1 Petelo 5 - Le Nouveau Testament en Kikwango 1950

Malongi kwa bamvungi

¹ Mono bombidila bambuta ya ikele nakati na beno, mono mpe ikele mbuta sikamosi na bau ye ntemo ya mpasi ya Klisto, ye mono ikele ntuadi ya nkembo ya tamoniswa.

² Vanda mvungi ya mameme ya Nzambi ya ikele nakati na beno, mu ngolo ve, kansi mu luzolo, bonso ikele luzolo ya Nzambi sambu na ndandu ya nsoni ve, kansi mu zola ya ntima. Bis. 20:28; 1 Tim. 3:3; Tit. 1:7, 11

³ Vanda ve bonso bamfumu mu mabundu ya beno, kansi vanda kifwani kwa mameme. 2 Kol. 1:24; Fili. 3:17; 1 Tim. 4:12

⁴ Bu mbuta ya Mvungi tamonika, beno tabaka koloa ya nkembo, ya tavila ve. Yoa. 10:11; 1 Kol. 9:25; 2 Tim. 4:8

Bombidila mu dikulumusa, mu tomatala, mu latama

⁵ Mpilayai mpe, beno baleke, lemvuka kwa bambuta, kansi beno yonso vanda ya dikulumusa kusadilana, kadi Nzambi zola ve bankwa lulendo, kansi yandi pesa nlemvo kwa bankwa dikulumusa. Bing. 3:34; Lom. 12:10, 16; Ef. 5:21; Yak. 4:6

⁶ Mpilayai, beno dikulumusa nansi na diboko ya ngolo ya Nzambi, na yandi lenda kutombola beno mu ntangu ya lunga. Luk. 1:52; 14:11; Yak. 4:10

⁷ Tula kizitu yonso ya beno va yandi, kadi yandi ikele kubanzila beno. Nk. 55:22; Mat. 6:25; Fili. 4:6

⁸ Beno diyala, tomatala. Mbeni ya beno, diable, ikele kutambula bonso nkosi ya dila, kusosa konso ya yandi lenda kumina. Luk. 22:31; 1 Tes. 5:6

⁹ Beno buya yandi ngolo mu lukwikilu, sambu na beno zaba, na bampangi ya beno mu nsi ikele kumoniswa mpasi mutindu mosi. Ef. 6:11, 13; Yak. 4:7

¹⁰ Nzambi ya nlemvo yonso, ya bingaka beno ku nkembo ya yandi ya mvu ya mvu mu Klisto, bu beno imene kumoniswa mpasi ntangu fioti, yandi kibeni talungisa, ye sikidika, ye siamisa beno. 2 Kol. 4:17; 1 Tes. 5:23, 24; 2 Tim. 1:9; Eb. 13:21

¹¹ Kwa yandi ngolo yonso ya mvu ya mvu. Amen.

¹² Mu maboko ya Silvano, mpangi ya kwikama, mono tanga yandi mpilayai, mono imene kusonika kwa beno mambu fioti, kubombidila ye kutuba kitemo, na yai ikele nlemvo ya kieleka ya Nzambi, beno telema ngolo mu yo.

¹³ Dibundu ya ikele mu Babeli, ya solwa sikamosi na beno, fidisa beno mbote, mpe Malako, mwana ya mono.

¹⁴ Beno pesana mbote mu mfibulu ya zola. Yenge vanda na beno yonso ya ikele mu Klisto. Lom. 16:16; 2 Kol. 13:12