1 Tesalonika 1 - Le Nouveau Testament en Kikwango 1950

Luyantiku

¹ Paulu ye Silvano ye Timoteo fidisa mbote kwa dibundu ya Tesalonika mu Nzambi, Tata, ye Mfumu Yesu Klisto. Bika nlemvo vanda na beno ye yenge. Lom. 1:7; 1 Kol. 1:2; Ef. 1:2

Matondo kwa Nzambi sambu na lukwikilu ye zola ye vuvu ya bantu ya Tesalonika

² Beto pesa matondo ntangu yonso kwa Nzambi sambu na beno yonso, beto tuba sambu na beno mu lombilu ya beto. Fili. 1:3; Kolo. 1:3; 2 Tes. 1:3

³ Beto bika ve kubambuka beno nantwala na Nzambi, Tata ya beto, sambu na kisalu ya beno ya lukwikilu ye kisalu ya beno ya zola ye mvibidilu ya vuvu ya beno mu Mfumu ya beto Yesu Klisto.

⁴ Sambu na beto zaba nsodolo ya beno, beno bampangi yazolwa kwa Nzambi. 2 Tes. 2:13

⁵ Sambu na nsamu mbote ya beto kwizaka ve kwa beno mu mambu kaka, kansi mu ngolo ye mu Mpeve Yanlongo ye mu zaba kieleka ya ngolo; bonso beno zaba bonso beto vandaka nakati ya beno sambu na beno. 1 Kol. 2:4; 4:20

⁶ Beno kituka balandi ya beto ye ya Mfumu, sambu na beno imene kubaka mambu mu mpasi mingi mu kiese ya Mpeve Yanlongo. 1 Kol. 4:16; 11:1; Fili. 3:17; 1 Tes. 2:14; 2 Tes. 3:7; Eb. 10:32

⁷ Beno kituka bifwani kwa yonso ya kwikila mu Makedonia ye Akaya.

⁸ Kadi tuka beno, mambu ya Mfumu imene kubasika mu Makedonia ye Akaya kaka ve, kansi lukwikilu ya beno mu Nzambi imene kuzabakana ndambu yonso; sambu na yai beto ikele na nsatu ve na tuba mambu diaka.

⁹ Kadi bau kibeni ikele kutuba bonso beto kotaka nakati ya beno, ye bonso beno pindukaka kwa Nzambi ye bikaka biteki, sambu na sadila Nzambi ya ikele na moyo ye ya kieleka. Bis. 4:15

¹⁰ Ye kuvingila Mwana ya yandi tuka zulu, ya yandi fulukiswaka tuka bafwa, ikele Yesu ya vulusaka beto tuka makasi ya ikele kwiza.