1 Petelo 4 - Le Nouveau Testament en Kikwango 1950

Kutambula ntambulu yanlongo

¹ Buna sambu na Klisto moniswaka mpasi mu nsuni, beno vwata mpe binwaninu ya mabanza mosi, kadi yandi ya moniswa mpasi mu nsuni, imene kukatuka na masumu. Lom. 6:8

² Buna beno tatambula diaka ve mu nsuni, mu luzolo ya kimuntu, kansi mu luzolo ya Nzambi. Lom. 12:2; 14:7; 2 Kol. 5:15; Ngal. 2:20; 1 Tes. 5:10; Eb. 9:14

³ Kadi yo lunga, mu ntangu ya lutaka, beto salaka luzolo ya bapaien, kutambulaka mu bizumba, zola ya nsuni, kolwa ya malafu, makinu, mambu ya nsoni, ye nsambilu ya biteki ya sumuka. Lom. 13:13; Ef. 4:17

⁴ Bau ikele kuyituka ye tuba mbi sambu na beno, sambu na beno sala ve nsumukunu ya bau sala.

⁵ Bau tatuba mambu ya bau kwa yandi ya vingila kufundisa bamoyo ye bafwa. Yoa. 5:25; Bis. 10:42

⁶ Kadi, sambu na yai bafwa mpe samunwaka nsamu mbote, na bau lenda kufundiswa, bonso bantu mu nsuni ikele kufundiswa, kansi kuvanda na moyo mu mpeve, bonso Nzambi ikele moyo.

Konda kukolwa, kansi sadisana

⁷ Kansi nsuka ya bima yonso ikele mfinama, sambu na yai, vanda, na mabanza ya mbote, ye tomatala mu lombilu. 2 Pet. 3:9; 1 Yoa. 2:18

⁸ Na zulu na mambu yonso, beno vibidila mu zolana, kadi zola ikele kufuka masumu mingi. Bing. 10:12

⁹ Beno vanda na zola ya banzenza ye sosa ve bau kuvutula yo.

¹⁰ Bonso muntu na muntu ikele kubaka matabisi, beno sadilana na yo, bonso bankengi ya mbote ya nlemvo ya Nzambi ya mpila mingi. 1 Kol. 12:4; 2 Kol. 8:12; Tit. 1:7

¹¹ Kana muntu tuba mambu, yandi tatuba bonso mambu ya Nzambi, kana muntu sadila, yandi tasadila bonso ngolo ya Nzambi pesa, na Nzambi lenda kukembiswa mu mambu yonso mu Yesu Klisto, kwa yandi ikele nkembo ye ngolo mvu ya mvu. Amen. Lom. 1:6

Bantu ya Nzambi fwiti kumona mpasi bonso Klisto monaka

¹² Bazolwa, beno yituka ve sambu na kitezo ya tiya ya ikele nakati na beno, ya kwiza kupukumuna beno, bonso mambu ya nzenza imene kubwila beno. Yes. 48:10

¹³ Kansi yangalala, sambu na beno ikele bantuadi mu bampasi ya Klisto, na beno lenda kuyangalala ye vanda na kiese mingi, bu nkembo ya yandi zaikuswa. Fili. 3:10; Kolo. 1:24; 2 Tim. 2:10

¹⁴ Kana beno fingwa sambu na nkumbu ya Klisto, kiese ikele na beno, kadi mpeve ya nkembo ye ya Nzambi ikele va beno.

¹⁵ Bika mosi ya beno moniswa mpasi ve bonso mufwi keti mwivi keti musadi ya mbi keti muntu ya dikotisa mu mambu ya bantu yankaka. 1 Pet. 2:20

¹⁶ Kansi kana muntu moniswa mpasi bonso nkwa Klisto, yandi tavanda na nsoni ve, kansi kukembila Nzambi sambu na nkumbu yai. Fili. 1:28

¹⁷ Kadi ntangu imene kwiza ya mfundusu kuyantika mu nzo ya Nzambi, kansi kana yo yantika ntete mu beto, buna nki tavanda nsuka ya bau ya buya nsamu mbote ya Nzambi ?

¹⁸ Kana nkwa lunungu mona mpasi kuvuluswa, buna wapi tavanda yandi ya konda vumi ya Nzambi ye nkwa masumu ? Bing. 11:31; Luk. 23:31

¹⁹ Mpilayai bika bau kumoniswa mpasi bonso ikele luzolo ya Nzambi, bika bau kupesa miela ya bau mu bisalu ya mbote kwa Nsemi ya kwikama.