1 Timoteo 1 - Le Nouveau Testament en Kikwango 1950

Luyantiku

¹ Paulu, ntumwa ya Klisto Yesu, bonso nsikudukusu ya Nzambi, Mvulusi ya beto, ye Klisto Yesu, vuvu ya beto, Bis. 9:15; Ngal. 1:1; Tit. 1:1

² fidisa mbote kwa Timoteo, mwana ya mono ya kieleka mu lukwikilu: Nlemvo, nkenda, ye yenge tuka Nzambi, Tata, ye Klisto Yesu, Mfumu ya beto. Lom. 1:7; 1 Kol. 1:2; Ef. 1:1; 1 Tes. 1:1; 2 Tim. 1:1; Tit. 1:4

Paulu luengisa bau sambu na malongi ya nzenza

³ Bonso mono bombidilaka nge kubika mu Efeso, bu mono kwendaka ku Makedonia, na nge lenda kusikidikisa bankaka, na bau talonga ve malongi yankaka

⁴ ye bau takwikila ve bitubatuba ya mpamba, ye nsonokono ya batata ya ikele na nsuka ve, mambu yai ikele kubasisa biuvu, yau ikele kusadisa mambu ya Nzambi ve ya ikele mu lukwikilu. 1 Tim. 4:7; 2 Tim. 2:16, 23; Tit. 1:14; 3:9

⁵ Kansi nsuka ya nsikudukusu ikele zola ya ntima ya vedila, ye kansansa ya mbote ye vuvu ya konda luvunu. Lom. 13:8; Ngal. 5:14; 1 Pet. 1:22

⁶ Mu mambu yai, bankaka imene kuvengumuka, ku bituba-tuba ya mpamba. 1 Tim. 6:4, 20

⁷ Bau tonda kuvanda banlongi ya nsiku, kansi bau zaba ve mambu ya bau ikele kutuba, keti ya bau ikele kulonga.

⁸ Kansi beto zaba, nsiku ikele mbote, kana muntu sala yo mpilamosi nsiku ikele. Lom. 7:12, 14

⁹ Beto zaba yai, nsiku tulwaka ve, sambu na muntu ya lunungu, kansi sambu na bantu ya buya nsiku, ye bakolami, ye bau ya konda kuvumina Nzambi, ye bankwa masumu, ye bantu ya sumuka, ye bafingi ya Nzambi, ye bafwi ya batata ye ya bangudi ye ya bantu Ngal. 3:19; 5:23

¹⁰ ye bankwa bizumba, ye babakala ya salana nsoni, ye bateki ya bantu, ye bantu ya luvunu, ye bau ya kudia ndefi ya luvunu, ye mambu yonso yankaka ya ikele na kimbeni na malongi ya mbote,

¹¹ bonso ikele nsamu mbote ya nkembo ya Nzambi ya nsakumunu, ya tulwaka mu maboko ya mono. Ngal. 2:7; 1 Tes. 2:4

Yandi vutula matondo kwa Nzambi

¹² Mono pesa matondo kwa yandi ya pesa mono ngolo, ikele Klisto Yesu, Mfumu ya beto, sambu na yandi tangaka mono ya kwikama, ye tulaka mono mu kisielo ya yandi,

¹³ ntete mono vandaka kutuba mbi sambu na Nzambi, ye monisi ya mpasi, ye mulwadisi; kansi mono wilwaka nkenda, sambu na mono salaka yau, bu mono zabaka ve, ye bu mono kwikilaka ve. Bis. 8:3; 9:1; 22:4; 26:9; 1 Kol. 15:9; Ngal. 1:13

¹⁴ Kansi nlemvo ya Mfumu ya beto lutaka mingi mu lukwikilu, ye zola ya ikele mu Klisto Yesu. Lom. 5:20; 6:1

¹⁵ Yai ikele ndinga ya kwikama, ye ya lunga kubaka, na Klisto Yesu kwizaka mu nsi, kuvulusa bankwa masumu, nakati na bau mono ikele ya ntete. Yel. 3:17; Mat. 9:13; Mal. 2:17; Luk. 5:32; 19:10

¹⁶ Kansi, sambu na mambu yai, mono wilwaka nkenda, na Klisto Yesu lenda kusonga mvibudulu yonso ya yandi mu mono yikele ya ya ntete, kuvanda kifwani kwa bantu ya takwikila yandi nanima, kubaka moyo ya mvu ya mvu.

¹⁷ Kwa ntinu ya mvu ya mvu, ya lenda kufwa ve, ya ikele kumonika ve, Nzambi mosi kaka, kwa yandi nzitusu ye nkembo mvu ya mvu. Amen. Lom. 16:27; 1 Tim. 6:16

Yandi bedisa Timoteo na kunwana mbote

¹⁸ Nsikudukusu yai mono pesa kwa nge, mwana ya mono Timoteo, bonso mbikudulu ya bikulwaka ntete kwa nge, na nge lenda kunwana mvita ya mbote sambu na yau,

¹⁹ bu nge ikele kukeba lukwikilu ye kansansa ya mbote; bankaka imene kulosa yau, ye imene kuvidisa lukwikilu ya bau.

²⁰ Nakati na bau ikele Imenai ye Alesandelo ya mono pesaka kwa Satana na bau lenda kulongwa kutuba mbi sambu na Nzambi ve.