1 Kolinto 5 - Le Nouveau Testament en Kikwango 1950

Paulu bedisa dibundu sambu na bizumba

¹ Yo songwa na bizumba ikele nakati na beno, bizumba mutindu yina ya ikele ta fioti ve nakati bapaien, na mosi ya beno ikele na nkento ya tata ya yandi.

² Beno ikele kuditombola, ye beno ikele na ntantu ve, na yandi ya salaka mambu yai takatulwa nakati na beno.

³ Kadi kieleka, bu mono ikele na beno ve mu nitu, kansi mono ikele na beno mu mpeve, mono imene kufundisa yandi ya salaka mambu yai, bonso mono ikele na beno. Kolo. 2:5; 2 Kol. 10:1

⁴ Mu nkumbu ya Mfumu Yesu, bu beno imene kukutakana ye mpeve ya mono, mu ngolo ya Mfumu ya beto Yesu,

⁵ kuyekula muntu mpilayai kwa Satana sambu na mpasulu ya nsuni, na mpeve lenda kuvuluswa mu lumbu ya Mfumu Yesu.

⁶ Yangalala ya beno ikele mbote ve. Beno zaba ve lufunusu ya fioti ikele kufunisa sobwa yamvimba. Ngal. 5:9; Yak. 4:16

⁷ Katula lufunusu ya nkulu, na beno lenda kuvanda sobwa yampa, bonso beno konda kufuniswa. Kadi dimeme ya beto na Pake yokwa nkailu mpe, Klisto kibeni. Yoa. 19:36; 1 Pet. 1:19

⁸ Sambu na yai bika beto kembila fete mu lufunusu ya nkulu ve, keti mu lufunusu ya nsoki ye ya mambu mbi ve, kansi na mampa ya konda lufunusu ya vedila ye ya kieleka. 2 Mose 12:19; 2 Kol. 1:12; Ef. 5:9; Fili. 4:8

Yandi kanikina kinduku ya bankwa bizumba

⁹ Mono sonikaka kwa beno mu nkanda yina ya mono, na beno vanda kimakangu ve na bankwa bizumba.

¹⁰ Kansi ve na bankwa bizumba ya nsi yai, keti bantu ya zola ya bima ya muntu, keti bantu ya yiba mbongo, keti basambidi ya biteki, kadi buna beno fwiti kukatuka na nsi.

¹¹ Kansi mono sonika kwa beno, kana muntu ya ikele kubingwa mpangi, ikele nkwa bizumba, keti muntu ya zola bima ya muntu, keti nsambidi ya biteki, keti mufingi, keti mukolwi, keti mwivi ya mbongo; beno kudia na muntu mpilayai ve. Bing. 23:20; 24:1; 2 Tes. 3:14; 1 Kol. 10:14; 1 Yoa. 5:21; Tit. 3:10; 2 Tim. 2:21

¹² Yo ikele mambu ya mono fundisa bau ya nanganda ? Beno ikele kufundisa bau ve ya ikele nakati ?

¹³ Kansi Nzambi tafundisa bau ya ikele nanganda. Katula muntu yai ya mbi nakati na beno.