1 Tesalonika 3 - Le Nouveau Testament en Kikwango 1950

Paulu fidisaka Timoteo ku Tesalonika

¹ Buna bu beto lendaka kuvibidila diaka ve, beto banzaka yo ikele mbote kubika mu Atene beto kaka, Bis. 17:15

² ye fidisa Timoteo mpangi ya beto ye sielo ya Nzambi mu nsamu mbote ya Klisto, sambu na sikidika beno, ye bomba beno mu lukwikilu ya beno, Lom. 16:21

³ na muntu mosi tanikuka ve sambu na mpasi yai, sambu na beno kibeni zaba na beto ikele kubingwa sambu na yai.

⁴ Kadi bu beto vandaka na beno, beto songaka beno ntete, na beto fwiti kumoniswa mpasi, bonso yo kwizaka, ye beno zaba yo.

⁵ Kadi na yai mono mpe, bu mono lendaka kuvibidila diaka ve, mono fidisaka ntumwa sambu na kuzaba lukwikilu ya beno, keti kana mpukumuni kupukumuna beno, ye kisalu ya beto imene kwiza mpamba.

Paulu yangalala bu yandi vutukaka

⁶ Kansi ntangu yai, bu Timoteo kwizaka kwa beto tuka beno, yandi twalaka beto nsamu ya kiese ya lukwikilu ye zola ya beno, ye na beno ikele kubambuka beto mbote ntangu yonso, ye na beno zola kumona beto, bonso beto mpe zola kumona beno. Bis. 18:3

⁷ Kadi na yai, bampangi, sambu na lukwikilu ya beno, beto imene kubombwa mu ntantu yonso ya beto ye mu mpasi ya beto,

⁸ kadi beto ikele na moyo kana beno telema ngolo mu Mfumu.

⁹ Kadi nki matondo beto lenda kuvutula diaka kwa Nzambi sambu na beno, sambu na kiese yonso ya beto yangalala sambu na beno nantwala na Nzambi ya beto ?

¹⁰ Mu mpimpa ye ntangu beto lomba mingi na beto lenda kumona luse ya beno, ye lungisa yina ya konda mu lukwikilu ya beno.

¹¹ Kansi Nzambi yandi kibeni ye Tata ya beto ye Mfumu ya beto Yesu, bika yandi sungika nzila ya beto kwa beno.

¹² Bika Mfumu sala beno kwiza mingi ye luta mu zolana kwa bankaka ye kwa bantu yonso, bonso beto mpe zola beno,

¹³ na yandi lenda kusikidika ntima ya beno ya konda mbi mu nlongo nantwala na Nzambi ye Tata ya beto, bu Mfumu ya beto Yesu kwiza ye banlongo yonso ya yandi. Fili. 1:10; 1 Tes. 5:23; 2 Tes. 1:7; 2:17