1 Kolinto 7 - Le Nouveau Testament en Kikwango 1950

Ndongisilu sambu na kwela ye kukabana

¹ Sambu na mambu ya beno sonikaka: Ikele mbote na muntu valakana nkento ve.

² Kansi sambu na mambu ya bizumba, bika muntu na muntu vanda na nkento ya yandi, ye nkento na nkento vanda na bakala ya yandi.

³ Bika bakala sadila nkento ya yandi bima ya lunga na yandi, ye nkento mpilamosi kwa bakala ya yandi.

⁴ Nkento ikele na luyalu ve na nitu ya yandi, kansi bakala; mpilamosi bakala ikele na luyalu ve na nitu ya yandi, kansi nkento.

⁵ Beno buyana ve, kaka kana beno zole ndima sambu na ntangu ndambu, na kubaka ntangu sambu na kulomba, buna beno lenda kwiza sikamosi diaka, na Satana lenda kupukumuna beno ve sambu na beno konda kudiyala.

⁶ Mono bakaka nzila kutuba yai, kansi yo ikele nsikudukusu ve.

⁷ Mono zola kana bantu yonso ikele kuvanda bonso mono kibeni, kansi muntu na muntu imene kubaka matabisi ya yandi tuka Nzambi, mosi mpilayai, yankaka mpilayina. Mat. 19:11

⁸ Mono tuba kwa bau ya konda kukwela ye kwa bafwola: Yo ikele mbote kwa bau kana bau vanda bonso mono.

⁹ Kansi kana bau konda kudiyala, bika bau kwela, kadi kukwela luta mbote na kuyoka. 1 Tim. 5:14

¹⁰ Kansi kwa bau ya kwela, mono kanikina, mono mosi ve kansi Mfumu, na nkento takatuka na bakala ya yandi ve

¹¹ —kansi kana yandi imene kukatuka, bika yandi vanda mpamba, keti vutuka ye yidika kwa bakala ya yandi—ye bakala bika nkento ya yandi ve.

¹² Kwa bankaka mono tuba, kansi Mfumu ve: Kana mpangi ikele na nkento ya konda lukwikilu, ye yandi zola kuvanda na yandi, yandi bika nkento yina ve.

¹³ Kana nkento ikele na bakala ya konda lukwikilu, ye yandi zola kuvanda na yandi, yandi bika bakala ya yandi ve.

¹⁴ Kadi bakala ya konda lukwikilu ikele kusalwa nlongo sambu na nkento, ye nkento ya konda lukwikilu ikele kusalwa nlongo sambu na bakala, kana mpilayai ve bana ya beno ikele kusumuka, kansi ntangu yai bau ikele yanlongo.

¹⁵ Kansi kana yandi ya konda lukwikilu zola kukatuka, bika yandi katuka, mpangi keti mpangi nkento ikele nansi ya kimpika ve na mambu mpilayina, kansi Nzambi imene kubinga beno mu yenge.

¹⁶ Kadi nge nkento, nge zaba mpila nki, kana nge lenda kuvulusa bakala ya nge ? Keti nge bakala nge zaba mpila nki kana nge lenda kuvulusa nkento ya nge ? 1 Pet. 3:1

¹⁷ Kansi kaka bonso Mfumu imene kukabila kwa muntu na muntu, bonso Nzambi imene kubinga muntu na muntu, bika bau tambula mpilayina. Mpilayai mono sikidikisa mu mabundu yonso.

¹⁸ Muntu ya zengwa bingwaka ? Bika yandi katuka na mambu ya nzengolo ve. Muntu ya bingwa mu konda nzengolo ? Bika yandi zengwa ve.

¹⁹ Nzengolo ikele kima ve ye konda nzengolo ikele kima ve, kansi kaka kukeba bansikudukusu ya Nzambi.

²⁰ Bika muntu na muntu vanda mu mbokolo ya yandi bingwaka.

²¹ Nge vandaka mpika bu nge bingwaka ? Banza sambu na yo ve, kansi kana nge lenda kukatuka na kimpika, sala mpilayina.

