:30; 1 Kol. 11:19

²⁰ Kansi beno sitwa mafuta tuka Nkwa Nlongo, ye beno yonso ikele na nzailu. 1 Yoa. 2:27

²¹ Mono sonikaka kwa beno ve sambu na beno konda kuzaba mambu ya kieleka, kansi sambu na beno zaba yau, ye sambu na luvunu ikele ve mu mambu ya kieleka.

²² Nani ikele nkwa luvunu, ikele yandi kaka ve, ya ikele kutuba, Yesu ikele Klisto ve ? Muntu ya ikele kubuya Tata ye Mwana, yandi ikele antiklisto. 1 Yoa. 4:3; 2 Yoa. 7

²³ Konsonani ya ikele kubuya Mwana, yandi ikele mu Tata ve, kansi muntu ya ikele kundima Mwana, yandi ikele mu Tata mpe. Yoa. 15:23; 1 Yoa. 4:15

Bombidila sambu na bau keba mambu bau kuwaka

²⁴ Mambu ya beno kuwaka tuka luyantiku, bika yau vanda mu beno. Kana mambu yina ya beno kuwaka tuka luyantiku vanda mu beno, buna beno mpe tavanda mu Mwana ye mu Tata.

²⁵ Yai ikele nsilulu ya yandi silaka beto, ikele moyo ya mvu ya mvu.

²⁶ Mono sonikaka kwa beno mambu yai sambu na bantu ya zola kuvengumuna beno.

²⁷ Kansi sitwa ya mafuta ya beno bakaka tuka yandi ikele kuvanda mu beno, mpilayai beno ikele na nsatu ve na muntu longa beno, kansi sitwa ya mafuta yina ikele kulonga beno mambu yonso, yo ikele kieleka ye luvunu ve, bonso yo longaka beno, mpilayai beno vanda mu yandi. Yel. 31:34; Yoa. 14:26; 16:13

²⁸ Ntangu yai beno bana fioti ya mono, vanda mu yandi mpilayai bu yandi monika, beto lenda kuvanda na kikesa, ye tamona nsoni ve na luse ya yandi bu yandi kwiza. 1 Yoa. 4:17

²⁹ Kana beno zaba, yandi ikele lunungu, beno zaba mpe konso muntu ya sala lunungu butwa ya yandi. 1 Yoa. 3:7, 9