1 Timoteo 2 - Le Nouveau Testament en Kikwango 1950

Dibundu fwiti kulombila bantu yonso

¹ Mpilayai mono longa na ntete, mbombodolo, lombilu, tubila, ye kupesa ya matondo tasalwa sambu na bantu yonso,

² sambu na bantinu, ye bantu yonso ya ikele na kisalu ya nene, na beto lenda kuvanda na moyo ya napi ye yenge mu vumi yonso ya Nzambi ye luzitu.

³ Sambu na yai ikele ya mbote ye ya lunga na luse ya Nzambi, Mvulusi ya beto

⁴ yandi ya zola bantu yonso kuvuluswa, ye kwiza kwa ngangu ya kieleka. Yeh. 18:23; 2 Pet. 3:9

⁵ Kadi, Nzambi ikele mosi, ye nwawasi mosi ikele nakati na Nzambi ye bantu, yandi ikele muntu Klisto Yesu, Yel. 17:3; Ngal. 3:19; Eb. 9:15

⁶ yandi dipesaka lufutu kuvulusa bantu yonso, kitemo ya mambu yai tazabakana mu nsungi ya yau. Mat. 20:28; Tit. 2:14

⁷ Sambu na yai, mono tulwaka nsamuni ye ntumwa—mono ikele kutuba kieleka mu Klisto, mono ikele kukusa ve — ye nlongi ya bapaien, mu lukwikilu ye mambu ya kieleka. Bis. 9:15; 13:2; 22:21; Lom. 9:1; 11:13; 15:16; Ngal. 1:15, 16; 2:7; Ef. 3:8; 2 Tim. 1:11

Yandi longa bonso bau fwiti kulomba

⁸ Sambu na yai, mono zola, babakala kulomba mu sika yonso, ye nangula maboko ya nlongo ya konda ye ntembe. Nk. 28:2; 65:3; 134:2

⁹ Mpilayai mpe, mono zola, bankento kuvwata mvwatu ya lunga, mu lulendo ve, ye mambu ya kusakana ve, ye kuvanda na nsuki ya kutunga ve, keti wola, keti matadi nzimbu, keti mvwatu ya ntalu, Tit. 2:3; 1 Pet. 3:2

¹⁰ kansi yina ya lunga na bankento ya ikele na vumi ya Nzambi, mu bisalu ya mbote.

¹¹ Nkento fwiti kulonguka mu napi ye kulemvuka yonso. 1 Mose 3:16; 1 Kol. 14:34; Ef. 5:24

Yandi kanikina bankento sambu na kulonga mu dibundu

¹² kansi mono zola ve, nkento kulonga keti kuyala bakala, kansi yandi tavanda napi.

¹³ Kadi Adami salwaka ntete, nanima Eva. 1 Mose 2:7, 22; 1 Kol. 11:9

¹⁴ Adami yunswaka ve, kansi nkento yunswaka, ye kubwaka mu masumu. 1 Mose 3:6; 2 Kol. 11:3

¹⁵ Kansi yandi tavuluswa mu kubuta ya bana, kana bau vibidila mu lukwikilu ye zola ye mambu ya nlongo, ye mambu ya kusakana ve.