1 Kolinto 9 - Le Nouveau Testament en Kikwango 1950

Ngolo ya kintumwa

¹ Mono ikele muntu ya kimpwanza ve ? Mono ikele ntumwa ve ? Mono imene kumona Mfumu ya beto Yesu ve ? Beno ikele kisalu ya mono mu Mfumu ve ? Bis. 9:3; 18:9; 22:17; 23:11; 26:12; 1 Kol. 15:8; 2 Kol. 12:1

² Kana mono ikele ntumwa ve kwa bankaka, mono ikele ntumwa kwa beno; kadi beno ikele kidimbu ya kintumwa ya mono mu Mfumu. 1 Kol. 4:15; 2 Kol. 3:2

³ Yai ikele mvutulu ya mono kwa bau ya fundisa mono:

⁴ Beto ikele na nzila ve kudia ye kunwa ? Luk. 10:7

⁵ Beto ikele na nzila ve kutwala nkento ya ikele mukwikidi, bonso bantumwa yankaka, ye bampangi ya Mfumu, ye Kefa ?

⁶ Keti beto ye Banaba kaka, ikele na nzila ve kubika kisalu ? 2 Tes. 3:9

⁷ Nani ikele soldat na ikele kusala na lufutu ya yandi mosi ? Nani kuna dilanga ya vinia ye konda kudia mabundu ya yo ? Nani ikele mvungi ya mameme, ye konda kunwa mabele ya mameme ?

⁸ Mono tuba mambu yai mu kimuntu ? Nsiku tuba mpilayai mpe ve ?

⁹ Kadi yo ikele kusonama mu nsiku ya Mose: Nge takanga munoko ya ngombe ve, bu yandi tuta nkeni ya ble. Nzambi ikele kubanza sambu na bangombe ?

¹⁰ Keti yandi tubaka yo ve sambu na beto kaka ? E, yo sonamaka sambu na beto: Yandi ya bundula ntoto fwiti kubundulu mu vuvu, yandi ya tuta nkeni ya ble fwiti kututa mu vuvu na yandi tabaka ndambu.

¹¹ Kana beto kunaka kwa beno bima ya kimpeve, yo ikele mambu ya nene kana beto buka bima ya beno ya kinsuni ? Lom. 15:27

¹² Kana bankaka ikele na ngolo yai na zulu na beno, buna beto luta bau ve ? Kansi beto sala na ngolo yai ve, kansi beto vibidila mambu yonso, na beto takanga nzila ve ku nsamu mbote ya Klisto. Bis. 20:33; 1 Kol. 4:12; 2 Kol. 11:9, 12; 2 Kol. 12:13; 1 Tes. 2:9; 2 Tes. 3:8

¹³ Beno zaba ve na bau ya sala mu bima ya nlongo ikele kudia na bima ya tempelo, ye bau ya sala na zikwa ikele kubaka ndambu ya bau na zikwa ? 3 Mose 2:3; 6:16; 4 Mose 18:8, 31; 5 Mose 18:1

¹⁴ Mpilayai mpe Mfumu sola na bau ya samuna nsamu mbote, fwiti kubaka lufutu ya nsamu mbote.

Paulu disadila ve

¹⁵ Kansi mono baka ve na mosi ya mambu yai. Mono sonika yo mpe ve na yo lenda kusalwa mpilayai sambu na mono, kadi yo luta mbote na mono kufwa, keti na muntu kitula nkembo na mono mpamba. 2 Kol. 11:10; 12:14

¹⁶ Kadi kana mono samuna nsamu mbote, mono ikele na mambu ve kuyana, kadi mono fwiti kusala yo, kadi ndola kwa mono kana mono samuna ve nsamu mbote.

¹⁷ Kadi kana mono sala yai na luzolo ya mono, mono ikele na nsendo; kansi kana na luzolo ya mono ve, kinlundi peswaka kwa mono.

¹⁸ Buna nki ikele nsendo ya mono ? Ikele yai, kana mono samuna nsamu mbote ya Klisto, mono samuna mu konda ya lufutu, na mono tasala ve bonso mono lenda kusala mu nsamu mbote. Yandi vandaka mfumu, yandi disalaka mpika ya bantu

¹⁹ Kadi bu mono ikele mpwansi, mono ditulaka mpika kwa bantu yonso, na mono lenda kubaka mingi mu ndandu.

²⁰ Kwa baYuda, mono ikele bonso muYuda, na mono lenda kubaka baYuda; kwa bau ya ikele nansi ya nsiku, mono ikele bonso na-nsi ya nsiku, kansi mono kibeni ikele nansi ya nsiku ve, na mono lenda kubaka bau ya ikele nansi ya nsiku.

²¹ Kwa bau ya konda nsiku, mono ikele bonso ya konda nsiku, mono konda nsiku ya Nzambi ve, kansi mono ikele nansi ya nsiku ya Klisto, na mono lenda kubaka bau ya konda nsiku. Ngal. 2:3

²² Kwa bau ya lebakana, mono kwiza lebakana, na mono lenda kubaka bau ya lebakana. Kwa bantu yonso mono kwiza mambu yonso, kana mpilayai mono lenda kuvulusa bankaka. Lom. 14:15; 15:1

²³ Mono sala mambu yonso sambu na nsamu mbote, na mono lenda kuvanda na kintuadi sikamosi mu yo.

Kuteza ntinu

²⁴ Beno zaba ve na bau ya ikele teza ntinu, bau yonso ikele kutewa ntinu, kansi mosi kaka ikele kubaka nsendo ? Mpilayai, tina na nge lenda kubaka. Fili. 3:12

²⁵ Konso muntu ya ikele teza ngolo, ikele kudiyala mu bima yonso. Bau sala yo kubaka mpu ya nkembo ya lenda kubivisa, kansi beto baka ya konda kubivisa. 2 Tim. 4:8; Yak. 1:12

²⁶ Sambu na yai, mono teza ntinu mu mambu ya ntembe ve, mono ikele kunwana ve bonso muntu ya bula mupepe;

²⁷ kansi mono ikele kunwana na nitu ya mono, ye yala yo, na yo tavanda ve, kana mono imene kusamuna kwa bankaka, mono kibeni taloswa.