1 Kolinto 8 - Le Nouveau Testament en Kikwango 1950

Mambu ya mbizi ya yokwa kwa biteki

¹ Sambu na bima ya yokwa nkailu kwa biteki, beto zaba na beto yonso ikele na nzailu. Nzailu ikele kuditombola, kansi zola ikele kutunga. 1 Kol. 10:25, 27

² Kana muntu banza na yandi zaba kima, yandi zaba ve ti ntangu yai bonso yandi fwiti kuzaba. Ngal. 6:3

³ Kana muntu zola Nzambi, Nzambi ikele kuzaba yandi. Ngal. 4:9

⁴ Buna sambu na mbizi ya yokwa nkailu kwa biteki, beto zaba kiteki ikele kima ve na nsi yai, ye Nzambi yankaka ikele ve, kansi mosi kaka. 5 Mose 4:36; 6:4; Mal. 12:29; 1 Kol. 10:20; Ef. 4:5; 1 Tim. 2:5

⁵ Kadi bima ikele ya bingwa banzambi, keti mu zulu keti va ntoto; bonso banzambi mingi ikele ye bamfumu mingi ikele.

⁶ Kansi kwa beto ikele Nzambi mosi kaka, yandi ikele Tata ye bima yonso katuka na yandi, ye beto ikele ya yandi, ye beto mu yandi. Mal. 2:10; Yoa. 1:3; 13:13; Bis. 17:28; Lom. 11:36; Ef. 2:10; 3:9; Fili. 2:11; Kolo. 1:16; Eb. 1:2

Nkwa Klisto fwiti kudia mbizi ve kana yo tesa mpangi sakuba

⁷ Bantu yonso ikele na nzailu yina ve, kansi bankaka ikele kusambila biteki ti ntangu yai, ye bau ikele kudia bima ya yokwa nkailu kwa biteki, kansansa ya bau ya ikele lebakana ikele kusumunwa.

⁸ Kansi madia tatwala beto kwa Nzambi ve, kana beto kudia, beto luta ve, keti kana beto konda kudia, beto konda kima ve. Lom. 14:17

⁹ Kansi tomatala, na ngolo ya beno yai tavanda nteso ya sakuba ve kwa bau ya lebakana. Lom. 14:13, 20; Ngal. 5:13

¹⁰ Kadi kana muntu mona nge ya ikele na nzailu vanda na mesa mu tempelo ya biteki, buna kansansa ya yandi ya ikele lebakana tabaka kikesa kudia yina ya yokwa nkailu kwa biteki. 2 Mose 34:15

¹¹ Kadi sambu na nzailu ya nge, yandi ya lebakana takufwa, ikele mpangi, Klisto kufwaka sambu na yandi.

¹² Buna kana beno sadila bampangi na beno masumu, ye lwadisa kansansa ya bau bu yo ikele lebakana, buna beno ikele kusala masumu kwa Klisto.

¹³ Mpilayai kana madia tesa mpangi ya mono sakuba, mono takudia mbizi ve bu nsi ikele, na mono tatesa mpangi ya mono sakuba ve.