1 Timoteo 3 - Le Nouveau Testament en Kikwango 1950

Kifu ya bankengi ya dibundu

¹ Yai ikele ndinga ya kwikama, kana muntu tonda kisalu ya nkengi ya dibundu, yandi ikele kutonda kisalu ya mbote.

² Nkengi fwiti kuvanda ve na mambu ya mbi, ye vanda bakala ya nkento mosi kaka; kukolwa na malafu ve, kuvanda na bifu ya mbote, kuvanda na makalele ve, kuzola kusadisa banzenza, ye kuzaba kulonga, Tit. 1:6

³ Munwi ya vinia ve, ye kunwana ve, kansi ya nlembami, ya makalele ve, ya zola mbongo ve, 2 Tim. 2:24

⁴ muntu ya yala nzo ya yandi mbote, ye bana ya yandi ikele kulemvuka na luzitu yonso

⁵ —kansi kana muntu lenda ve kuyala nzo ya yandi kibeni, mpila nki yandi lenda kukeba dibundu ya Nzambi ? —

⁶ Yandi tavanda ve muntu yampa mu lukwikilu; keti yandi tavanda na lulendo ye kubwa mu mbedoso ya Satana.

⁷ Yandi fwiti kuvanda na kitemo ya mbote kwa bau ya ikele nanganda, mpilayai yandi takubwa ve mu nsoni ye siongi ya diable.

Ye basielo ya dibundu

⁸ Mpilayai basielo ya dibundu fwiti kuvanda na luzitu, kuvanda na ndinga zole ve, kuzola malafu ve, kutula luzolo na bima ve.

⁹ Bau fwiti kukebo mambu ya kinsweki ya lukwikilu mu kansansa ya vedila. 1 Tim. 1:19

¹⁰ Kansi bau fwiti kutezwa ntete, nanima bau lenda kusala kisalu ya basielo kana bau ikele na mambu ya mbi ve.

¹¹ Mpilayai, bankento mpe fwiti kuvanda na luzitu, kuvanda na luvunu ve, kukolwa na malafu ve, kuvanda ya kwikama mu mambu yonso.

¹² Basielo ya dibundu fwiti kuvanda babakala ya nkento mosi, ye kuyala bana ya bau ye nzo ya bau mbote.

¹³ Kadi bau ya sala kisalu ya basielo mbote tamonwa luzitu ye baka kikesa mingi mu lukwikilu, ya ikele mu Klisto Yesu. Mat. 25:21

¹⁴ Mambu yai mono sonika kwa nge, sambu na mono ikele na vuvu kwiza kwa nge ntangu yai,

¹⁵ kansi kana mono vingila ndambu mingi, buna nge lenda kuzaba mpila nki kusala mu nzo ya Nzambi, ya ikele dibundu ya Nzambi ya ikele na moyo, yo ikele dikunzi ye lufulu ya mambu ya kieleka.

¹⁶ Kansi kondwa ntembe, vumi ya Nzambi ya kinsweki ikele nene: Nzambi monikaka mu nsuni, yandi nunguswaka mu mpeve, yandi monwaka kwa banjo, yandi samunwaka kwa bapaien, bantu ya nsi kwikilaka yandi, ye yandi bakwaka ku zulu mu nkembo.