1 Tesalonika 4 - Le Nouveau Testament en Kikwango 1950

Paulu songa bau ntambulu ya vedila

¹ Mpilayai mu mambu yankaka, bampangi, beto lomba ye bombidila beno mu Mfumu Yesu, bonso beno longukaka kwa beto mpilamosi beno fwiti kutambula ye yangidisa Nzambi, bonso beno ikele kutambula, na beno lenda kuluta mu mambu yai. Fili. 1:27; 2 Tes. 2:12

² Kadi beno zaba nsikudukusu ya beto pesaka beno mu Mfumu Yesu.

³ Kadi yai ikele luzolo ya Nzambi ikele nlongo ya beno na beno bika bizumba, Ef. 5:3

⁴ na muntu na muntu tazaba kubaka nkento ya yandi kibeni mu mambu ya nlongo ye ya nzitusu,

⁵ mu lutondo ya mbi ve, bonso bapaien ya zaba Nzambi ve, 1 Kol. 15:34; Ef. 2:12; 4:17

⁶ muntu tasadila mpangi ya yandi mbi ve mu mambu yai, sambu na Mfumu ikele mvutudi ya ndinda mu mambu yai yonso, bonso beto songaka beno mbote ntete ye songaka kitemo. 1 Kol. 6:8

⁷ Kadi Nzambi bingaka beto ve ku nsumukunu kansi ku mambu yanlongo.

⁸ Buna yandi ya buya ikele kubuya muntu ve, kansi Nzambi ya pesa Mpeve Yanlongo ya yandi kwa beno. Luk. 10:16; Ef. 4:30

⁹ Beno ikele nsatu ve na muntu sonika kwa beno sambu na zola ya kimpangi, sambu na Nzambi ikele kulonga beno kibeni kuzolana, Yoa. 13:34; 15:12; 1 Pet. 4:8; 1 Yoa. 3:11; 4:21

¹⁰ kadi kieleka beno ikele kusala yo kwa bampangi yonso mu Makedonia yamvimba. Kansi, bampangi, beto bombidila beno, na beno taluta mu mambu yai,

¹¹ na beno talonguka sambu na kuvanda napi ye sala kisalu ya beno kibeni, ye sala na maboko ya beno bonso beto sikidikisaka beno, Ef. 4:28; 2 Tes. 3:8, 11

¹² ye beno tatambula mbote kwa bau ya ikele nanganda, na beno takonda kima ye.

Yandi zabisa bau mvutukulu ya Klisto

¹³ Bampangi, beto zola ve beno konda kuzaba sambu na bau ya lala tulu, na beno tavanda na ntantu ve, bonso bankaka ya konda vuvu. Ef. 2:12

¹⁴ Kadi kana beto kwikila Yesu kufwaka ye telemaka diaka, buna bau ya lala tulu mu Yesu, Nzambi takwiza na bau sikamosi na yandi. Lom. 8:11; 1 Kol. 6:14; 15:12

¹⁵ Kadi yai beto tuba kwa beno mu mambu ya Mfumu: Beto ya ikele na moyo ye bika ti Mfumu kwiza, beto taluta ve nantwala na bau ya lala tulu. 1 Kol. 15:21

¹⁶ Kadi Mfumu yandi kibeni takulumuka tuka zulu na mbokolo ya ngolo, ye ndinga ya nkuluntu ya banjo ye na mpungi ya Nzambi, buna bafwa mu Klisto tatelema ntete. Mat. 24:31; 2 Tes. 1:7

¹⁷ Buna beto ya ikele na moyo yo bikaka tabakwa sikamosi na bau mu matuti, sambu na kutana na Mfumu mu zulu, buna beto tavanda na Mfumu mvu ya mvu. Yoa. 12:26; 14:3; 17:24

¹⁸ Sambu na yai beno bombana mu mambu yai.