²² Kadi konsonani ya ikele mpika bu yandi bingwaka mu Mfumu, yandi ikele muntu ya Mfumu ya kangula, mpilamosi mpe, yandi ya kangulwa bu Mfumu bingaka yandi, yandi ikele mpika ya Klisto. Yoa. 8:36; Lom. 6:18, 22; Ef. 6:6; Kolo. 3:24

²³ Beno sumbwa na ntalu, kituka ve bampika ya bantu. Ngal. 5:1; 1 Pet. 1:18

²⁴ Bampangi, bika muntu na muntu vanda na Nzambi mu yina ya yandi vandaka bu yandi bingwaka.

Mambu ya kindumba

²⁵ Kansi sambu na bandumba, mono imene kubaka nsikudukusu ya Mfumu ve, kansi mono songa mabanza ya mono bonso mosi ya imene kumona nkenda ya Nzambi vanda kwikama.

²⁶ Mpilayai mono banza yo ikele mbote sambu na mpasi ya ikele va beto na muntu kuvanda bonso yandi ikele. Mat. 24:8, 29

²⁷ Nge ikele ya kangwa na nkento ? Sosa ve kukatulwa. Nge ikele ya kangulwa na nkento ? Sosa nkento ve.

²⁸ Kansi, kana nge kwela, nge imene kusala masumu ve. Kana ndumba kwela, yandi imene kusala masumu ve. Kansi bau ya mpilayai tamona mpasi mu nsuni, kansi mono zola kuvulusa beno na mambu yai.

²⁹ Bampangi, mono tuba yai: Ntangu bika fioti, tuka ntangu yai, bau ya ikele na bankento tavanda bonso bau konda bau,

³⁰ bau ya dila, bonso bau ya dila ve; bau ya yangalala, bonso bau ya yangalala ve; bau ya sumba, bonso bau ikele na kima ve;

³¹ bau ya sadila nsi, bonso bau sadila yo yonso ve; kadi mambu ya nsi yai ikele kuvila. Lom. 8:19; 1 Yoa. 2:17; Nzai. 21:1

³² Mono zola beno konda mabanza. Yandi ya konda kukwela ikele kubanza mambu ya Mfumu, bonso yandi lenda kuyangidisa Mfumu;

³³ kansi ya kwela ikele kubanza mambu ya nzi, bonso yandi lenda kuyangidisa nkento ya yandi.

³⁴ Diswaswana ikele na bankento ya kwela ye bandumba. Bankento ya kwela ve ye bandumba ikele kubanza mambu ya Mfumu, na bau lenda kuvanda nlongo mu nitu ye mu mpeve; kansi bau ya kwela ikele kubanza mambu ya nsi, bonso bau lenda kuyangidisa babakala ya bau. 1 Tim. 5:5

³⁵ Mono tuba mambu yai sambu na sadisa beno, ikele ve sambu na tula siongi va beno, kansi sambu na yina ya ikele mbote, na beno lenda kusadila Mfumu na mabanza mbote. 1 Kol. 14:40; Lom. 13:13

³⁶ Kansi kana muntu banza yandi ikele kusala ya lunga ve kwa mwana nkento ya yandi ya imene kuzaba bakala ve, kana yandi imene kuluta mvu ya lunga, ye yo fwiti kuvanda mpilayina, bika yandi-sala bonso yandi zola, yandi sala masumu ve, bika bau kwela.

³⁷ Kansi yandi ya telema ngolo mu ntima ya yandi, ye mambu ikele kubenda yandi ve, kansi yandi lenda kuyala luzolo ya yandi, ye imene kukana mu ntima ya yandi, kukeba mwana nkento ya yandi ya imene kuzaba bakala ve, yandi ikele kusala mbote.

³⁸ Buna yandi ya kwedisa mwana nkento ya yandi ya imene kuzaba bakala ve, ikele kusala mbote, kansi yandi ya kwedisa yandi ve ikele kusala ya luta mbote.

³⁹ Nkento ikele kukangwa ntangu yonso bu bakala ya yandi ikele na moyo, kansi kana bakala imene kufwa, yandi imene kukangulwa ye lenda kukwela na konsonani ya yandi zola, kansi mu Mfumu kaka. Lom. 7:2

⁴⁰ Mono banza yandi luta kumona kiese kana yandi vanda bonso yandi ikele. Mono banza na mono mpe ikele na Mpeve ya Nzambi.