1 Tesalonika 2 - Le Nouveau Testament en Kikwango 1950

Bonso Paulu vandaka mu Tesalonika

¹ Kadi beno kibeni bampangi, beno zaba nkotolo ya beto nakati na beno, na yo vandaka mpamba ve,

² kansi sambu na beto monaka mpasi ntete ye moniswaka nsoni mu Filipi, bonso beno zaba, beto vandaka na kikesa mu Nzambi ya beto kutuba kwa beno nsamu mbote ya Nzambi mu mpasi mingi.

³ Kadi mbombodolo ya beto ikele ve ya vengumunu keti ya nsumukunu keti ya bunkita,

⁴ kansi bonso Nzambi imene kumona beto ya lunga kupeswa nsamu mbote, mpilayina beto tuba, sambu na yangidisa ve bantu kansi Nzambi ya meka mintima ya beto. Ngal. 1:10; 2:7

⁵ Kadi ntangu mosi ve beto monwaka kutuba mambu ya lulendo, bonso beno zaba, keti kufuka zola ya bima, Nzambi ikele ntemo ya beto. Bis. 20:33; 2 Kol. 2:17; 11:31; 12:17

⁶ Beto ikele kusosa nkembo ya bantu mpe ve, tuka beno keti tuka bankaka, bu beto lendaka kuzitiswa, bonso bantumwa ya Klisto. Yoa. 5:41, 44; 7:18; 2 Kol. 3:1

⁷ Kansi beto vandaka nlembami nakati na beno, bonso nkento ikele kukeba mbote bana fioti ya yandi kibeni,

⁸ mpilayai mu lutondo ya nene ya ikele na beto sambu na beno, beto zolaka kukabila beno nsamu mbote ya Nzambi kaka ve, kansi miela ya beto mpe, sambu beno imene kwiza bazolwa ya beto. Bis. 20:24; 2 Kol. 12:15; Fili. 1:8; 2:17

⁹ Kadi, bampangi, beno bambuka kisalu ya beto ye mpasi. Beto salaka mu mpimpa ye ntangu, na beto tatula kizitu va mosi ya beno ve, bu beto samunaka nsamu mbote ya Nzambi kwa beno. 2 Tes. 3:8

¹⁰ Beno ikele bantemo ye Nzambi mpe, bonso beto tambulaka ya nlongo ye ya lunungu ye ya konda mbi nakati na beno ya kwikila.

¹¹ Kadi beno zaba bonso beto vandaka na beno muntu na muntu bonso tata ye bana ya yandi, beto bombidilaka beno ye pesa kikesa kwa beno ye songa kitemo kwa beno,

¹² na beno tatambula ya lunga mu Nzambi ya bingaka beno ku kimfumu ya yandi ye nkembo ya yandi. Ef. 4:1; Fili. 1:27; Kolo. 1:10

Bonso bantu ya Tesalonika pindulaka mabanza

¹³ Ye mu mambu yai, beto mpe pesa matondo kwa Nzambi ntangu yonso, sambu na bu beno bakaka mambu ya Nzambi ya beto samunaka kwa beno, beno bakaka yo ve bonso mambu ya bantu, kansi bonso yo ikele mu kieleka, mambu ya Nzambi, ya ikele kusala mu beno ya kwikila. Mat. 10:40; Ngal. 4:14

¹⁴ Kadi beno, bampangi, kwizaka balandi ya mabundu ya Nzambi ya ikele mu Yuda mu Klisto Yesu; kadi beno mpe moniswaka mpasi mutindu mosi na bisi ntoto ya beno kibeni, bonso bau mpe moniswaka mpasi na baYuda. Eb. 10:34

¹⁵ Bau kufwaka Mfumu Yesu ye bambikudi ye kulaka beto, bau yangidisaka Nzambi ve, ye ikele na kimbeni na bantu yonso. Mat. 23:24; Luk. 13:33; Bis. 2:22; 3:15; 7:52

¹⁶ Bau kanikina beto kutuba kwa bapaien, na bau lenda kuvuluswa, sambu na fulusa kitezo ya masumu ya bau ntangu yonso. Kansi makasi ya Nzambi imene kwiza va bau na ngolo mingi. Mat. 23:32; Bis. 13:45; 14:2, 19; 17:5, 13

Paulu vanda luzolo na kwenda diaka ku Tesalonika

¹⁷ Bampangi, sambu na beto imene kukatuka na beno ntangu fioti, mu nitu, kansi mu ntima ve, beto sosaka mu lutondo mingi kumona luse ya beno.

¹⁸ Sambu na ntangu na ntangu beto zolaka kwiza kwa beno, mono Paulu, kansi Satana kangilaka beto nzila.

¹⁹ Kadi nki ikele vuvu ya beto keti kiese keti koloa ya beto ya nkembo ? Ikele beno ve nantwala na Mfumu ya beto Yesu, bu yandi takwiza. 2 Kol. 1:14; Fili. 2:16; 4:1; 1 Tes. 3:13

²⁰ Kadi beno ikele nkembo ya beto ye kiese ya beto.