1 Timoteo 6 - Le Nouveau Testament en Kikwango 1950

Kubedisa ya mutindu ye mutindu

¹ Bantu yonso ya ikele mu kimpika nansi na vangu, bika bau kutanga bamfumu ya bau lunga na luzitu yonso, na nkumbu ya Nzambi ye malongi lenda kutubwa mbi ve. Ef. 6:5; Kolo. 3:22; Tit. 2:9; Yak. 2:7; 1 Pet. 2:18

² Bau ya ikele na bamfumu ya kwikila, bika bau kusaula bau ve, kadi bau ikele bampangi, kansi bika bau luta kusadila bau, sambu na bau ya ikele na kintuadi na mambu ya mbote ikele ya kwikama ye ya zolwa. Longa mambu yai, ye songa yau. 1 Tim. 4:11; Tit. 2:15; File. 16

³ Kana muntu longa malongi yankaka, ye kwikila ve malongi ya kieleka, ya ikele ndinga ya Mfumu ya beto Yesu Klisto, ye malongi ya kufwana vumi ya Nzambi.

⁴ Yandi ikele na lulendo, ye kuzaba kima ve, ye ikele kutula biuvu, ye ntembe, yau ikele kubasisa kimpala, mvita, mafingu, ye mabanza ya mbi, 1 Kol. 8:2; 2 Tim. 2:14

⁵ kuswana ya makasi ya bantu ya sumuka mu mabanza, ye ya konda mambu ya kieleka, bau banza na vumi ya Nzambi ikele ndandu. Lom. 16:17; 2 Tim. 2:23; 3:8; Tit. 1:11; 3:9

⁶ Kansi vumi ya Nzambi sikamosi na matondo ya ntima ikele ndandu ya nene. Bing. 15:16; 1 Tim. 4:8

⁷ Kadi beto twalaka kima ve mu nsi yai, ye beto lenda kunata kima ve, bu beto katuka na yo.

⁸ Kansi kana beto ikele na bima ya kudia, ye ya kuvwata, beto tavanda na matondo mu ntima. Mat. 6:25; Eb. 13:5

Luzolo ya bima takotisa bantu mingi mu mambu ya mbi

⁹ Kansi bau ya zola kuvanda kimvwama ikele kubwa mu mpukumunu ye siongi ye luzolo mingi ya buzoba ye ya mbi, yau takotisa bantu mingi mu mpasi ya ngolo ye mu lufwa. Bing. 11:28; 28:20; Mat. 13:32; Mal. 10:20; Luk. 16:19; Yak. 5:1

¹⁰ Kadi zola ya mbongo ikele mwanzi ya mbi mutindu yonso, bankaka ya sosaka yau imene kuvila nzila ya lukwikilu, ye bau imene kuditobola na ntantu mingi. Bing. 15:16; Luk. 12:15

Nsikudukusu kwa Timoteo ye kwa bamvwama

¹¹ Kansi nge, muntu ya Nzambi, tina mambu yai, ye landa lunungu, vumi ya Nzambi, lukwikilu, zola, mvibudulu, ye nlembami.

¹² Nwana mvita ya mbote ya lukwikilu. Simba moyo ya mvu ya mvu; mu yo nge bingwaka, ye songaka kitemo ya mbote nantwala na bantemo mingi. 1 Kol. 9:24; Fili. 3:13; 2 Tim. 4:7

¹³ Mono sikidikisa nge nantwala na Nzambi, ya pesa bima yonso moyo, ye Klisto Yesu ya tubaka kitemo ya mbote nantwala na Pontio Pilatu, Lom. 4:17; 1 Tim. 5:21

¹⁴ na nge fwiti kukeba nsikudukusu yai, ye konda tona ye konda lusembo, ti kumonika ya Mfumu ya beto Yesu Klisto. Tit. 2:13

¹⁵ Yandi tamonika mu ntangu ya yandi sola, yandi ikele nyadi mosi ya nsakumunu, Ntinu ya bantinu ye Mfumu ya bamfumu. 5 Mose 10:17; 1 Tim. 1:17; Tit. 2:13; Nzai. 17:14; 19:16

¹⁶ Yandi mosi kaka konda kufwa, yandi ikele kuvanda mu mwini, ya bantu lenda kwiza mfinama na yo ve, muntu imene kumona yo ve, ye lenda kumona yo ve, kwa yandi nzitusu ye ngolo ya mvu ya mvu. Amen 2 Mose 33:20; Yel. 1:18; 2 Tim. 4:18; 1 Yoa. 4:12, 20

¹⁷ Sikidikisa bamvwama ya nsi yai, na bau kuditombola ve, keti kutula vuvu mu kimvwama ya lenda kuvila, kansi kutula vuvu mu Nzambi. Yandi ya pesa beto bima yonso mu kimvwama kuyangidisa beto. Yobi 31:24; Nk. 62:10; Mal. 4:19; 10:23; Luk. 12:15, 20; Yak. 5:1

¹⁸ Songa bau kusala mbote, ye vanda kimvwama mu bisalu ya mbote, na bau lenda kukaba ye kupesa mu zola. Ngal. 6:9

¹⁹ Ye dilundila bima, ya tavanda lufulu ya mbote, kwa bilumbu ya ikele kwiza, kubaka moyo ya kieleka. Mat. 6:20; Luk. 16:9

²⁰ O, Timoteo, lunda mambu ya peswaka kwa nge; buya bitubatuba ya nsomi, ntembe ya mpamba ya bingwa ya ngangu, kansi yo ikele ya ngangu ya luvunu. 1 Tim. 1:4; 4:7; 2 Tim. 1:14; Tit. 1:14; 3:9

²¹ Kansi bankaka ya kwikilaka mambu yai imene kuvila tuka lukwikilu. Nlemvo vanda na beno. 2 Tim. 2:18