1 Petelo 2 - Le Nouveau Testament en Kikwango 1950

Kwikila Yesu Klisto, ditadi ya fuma

¹ Sambu na yai katula masumu yonso ye kinkita yonso ya baluvunu ye kimpala ye kutuba yonso ya mbi, Ef. 4:22, 25; Kolo. 3:8; Eb. 12:1; Yak. 1:21

² bonso bana ya butuka yampa, zola mabele ya kimpeve ya konda kinkita, na beno lenda kukula mu yo ku mpulusu,

³ kana beno imene kumeka na Mfumu ikele mbote. Nk. 34:8

⁴ Beno kwiza kwa yandi, ditadi ya moyo ya bantu buyaka kieleka, kansi ya Nzambi solaka, ye ya ntalu. Nk. 118:22; Ef. 2:20

⁵ Beno mpe bonso matadi ya moyo ikele kutungwa mu nzo ya kimpeve kuvanda kinganga ya nlongo, ye kupesa nkailu ya zikwa ya kimpeve, ya solwa kwa Nzambi mu Yesu Klisto. Lom. 12:1; Ef. 2:21; Eb. 3:6; 13:15

⁶ Bonso yo ikele mu masonukwa: Tala, mono tulaka mu Sioni ditadi ya nene ya fuma, ya solwa ye ya ntalu; konsonani ya kwikila mu yandi tabaka nsoni ve. Yes. 28:16; Lom. 9:33

⁷ Kwa beno ya kwikila, yandi ikele ya ntalu, kansi kwa bayina ya konda kwikila, ditadi ya bantungi buyaka, imene kituka ditadi ya fuma, ye ditadi ya tesa sakuba ye ditadi ya kubwisa. Nk. 118:22

⁸ Kadi bau kuta sakuba sambu na bau kulemvuka ve, ye ku yo bau solwaka. Yes. 8:14

⁹ Kansi beno ikele mbandu ya solwa, kinganga ya kintinu, kikanda ya nlongo, bantu ya Nzambi kibeni baka, na beno lenda kusonga nzitusu ya yandi ya bingaka beno tuka tombe ku mwini ya yandi ya yituka. 2 Mose 19:5; 5 Mose 7:6; Yes. 62:12

¹⁰ Ntete beno vandaka bantu ve, kansi ntangu yai, beno ikele bantu ya Nzambi, ntete beno wilwaka nkenda ve, kansi ntangu yai beno imene kuwilwa nkenda. Hos. 1:10; 2:23

Tambula mbote nankati ya bapaien

¹¹ Bazolwa, mono bombidila beno, bonso banzenza ya batambudi, beno buya luzolo ye nsuni, ya ikele kunwana na miela.

¹² Vanda na bifu ya mbote nakati na bapaien, buna bu bau tuba mbi na beno, bonso beno ikele basadi ya mbi, bu bau mona bisalu ya beno ya mbote, bau lenda kupesa nkembo kwa Nzambi, mu kilumbu ya yandi kwiza kwa bau. Mat. 5:16; 1 Pet. 3:16

Lemvuka banyadi ye bamfumu

¹³ Sambu na Mfumu, beno lemvuka bansiku yonso ya bantu, keti kwa ntinu, yandi luta nene, Lom. 13:1; Tit. 3:1

¹⁴ keti kwa banyadi, ya yandi fidisaka kuvutula ndinda kwa basadi ya mbi, ye kusika basadi ya mbote.

¹⁵ Kadi luzolo ya Nzambi ikele mpilayai, ye mu bisalu ya beno ya mbote, beno takanga munoko ya buzoba ya bantu ya konda ngangu. 1 Pet. 3:16

¹⁶ Beno vanda bonso mpwanza, kansi sadila kimpwanza ya beno ve bonso kazaku ya fuka mbi, kansi bonso bampika ya Nzambi. Yoa. 8:32; Lom. 6:18; Ngal. 5:1, 3

¹⁷ Zitisa bantu yonso, zola bampangi, vumina Nzambi, ye zitisa ntinu. Lom. 12:10; Fili. 2:3; Eb. 13:1

Basadi ye bamfumu ya bau

¹⁸ Basielo, lemvuka kwa bamfumu ya beno mu vumi yonso, kaka ve, kwa bau ya mbote ye ya nlembami, kansi kwa bau ya mbi mpe. Ef. 6:5; Kolo. 3:22

¹⁹ Kadi yai ikele nlemvo, kana muntu sambu na vumi ya Nzambi, vibidila ntantu bu yandi moniswa mpasi bu yandi ikele na mbi ve. Mat. 5:10

²⁰ Kadi nki nkembo, kana beno vibidila, bu beno moniswa mpasi sambu na masumu ya beno ? Kansi kana beno vibidila bu beno moniswa mpasi sambu na bisalu ya mbote, yai ikele nlemvo kwa Nzambi. 1 Pet. 3:14, 17; 4:14

²¹ Sambu na mambu yai, beno bingwaka, kadi Klisto mpe moniswaka mpasi, yandi bikilaka beno kifwani, na beno talanda mu bitambi ya yandi. Mat. 17:24; Yoa. 13:15; Fili. 2:5

²² Yandi salaka masumu ve, mbi wakana mu munoko ya yandi ve; Yes. 53:9; 2 Kol. 5:21; 1 Yoa. 3:5

²³ bu yandi fingwaka, yandi vutulaka mafingu ve, bu yandi moniswaka mpasi yandi vutulaka ndinga ve, kansi yandi dipesaka kwa yandi ya fundisa mu lunungu. Mat. 27:39; Yoa. 8:48

²⁴ Yandi kibeni nataka masumu ya beto, mu nitu ya yandi va nti, buna bu beto imene kufwa kwa masumu ya beto, beto lenda kuvanda na moyo ku lunungu, sambu na kubula ya yandi beto imene kubelulwa. Yes. 53:5; Lom. 6:1

²⁵ Kadi beno vandaka ya kuvila bonso mameme, kansi ntangu yai beno imene kuvutuka kwa Mvungi ye Nkengi ya miela ya beno. Yes. 53:6; Yel. 34:5; Yoa. 10:11; Eb. 13:20