1 Petelo 1 - Le Nouveau Testament en Kikwango 1950

Luyantiku

¹ Petelo, ntumwa ya Yesu Klisto kwa banzenza, fidisa mbote kwa bazolwa ya mwanganaka mu Ponto, Ngalatia, Kapadokia, Asia ye mu Bitinia,

² bonso Nzambi, Tata, zabaka ntete, mu kutula nlongo ya Mpeve, mu kulemvuka ye mu ndembolo ya menga ya Yesu Klisto: Nlemvo ye yenge kwiza mingi kwa beno. Yud. 2

Matondo kwa Nzambi. Bombidila sambu na kutambula ntambulu ya longo

³ Bika Nzambi ya Tata ya Mfumu ya beto Yesu Klisto sakumunwa, mu nkenda ya yandi ya nene yandi butaka beto mbutulu yampa, ku vuvu ya moyo mu mfulukulu ya Yesu Klisto tuka bafwa, Ef. 1:3; Tit. 3:5

⁴ Sambu na difwa ya mvu ya mvu, ya konda kubiviswa, ye konda kusumuka, ye konda kuvila, ya lundwa mu mazulu sambu na beno. Kolo. 1:5; 2 Tim. 1:12

⁵ Mu ngolo ya Nzambi, beno ikele kulundwa mu lukwikilu ku mpulusu ya tamonikiswa kwa beto mu kilumbu ya nsuka.

⁶ Mu yai beno ikele kuyangalala, bu ntangu yai fioti beno ikele na ntantu sambu na mpukumunu mingi mutindu ye mutindu, Lom. 8:18; 2 Kol. 4:17; Yak. 1:2; 1 Pet. 5:10

⁷ na kitezo ya lukwikilu ya beno ya luta wola mu ntalu ya lenda kufwa bu bau meka yo mu tiya, tamonika ku nsikulu ye nkembo ye nzitusu mu nzaikusu ya Yesu Klisto. Bing. 17:3; Yes. 48:10; 1 Kol. 3:13; 1 Pet. 4:12

⁸ Beno monaka yandi ve; beno zola yandi ya beno mona ntangu yai ve, beno ikele kukwikila ye kuyangalala mingi na kiese ya kutuba ve ye fuluka na nkembo. 2 Kol. 5:7; Eb. 11:27

⁹ Beno ikele kubaka nsuka ya lukwikilu ya beno, ikele mpulusu ya miela ya beno.

¹⁰ Sambu na mpulusu yina bambikudi yuvulaka ye sosaka ngolo, bau bikulaka sambu na nlemvo ya takwiza kwa beno.

¹¹ Kusosa ntangu nki ye mutindu ya ntangu ya Mpeve ya Klisto ya vandaka mu bau songaka, bu yandi tubaka kitemo ntete, sambu na mpasi ya Klisto, ye sambu na nkembo ya talanda. 1 Mose 49:10; Yes. 53:3; Dan. 2:44; 9:24; Luk. 24:26; Fili. 2:7; Eb. 12:2

¹² Yo zaikuswaka kwa bau na bau imene kusadila bau kibeni ve, kansi bau sadilaka beno mambu yai ya samunwa ntangu yai kwa beno, mu bau ya samunaka nsamu mbote kwa beno mu Mpeve Yanlongo ya fidiswaka tuka zulu; mambu yai banjo tondaka kutala. Ef. 3:8

Yesu vulusa bau ya lemvuka mambu ya yandi

¹³ Mpilayai beno kanga tuketo ya mabanza ya beno, na beno kolwa ve ye tula vuvu ya lunga munlemvo ya takwiza kwa beno mu nzaikusu ya Yesu Klisto. Luk. 12:35; 21:34; Lom. 13:13; Ef. 6:14; 1 Tes. 5:6

¹⁴ Bonso bana ya kulemvuka ya landa ve luzolo ya nsuni ya ntete mu ntangu ya beno kondaka ngangu,

¹⁵ kansi bonso yandi ya bingaka beno ikele nlongo mpilayai beno mpe vanda nlongo mu mambu yonso ya beno.

¹⁶ Kadi yo sonama: Beno tavanda nlongo, kadi mono ikele nlongo. 3 Mose 11:44

¹⁷ Kana beno ikele kubombidila yandi Tata, yandi ikele kutala luse ya bantu ve, kansi ikele kufundisa kisalu ya muntu na muntu bonso bisalu ya bau, buna tambula mu vumi mu ntangu ya kinzenza ya beno, Lom. 2:11; Fili. 2:12

¹⁸ beno zaba na beno vuluswaka ve na bima ya biviswa bonso palata keti wola, tuka masumu ya beno ya katuka na batata ya beno,

¹⁹ kansi mu menga ya ntalu ya Klisto bonso ya mwana dimeme ya konda kieta keti tona. 1 Kol. 5:7; 6:20; Eb. 9:12, 14; Nzai. 5:9

²⁰ Yandi zabwaka ntete na kutula ya lufulu ya nsi, kansi yandi monikaka na nsuka ya ntangu sambu na beno. Lom. 16:25; Ngal. 4:4; Ef. 1:9; Eb. 1:2

²¹ Mu yandi beno ikele bakwikidi mu Nzambi, ya fulukisaka yandi tuka bafwa ye pesaka yandi nkembo, na lukwikilu ye vuvu ya beno lenda kuvanda mu Nzambi. Lom. 6:4; Fili. 2:9

²² Sambu na beno imene kuvedisa miela ya beno mu kulemvuka ya beno ku kieleka ku zola ya bampangi ya konda luvunu, mpilayai beno zolana mingi mu ntima yamvimba. Lom. 12:10; Ef. 4:2; 1 Tim. 1:5; 1 Pet. 2:7

²³ Beno butukaka diaka na nkuna ve ya lenda kubiviswa kansi ya lenda ve kubiviswa, mu mambu ya Nzambi ya ikele na moyo mvu ya mvu. Luk. 8:11; 1 Kol. 4:15; Yak. 1:18

²⁴ Kadi nsuni yonso ikele bonso matiti, ye nkembo yonso ya yau bonso bintuntu ya matiti. Matiti ikele kuyuma, ye bintuntu ya yau ikele kubwa va ntoto, Nk. 102:12; 103:15; Yes. 40:6

²⁵ kansi mambu ya Mfumu ikele kuvanda mvu ya mvu, ye yai ikele mambu ya nsamu ya mbote ya samunwaka kwa beno.