1 Petelo 3 - Le Nouveau Testament en Kikwango 1950

Malongi kwa bakwedi

¹ Mpilayai mpe, beno bankento, lemvuka kwa babakala ya beno kibeni, buna kana babakala yankaka kulemvuka mambu ve, bu bau konda mambu, bau lenda kubakwa ndandu, sambu na bisalu ya mbote ya bankento ya bau, 1 Mose 3:16; 1 Kol. 11:3-4; Ef. 5:22; Kolo. 3:18; Tit. 2:5

² bu bau mona bisalu ya beno ye vedila sikamosi na vumi.

³ Kitoko ya beno vanda ve kitoko ya nganda ya kutunga nsuki ye ya kuvwata bima ya kitoko ya wola, ye lele ya kitoko, 1 Tim. 2:9

⁴ kansi yo tavanda muntu ya swekwa ya ntima, ya vwata lele ya lenda ve kufwa ya mpeve ya nlembami ye napi, yai ikele ntalu ya nene na luse ya Nzambi. Lom. 7:22; 2 Kol. 4:16

⁵ Kadi mpilayai mpe bankento ya nlongo ya ntama, ya tulaka vuvu mu Nzambi, vwataka kitoko ya mpilayai, bu bau lemvukaka kwa babakala ya bau kibeni,

⁶ bonso Sala lemvukaka kwa Abalahami ye bingaka yandi mfumu, beno ikele bana ya yandi, kana beno sala mbote ye tina ve kima ya mpasi. 1 Mose 18:12

⁷ Mpilayai mpe, beno babakala, vanda na bankento na beno mu ngangu, zitisa nkento, bonso kwa kima ya luta lebakana, bonso bamvingidi ya difwa sikamosi, ya nlemvo ya moyo, na Nzambi tabuya ve balombilu ya beno. 1 Kol. 7:3; Ef. 5:25; Kolo. 3:19

Bombidila bau vanda ya lunga

⁸ Na zulu na yai yonso, beno yonso vanda na mabanza mosi, kuwilana ntantu, zolana bonso bampangi, ntima ya nkenda ye mabanza ya dikulumusa. Lom. 12:16; 15:5; Fili. 3:15

⁹ Vutula mbi ve sambu na mbi, keti mafingu sambu na mafingu, kansi vutula lusakumunu, kadi beno bingwaka sambu na mambu yai, na beno tavingila difwa ya lusakumunu. 3 Mose 19:18; Bing. 20:22; Mat. 5:39; 1 Kol. 6:7

¹⁰ Kadi yandi ya zola luzingu ya nda ye bilumbu ya mbote, bika yandi lunda ludimi ya yandi kutuba mbi, ye bikoba ya yandi tuba luvunu ve.

¹¹ Ye bika yandi tula nima ku mbi ye sala mbote, ye bika yandi sosa yenge ye landa yo.

¹² Kadi meso ya Mfumu ikele va balunungu, ye makutu ya yandi ikele kuwa lombilu ya bau, kansi luse ya Mfumu ikele kukanga kwa basadi ya mbi.

Ye vibidila mu mpasi

¹³ Nani tasala beno mbi, kana beno ikele balandi ya mambu mbote ?

¹⁴ Kansi kana beno moniswa mpasi sambu na lunungu, kiese ikele na beno. Tita bau ve, ye mona boma ve. Mat. 5:10; 10:28; 1 Pet. 2:19; 4:14

¹⁵ Kansi tula Klisto Mfumu mu ntima ya beno, vanda ya yidikwa ntangu yonso kuvutula kwa muntu na muntu, ya yuvula beno sambu na vuvu ya ikele mu beno, kansi mu nlembami ye vumi.

¹⁶ Vanda na kansansa ya mbote, buna bau ya tuba mbi sambu na bisalu ya beno ya mbote mu Klisto lenda kumoniswa nsoni, mu mambu ya bau ikele kutuba sambu na beno. Tit. 2:8; 1 Pet. 2:12, 15

¹⁷ Kadi yo luta mbote, kana luzolo ya Nzambi ikele mpilayai, na beno moniswa mpasi sambu na bisalu ya mbote, ye sambu na bisalu ya mbi ve.

Bantu ya moniswa mpasi mu mambu ya mbote ikele na kiese

¹⁸ Kadi Klisto mpe kufwaka mbala mosi sambu na masumu, nkwa lunungu sambu na bankwa kondwa lunungu, na yandi lenda kutwala beto kwa Nzambi, bau kufwaka yandi mu nsuni, kansi yandi ikele na moyo mu mpeve. Lom. 5:6; 2 Kol. 13:4; Eb. 9:15, 28

¹⁹ Mu mpeve yandi kwendaka kusamu kwa bampeve mu boloko, kusamuna kwa bampeve mu boloko. 1 Pet. 4:6

²⁰ Bau ya kolamaka ntama, bu mvibudulu ya Nzambi vingilaka mu bilumbu ya Noa, bu nzaza kuyidikwa, mu yo bantu ndambu vuluswaka tuka masa, yo ikele miela nana. 1 Mose 6:1

²¹ Bonso yai mpe, mu kifwani, beno ikele kuvuluswa ntangu yai mu masa, yo ikele mbotika, ikele ve kukatula mvindu ya nsuni, kansi mu lombilu ya ntima ya mbote kwa Nzambi, mu mfulukulu ya Yesu Klisto, Ef. 5:25

²² yandi ikele na diboko kibakala ya Nzambi, bu yandi kwendaka ku zulu, banjo ye bankwa ngolo ye bangolo imene kutulwa na nsi ya ngolo ya yandi. Nk. 110:1; Ef. 1:20