1 Timoteo 5 - Le Nouveau Testament en Kikwango 1950

Kubedisa ya nlembami

¹ Semba ve muntu ya imene kununa, kansi bombidila yandi bonso tata, ye batoko bonso bampangi. 3 Mose 19:32

² Bankento ya nuna bonso bangudi, bankento ya nleke bonso bampangi bankento, mu ntima ya vedila yonso.

Bonso bafwola fwiti kusadiswa

³ Zitisa bafwola ya ikele bafwola kieleka.

⁴ Kansi kana fwola ikele na bana, keti bana ya bana ya yandi, bika bau longuka ntete kusonga nkenda kwa bibutu ya bau, ye kusadisa batata ye bangudi ya bau, mambu yai ikele mbote nantwala na Nzambi. 1 Tim. 2:3; 5:16

⁵ Kansi yandi ya ikele fwola kieleka, ye ikele kinsona, ikele kutula vuvu mu Nzambi, ye vibidila mu mbombodolo ye lombilu mu mpimpa ye mwini. Yel. 49:11; Luk. 2:36; 1 Kol. 7:32

⁶ Kansi yandi ya zola kuyangalala ya ntoto, ikele ya kufwa bu yandi ikele na moyo.

⁷ Sikidikisa mambu yai mpe, na bau lenda kukondwa lusembo.

⁸ Kansi kana muntu buya kusadisa bibutu ya yandi, ye ya luta bantu ya nzo ya yandi kibeni, yandi imene kubuya lukwikilu, ye yandi luta mbi na muntu ya konda lukwikilu.

⁹ Sonika ve fwola ya lunga ve mvu makumi sambanu, yandi ya vandaka nkento ya bakala mosi kaka,

¹⁰ ye yandi ikele na kitemo ya kisalu ya mbote; kana yandi imene kusansa bana kana yandi sadisaka banzenza, kana yandi sukulaka makulu ya banlongo, kana yandi sadisaka bambevo, kana yandi imene kuvibidila mu bisalu yonso ya mbote. 1 Pet. 4:9

¹¹ Kansi buya bafwola ya nleke, kadi bu bau imene kwiza madidi kwa Klisto, bau takwela.

¹² Bau imene kubediswa, sambu na bau losaka lukwikilu ya bau ya ntete.

¹³ Ye bau ikele kulonguka mpe kuvanda bumolo, ye kwenda ku nzo na nzo, ye kuvanda na bumolo kaka ve, kansi kuvanda bantu ya bituba-tuba, ya dikotisa mu mambu ya bantu yankaka, ye kutuba mambu ya lunga ve. Tit. 2:3

¹⁴ Mono zola bafwola ya nleke kukwela, kubuta bana, kuyala banzo ya bau, kupesa nzila ve kwa yandi ya mbi, sambu na kufinga.

¹⁵ Kadi bankaka imene kuvengumuka ye kulanda Satana.

¹⁶ Kana nkento ya kwikila ikele na bafwola, bika yandi kusadisa bau, ye tula kizitu yai ve va dibundu, mpilayai yo lenda kusadisa bafwola ya kieleka.

Bonso bambuta fwiti kulongwa mu dibundu

¹⁷ Bambuta ya ikele kuyala mbote, bika bau kuvanda na luzitu ya nene, ye luta kuzitisa bau ya sala mu ndinga ye malongi.

¹⁸ Kadi masonukwa kutuba: Beno kanga ve munoko ya bangombe ya ikele kututa masasi; ye musadi ikele kulunga kubaka lufutu ya yandi. 5 Mose 25:4; Mat. 10:10; Luk. 10:7; 1 Kol. 9:9, 14

¹⁹ Kundima ve kwa mfundu ya mbuta, kansi nantwala na bantemo zole keti tatu kaka.

²⁰ Bau ya sala masumu, semba bau nantwala na bantu yonso, na bankaka mpe tavanda na boma.

²¹ Mono sikidikisa nge nantwala na Nzambi ye Klisto Yesu ye banjo ya solwa, na nge fwiti kukeba mambu yai, ye banza ve muntu luta muntu yankaka, ye sala kima ve ya tula kimpala. 2 Tim. 4:1

²² Tula maboko va muntu nswalu ve, vanda na kintuadi ve na masumu ya bantu yankaka; dikeba ya vedila.

²³ Kunwa masa kaka ve, kansi kunwa ndambu ya vinia sambu na divumu ya nge, ye sambu na lebakana ya ikele na nge ntangu na ntangu.

²⁴ Masumu ya bantu yankaka ikele kumonika ye kwenda nantwala ku mfundusu, ye bankaka ikele kulanda nanima.

²⁵ Mpilayai mpe, bisalu ya mbote ikele kumonika, ye ya mpila nkaka lenda kuswekwa ve.